Salmu 104:1-35
104 Okumi aka omucicimihe Yehova.
Khwoo Yehova, Muluku aka, nyuwo muri mutokweenexa.
Moowara ncicimiho* ni ovuwa.
2 Nyuwo mohiikhuneela ni omwaleela ntoko yoowara;Moohaatelela erimu ntoko ekuwo ya musakala.
3 Owo ooteka nipuro nawe nookhalavo mmaahini oosulu,*Oopaka meeku okhala ekaaro awe,Onneeca mmakuphelo a echeku.
4 Owo onnaweera ankeelo awe minepa sakuru,*Arummwa awe mooro onasuka.
5 Owo ootikitherya elapo yavathi mmathipelo aya;Eyo herwaru eviihiwavo vanipuro naya* okhala wookhala.
6 Mookhuneela yeeyo ni maahi awiixa, ntoko ni yoowara.
Maahi yaari vasulu va miyaako.
7 Mu osamela wanyu, maahi yaahichawa;Variyari va oruma wa etari anyu, yaahichimaka moohaleeliheya.
8 Miyaako saawela nave mipopa saakhuruwa,Iyaaka nipuro mwaatikithenryaanyu ntakhara seiho.
9 Mootikitherya munlaano wi awo ehipwahe mphimo,Wi ehirwe tho ekookele ohuruwela elapo.
10 Owo onnaacuula anaacuucu mmipopani;Maahi aya annachimaka variyari va miyaako.
11 Axinama oothene a mutakhwani annawurya mwemmo;Apuuru a mutakhwani annamaliha nthanana naya mwemmo.
12 Ipalame sinnamaka ipuuru saya mmiri siri muxerexere mwa maahi;Iho sinniipa mmihuruni mwaya.
13 Owo onnahelela maahi miyaako ovinyerya o nipuro nawe noosulu.
Elapo ennavona ni yawiima ya miteko sanyu.
14 Munnameliha munyepu wi imope ilyeeke,Ni ichu soolyiwa ti achuWi elapo ekumihe yoolya.
15 Eviinyu, yeeyo enahakalaliha murima wa muchu;Makhurwa, yaawo aneeriha ethoi waarya;Ni epaau yeeyo enaruuhela ikuru murima wa muchu.
16 Miri sa Yehova sohaakhwaneliwa,Miri sa seetru so Lipanu seiho owo aanleiye,
17 Mwemmo ipalame sinatekaayamo ipuuru.
Empa ya napipi enakhala mmiri sa xuniperu.
18 Miyaako soorekama ti sa ipuri sa mmiyaakoni.
Miyala ti nchawelo na amachika.*
19 Owo oopaka mweeri wi ohiyaniheke ilukuluku;Nsuwa noosuwela phaama elukuluku ya oneela.
20 Nyuwo munnaruuha epiiphi, nave ohiyu onnaphiya,Vaavaa asinama oothene a mutakhwani anakhumaaya.
21 Amwaco akuru annoopa murika yaavyaka echu ya opharaNave annamveka Muluku yoolya aya.
22 Nsuwa nakhuma awo annakookaNave annakona mmakhukuni mwaya.
23 Muchu onnakhuma ayaaka o mutekoni waweNave onnalapa ophiyerya ohiyu.
24 Miteko sanyu ti sincipale, khwoo Yehova!
Moopaka soothene iho mwa miruku.
Elapo yoosareya ni ichu mpankaanyu.
25 Nyuwaano moopaka ephareya etokweenexa ni yoorakama,Osaren’yemo soopatuxiwa, ikhaani ni itokweene.
26 Mwemmo ennaviramo apophoro,Nave Leviyata,* yoowo mumpankaanyu wi athateke mwemmo.
27 Oothene yaawo annooweheryaani nyuwoWi mwaavahe yoolya aya mu elukuluku yoophwanelela.
28 Yeeyo munaavahaanyu, awo annathukumanya.
Vaavaa munahulaanyu ntata nanyu, awo annaakhwaneliwa ni ichu saphaama.
29 Vaavaa munavithaanyu ethoi anyu, awo annakhala oohaleeliheya.
Mwaviihavo nwiya* aya, annakhwa nave annakookela onchupini.
30 Wakhala wi moorumiha nwiya anyu, awo annapatuxiwa,Nave munnarehererya elapo yavathi.
31 Ovuwa wa Yehova onahaala olekela okhala wookhala.
Yehova onahaala ohakalala ni miteko sawe.
32 Owo onnaweha elapo yavathi, nave eyo ennathukumela;Onnatannya miyaako, nave iho sinnachuwa mwiixi.
33 Kinammwiipela Yehova mu okumi aka woothene;Kinammwiipela macipo* Muluku aka vaavaa kiryaaka mukumi.
34 Muupuwelo aka omuhakalaliheke* yoowo.
Kinahaala ohakalala mwa Yehova.
35 Alipa oocheka anamurimeela veelaponi,Nave achu oonanara murima hekhalavo tho.
Kimucicimihe* Yehova. Mmucicimihe Yehova!*
Inoota
^ Naari: “ophwanelela.”
^ Mu Ehepiri, “mmaahini.”
^ Naari: “ntoko echeku.”
^ Naari: “herwaru ecikinyeya.”
^ Ari asinama analikana ni anamarokolo yaawo anakhala mmiyalani.
^ Moone Masu Atharihiwe.
^ Naari: “munepa.”
^ Naari: “kinamumpakela ncipo.”
^ Naari: “Wuupuwelela waka vooloca sa yoowo okhale woohakalaliha wa.”
^ Naari: “Okumi aka omucicimihe.”
^ Mu Ehepiri, “Aleluya!” Nsu nla nookhalano marepeliwo ookhuveya a nsina, Yehova.“
