Eklesiyasti 1:1-18
1 Masu a muhusiha,* mwaana a Tavite, mwene o Yerusalemu.
2 “Chiri honaphuriha echu!” Onaloca ti muhusiha,*“Chiri honaphuriha echu! Ichu soothene ti satheru!”
3 Tiheeni muchu onaphureiye ni muteko awe woothene wakuruYoowo oniilipixeryeiye ophara vathi va nsuwa?*
4 Muyareriwo onnavira, nave muyareriwo mukina onnarwa,Nto elapo enniikhalelaru* okhala wookhala.
5 Nsuwa ninnakhuma,* nave nsuwa ninnaneela;Voocharela ninnachimakela tho weiwo nnakhumaayawo wanaawiili.
6 Echeku ennoopa eyaaka makupa oohico nave ennarukunuwa eyaaka makupa oomoko;Enniirukurerya ni wiirukurerya, ennatitelela wiirukurerya; echeku ennatitelela wiirukurerya.
7 Mihice soothene sinnachimaka siyaaka mphareya, naamwiihiiha ephareya henasareya.
Mihice sinnakookela nipuro sikhummaayawo, wi sikookele ochimaka wanaawiili.
8 Ichu soothene ti soovelaveliha;Haavo onawerya othariha seiho.
Miitho hanaakhwaneliwa ni yeeyo anoonaaya;Naari maaru hanavona ni yeeyo aniiwaaya.
9 Yeeyo evinre ti yeeyo enahaala okhala,Nave yeeyo epakiwe enahaala opakiwa wanaawiili;Hiyaavo echu evyaani vathi va nsuwa.
10 Apwanne yookhalavo echu eni elociwe wi: “Nkoonani, ela evyaani”?
Soothene saakhala ovinyerya khalai;Saahikhala ehaakumve elukuluku ahu.
11 Haavo muchu onawuupuwela achu a ilukuluku sakhalai;Nave haavo oni awuupuwele yaale eni erwe voocharela;Naari tho awo heni yuupuweliwe ni yaale eni erwe voocharela.
12 Miyaano, muhusiha,* kaakhala nave nlelo ka mwene Aisarayeli o Yerusalemu.
13 Miyaano kaahiiveleela ni murima woothene ohuserya ni otholathola ni miruku ichu soothene sineeriwa vathi va erimu. Miteko soothananiha seiho Muluku aavanheiye anamwane a achu, wi ekhaleke ooweiwa.
14 Kohoona miteko soothene sineeriwa vathi va nsuwa,Nave kiphiyerya makuchuwelo wi soothene ti satheru, ori wiikara echeku.
15 Honaweryeya wookola echu ekhoromanne,Naari mano waalakhanyerya echu ehirivo.
16 Kaaloca mmurimani mwaka: “Onani! Koophwanya miruku sincipale, waapwaha oothene yaakhanle o Yerusalemu kihaakumve, nave murima aka waaphwanya miruku ni masuwelelo mancipale.”
17 Kaaveleela murima aka osuwela miruku, osuwela olosowa* ni osuwela ololo; nave elatho ori wiikara echeku.
18 Woona wi miruku sincipale sinaruuha othananaxa,*Mwawiihiiha yoole onaaceererya masuwelelo awe onaaceererya wiicela wawe.
Inoota
^ Mu Ehepiri, “mulipa awaathukumya achu.”
^ Mu Ehepiri, “mulipa awaathukumanya achu.”
^ Masu awi “vathi va nsuwa,” mu liivuru yoola anataphulela “veelaponi ya vathi” nave annaphariheliwa ikwaha 29.
^ Mu Ehepiri, “erimweemela.”
^ Naari: “ninnaarya.”
^ Mu Ehepiri, “mulipa awaathukumanya achu.”
^ Naari: “ololo woopwahererya.”
^ Naari: “onyeenyeya.”
