Marku 1:1-45
-
Yohani Mpatisi onnalaleerya (1-8)
-
Opatiso wa Yesu (9-11)
-
Yesu onneehiwa ti Satana (12, 13)
-
Yesu onnapacerya olaleerya o Kalileya (14, 15)
-
Wiichaniwa wa oohuserya oopacerya (16-20)
-
Okumihiwa wa munepa woonanara (21-28)
-
Yesu onnaapenuxa ancipale o Kafarnawu (29-34)
-
Ovekela o nipuro ari meekheiye (35-39)
-
Mulipa a mareca onnapenuxiwa (40-45)
1 Ala mapacereryo a michaka saphaama vooloca sa Yesu Kristu, Mwaana a Muluku:
2 Hiiha ntoko erempwaaya ni mulipa a miririmu, Yesaya: “(Onani! Kinammurumiha namichaka aka ohoolo waa,* yoowo onahaala orehererya ephiro aa.)
3 Ninniiweya nsu na muchu nikhuwelaka otakhwani nriki: ‘Murehererye ephiro ya Yehova! Nwookolole arampha awe.’”
4 Yohani Mpatisi, aari mutakhwani, alaleeryaka sa opatiso ntoko yawooniherya ya orukunuxa murima wi ileveleliwe soocheka.
5 Hiihaa, makupa oothene o Yuteya ni achu oothene o Yerusalemu yaanaya wa Yohani, nave yaanapatisiwa* ni yoowo Mmuhice Yortano, elokohaka soocheka saya soothene.
6 Yoowara ya Yohani yaari mapururu* a ekamelu, aanamakelela muyuununi mwawe esinto* ya exapala, nave owo aalya misope ni enuwi* ya mutakhwani.
7 Owo aanalaleerya ariki: “Yoowo onakicharela ori oowerya okipwaha miyo, nave nkaano ophwanelela wa wuurama ni otaphula mikoi sa asantaalya awe.
8 Miyaano kinoopatisaani ni maahi, nto owo onarwa oopatisaani mwa munepa waweela.”
9 Mmahiku yaale, Yesu aarwa o Nasareti o Kalileya, apatisiwa ti Yohani Mmuhice Yortano.
10 Moohilekela, arikimukhumaru mmaahini, owo aahoona erimu ehulen’ye, nave munepa ntoko ekakaiya, waamukhuruwela yoowo.
11 Naahiiweya tho nsu wirimu nriki: “Weyo wa Mwanaka, oosiveliwa; miyo kinnaweemererya weyo.”
12 Moohilekela, munepa waamweeriha Yesu oya otakhwani.
13 Owo aatitelela okhala otakhwani mahiku makhumi maxexe,* nave weiwo aaheehiwa ti Satana. Owo akhala vamoha ni axinama a mutakhwani, nave ankeelo yaarwa enamukhaviherya.
14 Vaavaa Yohani aaphariweiye, Yesu aaya o Kalileya, alaleeryaka michaka saphaama sa Muluku
15 ariki: “Yoophiya elukuluku yaalakaniwe, Omwene wa Muluku wohaacamela. Murukunuxe murima, nave muroromele michaka saphaama.”
16 Vaavaa eeceiye oxerexere wa Ephareya yo Kalileya, Yesu aamoona Simoni vamoha ni munnawe awiichaniwa Antreya evonyeryaka mphareya milapa saya, woona wi yaari alipa oototha ihopa.
17 Yesu aahi wa yaawo: “Mukichare, nave miyo kinanweeraani alipa awaatotha achu.”
18 Mwawaakuveya, awo yaahiya milapa saya, emuchara yoowo.
19 Ayaaka ohoolo, aamoona Tiyaku mwaana a Sepeteyu vamoha ni munnawe awiichaniwa Yohani, eri mmwaaceyani mwaya erehereryaka milapa saya,
20 nave ahilekenle owo aawiichana. Mwawiihiiha, awo yaahaahiya apapa aya, Sepeteyu, vamoha ni anamuteko mmwaaceyani, nave emuchara yoowo.
21 Voocharela, yaavolowa o Kafarnawu.
Naaphiyalaaya nihiku na Sapata, owo aavolowa mu nipuro na malapelo* apacerya ohusiha.
22 Nave achu yaanatikhiniheya ni mukhalelo awe wa ohusiha, woona wi aanaahusiha yaawo ntoko muchu orino owerya, ohiya ntoko alipa oorepa.
23 Mu elukuluku yeele, aakhalamo mu nipuro nenle na malapelo* mulopwana aaphariwe ti munepa woonanara, nave aakhuwela ariki:
24 “Tiheeni onachunaawe ni hiyaano,* Yesu Munaasareti? Orwenle onitoloxa? Miyaano kohoosuwela phaameene wi wa Aweela a Muluku!”
25 Nyenya Yesu aasamela nsololo ariki: “Omaale, nave khuma mwa yoowo!”
26 Munepa ole woonanara omanle omuhooxa vancipale, ni okhuwela vatokovene, waahikhuma mwa yoowo.
27 Mwawiihiiha, achu yaatepa ohaleeliheya epacerya oloca yaawoyaawo eriki: “Tiheeni yeela? Ala mahusiheryo mavyaani! Owo ookhalano owerya wa olamulela minepa soonanara, nave iho sinnamwiiwelela.”
28 Hiihaa, ovuwa wawe waamwaramwaxeya mwawaakuveya ophiyerya makupa oothene o Kalileya.
29 Yaakhummaaya mu nipuro na malapelo,* Yesu aaya vaate va Simoni ni Antreya ari vamoha ni Tiyaku ni Yohani.
30 Asookora a Simoni yaamukona, yiiceliwaka feepiri, nave Yesu aaleeliwa vooloca sa yaawo.
31 Yesu aaya wa yaawo, aapharela ntata naya aaviiha. Nave feepiri aamala, epacerya waacelekhela yaawo.
32 Oxekuwakavo, nsuwa nneenle, yaamuruuhela Yesu achu oothene yiiceliwa ni yaale yaaphariwe ti masololo,
33 nave achu oothene a epooma yeele, yaathukumana vamulako.
34 Hiihaa, owo aahaapenuxa ancipale yaahooxeya ni ireca soohiyanahiyana ni aahiikara masololo, nyenya owo heemererya wi masololo eloceke, woona wi yaanasuwela wi owo aari Kristu.*
35 Oyaaka nuuxa, nlelo ohooneyakavo, Yesu aavinya aya otakhwani meekheiye, apacerya ovekela.
36 Nyenya, Simoni vamoha ni yaale aareiyeno yaanamwaavya yoowo
37 nave yaamphwannyaaya, yaalocano eriki: “Achu oothene annawaavyaani.”
38 Nto owo aawaakhula: “Hankooni niye nipuro nikina, mu ipooma sawaacamela wi kilaleerye tho weiwo, woona wi kirweenle nthowa na yeeyo.”
39 Nave Yesu aaheeceeca o Kalileya woothene, alaleeryaka mmapuro aya a malapelo,* nave aaniikara masololo.
40 Weiwo aarwa wa yoowo mulipa a mareca, akokhoraka, aanamveka ariki: “Mwaachunaka, munanwerya okipenuxa.”
41 Mwawiihiiha, owo aamoriwa ikharari, nave aahookola ntata nawe amphara mulopwana ole, alocano ariki: “Kinnachuna! Penuwa.”
42 Moohilekela, mareca a mulopwana yoole yaamala, apenuwa.
43 Voocharela, Yesu aamurowiha mwawaakuveya amanle omulopola,
44 nave aloca wa yoowo: “Ohimuleele muchu mukina sa yeela, nto hawe wa mulipa a mukucho waveleele yoovaha ya weelihiwa waa, mwawiiwanana ni nlamulo na Mose, wi ekhale namoona wa yaawo.”
45 Nyenya arowaka, mulopwana ole aapacerya ovuwiha ni olaleya soothene seeren’ye, ophiyerya wi Yesu ahinawerya ovolowa mu epooma mootaphuwa; nto aakhala okhwipi wahaamakiwewo. Naamwi hiihaa, achu oorweela mmapuro oothene, yaatitelela orwa wa yoowo.
Inoota
^ Mu Ekriki, “vamiithoni vaa.”
^ Naari: “opwinihiwa; oruweiwa.”
^ Naari: “manri.”
^ Naari: “nrampa.”
^ Naari: “oravo; eseera.”
^ 40.
^ Mu Ekriki, “musinakooka.”
^ Mu Ekriki, “mu sinakooka mwemmwe.”
^ Naari: “Tiheeni nryaahuno ni weyaano.”
^ Mu Ekriki, “mu sinakooka.”
^ Naari akhweya: “yaanasuwela wi owo aari taani.”
^ Mu Ekriki, “mmasinakooka mwaya.”
