Salmu 16:1-11
Mikitawu* a Tavite.
16 Mukikhapelele, khwoo Muluku, woona wi kichawenle wa nyuwo.
2 Miyaano kinnaloca wa Yehova: “Nyuwo mwa Yehova, Ehime aka ya ichu saphaama.
3 Nave aweela eri veelaponi yavathi,Yaale anaphwanela ocicimihiwa, annakihakalaliha vancipale.”
4 Yaale anawaavya amiluku akina annaaceererya othanana waya.
Nkirwa kiyeeha mikucho saya sa nikhami,Nave iyano saka hisirwa siromola masina aya.*
5 Yehova ti nikupa naka, nikupa nenlo nnakaakhwana ni koopho aka.
Nyuwaano munnakhapelela yoohiyeryiwa aka.
6 Miyaano koophimeliwa mapuro aphaama,Aa, kiri oohakalala ni yoohiyeryiwa aka.
7 Kinarwa kimucicimiha Yehova, yoowo onakivaha miruku.
Naari ohiyu, muupuwelo aka wawiixeela* onnakookolola.
8 Kinnatitelela omukuha Yehova vamiithoni vaka moohihiyererya.
Nkirwa kicikinyeya,* woona wi owo ori omoono aka woolopwana.
9 Mwawiihiiha, murima aka onnahakalala, omuchu aka woothene wa mpuwa ori woohakalala.*
Nave kinnakhala* mookhapeleleya.
10 Tiwi himurwa mukihiya* Mmahiye*Himweemererya wi oororomeleya anyu oone nlici.*
11 Nyuwaano munnakisuweliha ephiro ya okumi.
Vamiithoni vanyu* wookhalavo ohakalala wawaaca;Ohakalala* ori omoono anyu woolopwana okhala wookhala.
Inoota
^ Moone Masu Atharihiwe.
^ Ela tiwi, masina a amiluku atheru.
^ Mu Ehepiri, “ikhopela saka.”
^ Naari: “kiphirikeya.”
^ Mu Ehepiri, “ncicimiho naka ninnahakalala.”
^ Naari: “mwiili aka onnakhala.”
^ Naari: “munyanyala okumi aka.”
^ Naari: “mu Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari akhweya: “oone eyuuce.”
^ Mu Ehepiri, “Ni ethoi anyu.”
^ Naari: “Ochapa.”
