Marku 10:1-52
-
Othela ni omwalana (1-12)
-
Yesu onnaareeliha anamwane (13-16)
-
Nikoho na mulopwana ooreela (17-25)
-
Wiilipiserya ntakhara Omwene (26-31)
-
Yesu onnaloca wanaawiili mwa miririmu sa okhwa wawe (32-34)
-
Yooveka ya Yakopo ni Yohani (35-45)
-
Yesu yawoopola wa ancipale (45)
-
-
Partimeyu mulipa eevaasi onnapenuxiwa (46-52)
10 Avinyaka vaavale, Yesu aaya okhopela* wa Yortano makupa makina o Yuteya, nave muloko* waathukumana tho wa yoowo. Owo aapacerya waahusiha ntoko aakhovelenleiye.
2 Afarisi yaamwaacamela Yesu echunaka omweeha, nave yaamukoha waakhanle wi onneemereryeya wi mulopwana amwalane ni mwaariye.
3 Yesu aawaakhula: “Tiheeni Mose oolamulenleiyeeni?”
4 Awo yaahi: “Mose aaheemererya wi mulopwana arepe ekaarata ya omwalana ni mwaariye ni omurowiha.”
5 Nto Yesu aawaakhula: “Mose aarepa nlamulo nenla nthowa na wuuma wanyu murima.
6 Nyenya, ovinyerya woopaceryani, ‘Muluku aahaapatuxa yaawo mulopwana ni muthiyana.
7 Va nthowa nenla, mulopwana onamwaahiya apapa awe ni amama awe,
8 nave oopiili anamukhala mwiili mmoha,’ mwawiihiiha hari eeli, nto mwiili mmoha.
9 Vanthowa nenla, yeeyo Muluku ophitaannyeiye mu nipisi nimoha, muchu ahimwalanye.”
10 Yaakookenlaaya owaani, oohuserya yaapacerya omukoha vooloca sa yeela.
11 Owo aahi wa yaawo: “Yoole onamwalana ni mwaariye, nave amuthela mukina, onamuraruwela mwaariye,
12 nave muthiyana amwalana ni iyawe, atheliwa ni mulopwana mukina, onamuraruwa.”
13 Voocharela, achu yaapacerya omuruuhela Yesu anamwane wi aatannye,* nto oohuserya yaanaasamela.
14 Oonaka yeela, Yesu aatikhina nave aloca wa yaawo: “Mwaahiye anamwane erwe wa miyo; muhaahiihe, woona wi Omwene wa Muluku ti wa yaale ari ntoko anamwane yaala.
15 Chiri kinnooleelaani wi, oothene yoole ohinaakhela Omwene wa Muluku ntoko mwaana mukhaani, harwa avolowamo.”
16 Owo aahaakuxa anamwane awuupaara nave apacerya waareeliha, aakuheryaka matata awe.
17 Yesu acimulaka, mulopwana mmoha aamuchimakela, akokhora vamiithoni vawe, nave amukoha ariki: “Muhusiha Aphaama, tiheeni kinaphwanelaaka weera wi kaakhele okumi woohimala?”
18 Yesu aamwaakhula: “Ntakhara heeni onakeeraawe aphaama? Haavo ori aphaama voohikhala mmoharu, Muluku.
19 Weyaano woosuwela malamulo: ‘Ohiiphe, ohiraruwe, ohiiye, ohimootherye mukhwaa, ohiwoke, waacicimiheke apapaa ni amamaa.’”
20 Mulopwana aahi wa Yesu: “Muhusiha, kinniiwelela ichu soothene iha ovinyerya woonamwaneni waka.”
21 Yesu aanweha, nave nthowa na omusivela wawe, aahi wa yoowo: “Ennoohala echu emoha: Hawe, watumihe soothene oryaaweno nave ikhorowa sene waavahe achu oohaawa, hiihaa, onamukhalano muhakhu wirimu; ohoolo waya, orwe okichareke.”
22 Nto iiwaleiye naakhulo aathanana nave arowa ari oohiceene, woona wi aakhalano muhakhu muncipale.
23 Amanle waaweha achu yaari vaavale, Yesu aahi wa oohuserya awe: “Chiri, onamukhala woovila wa yaale ari ooreela ovolowa mu Omwene wa Muluku!”
24 Nyenya oohuserya yaatikhiniheya ni masu awe. Voocharela, Yesu aahi: “Anaaka, chiri ti woovila ovolowa mu Omwene wa Muluku!
25 Ti wookhweya ekamelu ovira va ephaka ya sikano, opwaha mulipa ooreela ovolowa mu Omwene wa Muluku.”
26 Awo yaatepa otikhiniheya, nave emukoha:* “Vano taani oni awerye ovuluxiwa?”
27 Aawehaka oohuserya awe, Yesu aahi: “Wa achu ela henaweryeya, nto ohiya wa Muluku; woona wi wa Muluku soothene ti sooweryeya.”
28 Petru aapacerya oloca ariki: “Onani! Noohiya ichu soothene nnoocharaani.”
29 Yesu aahaakhula: “Chiri kinnooleelaani wi, haavo ohin’ye empa awe, naari asinnawe, naari arokorawe, naari amama awe, naari apapa awe, naari anamwane awe, naari imaca sawe, vanthowa naka ni vanthowa na michaka saphaama
30 oni ahaakhele opwaha ikwaha nsana hiihaano, mu elukuluku yeela, ipa, asinnawe, arokorawe, asimamaawe, anamwanaawe, imaca sawe, ni wiikariwa, nave muhoolo,* ekumi yoohimala.
31 Nyenya ancipale ari oopacerya anamukhala ookuchula, nave ookuchula anamukhala oopacerya.”
32 Vaavaa yeecaaya, ewelaka eyaaka o Yerusalemu, Yesu aahaahoolela nave oohuserya yaatikhiniheya; nto yaale yaachara yaawo yaapacerya woova. Aahaakuxa tho yaale Khumi Napiili aakeriha vameekhaaya apacerya waaleela ichu seiho saahaala omphacuwela:
33 “Wiriyanani ela! Nnaya o Yerusalemu, nave weiwo Mwaana a muchu onarwa aveleeliwa wa ahooleli a alipa a mukucho ni alipa oorepa. Awo enarwa emuthoriherya okhwa ni omveleela wa amalapo,
34 nave awo anammunyemula, omutaphera mara, onwaxula ni omwiipha, nto nihiku naneeraru onarwa aviihiwa mookhwani.”
35 Tiyaku ni Yohani, anamwane a Sepeteyu, yaamwaacamela Yesu, elocano eriki: “Muhusiha, nnachuna wi munivahe yeeyo nnahaalaahu woovekaani.”
36 Owo aahi wa yaawo: “Tiheeni munachunaanyu wi koovaheeni?”
37 Awo yaahaakhula: “Muneemererye wi nikiraathe, mmoha omoono anyu woolopwana nave mukina omoono anyu woothiyana, mu ncicimiho nanyu.”
38 Yesu aawaakhula: “Nyuwaano hamunasuwela echu munavekaanyu. Apwanne munanwerya onwurerya koopho yoowo kinanwureryaaka naari munanwerya opatisiwa ni opatiso yoowo kinapatisiwaakano?”
39 Awo yaahaakhula: “Aa, nnanwerya.” Mwa yeeyo Yesu aahi wa yaawo: “Koopho kinawuryaakano nyuwo munahaala onwurerya, nave opatiso kinapatisiwaakano, munarwa mpatisiwano.
40 Nyenya vooloca sa okiraathi omoono aka woolopwana ni woothiyana, eyo heri wa miyo woovahaani, nto mapuro awo ta yaale athanliwe.”
41 Vaavaa akina khumi yiiwalaaya yeela, yaatepa onanariwa ni Tiyaku vamoha ni Yohani.
42 Nto Yesu aawiichana oohuserya awe, alocano: “Moosuwela wi yaale aneeriwa okhala* mamwene a maloko, annaalamulela achu aya ntoko anachunelaaya, nave asitokweene annapharihela otokweene aya wi yaahooxe achu.
43 Eheereyeke hiiha ni nyuwaano; nyenya yoole onachuna okhala mutokweene variyari vanyu, onaphwanela okhala namuteko anyu,
44 nave yoole onachuna okhala oopacerya variyari vanyu, onaphwanela okhala kapuro a oothene.
45 Tiwi, Mwaana a muchu oorwa, ohiya wi arumeeliweke, nto wi arumeele ni ovaha okumi awe ntoko woopola mu nipuro na ancipale.”
46 Vano awo yaaphiya o Yeriko. Nto vaavaa Yesu, oohuserya awe vamoha ni muloko wa achu, yaakhumaaya o Yeriko, Partimeyu (mwaana a Timeyu) mulipa oovekaveka eevaasi, aakiranthe muxerexere mwa rampha.
47 Vaavaa iiwaleiye wi Yesu Munaasareti onamvira, owo aapacerya okhuwela ariki: “Mwaana a Tavite, Yesu, okimorele ikharari.”
48 Mwawiihiiha, ancipale yaapacerya omusamela, emuleelaka wi amaale, nyenya owo aamvira akhuwelaka ariki: “Mwaana a Tavite, okimorele ikharari!”
49 Mwawiihiiha, Yesu aaheemela nave aloca: “Mwiichaneeni.” Mwawiihiiha, awo yaamwiichana mulopwana ole eevaasi, elocaka: “Olipe murima! Vinya; owo onnawiichana.”
50 Arihelaka okhwipi yawiikhuneelano awe, owo aavinya mwawaakuveya aya wa Yesu.
51 Yesu aamukoha ii: “Tiheeni onachunaawe wi kiweerele?” Owo aahaakhula ii: “Raponi,* mukikhaviherye wi kooneke wanaawiili.”
52 Voocharela, Yesu aalocano: “Hawe. Nroromelo naa nohoopenuxa.” Moohilekela owo aakookela woona wawe, nave anamuchara Yesu aayeiyewo.
Inoota
^ Naari: “minlaano.”
^ Naari: “mucici.”
^ Ela tiwi, wi aareelihe.
^ Naari akhweya: “nave enakohana mukina ni mukhwaawe.”
^ Naari: “mmukhalelo wa ichu onoorwa.” Moone Masu Atharihiwe.
^ Naari: “asuweliwe ntoko.”
^ Enataphulela “Muhusiha.”
