Salmu 77:1-20
Wa muhooleli a macipo; va Yetutumi.* Salmu a Asafi. Salmu.
77 Ni nsu naka kinamukhuwela wa Muluku;Kinamukhuwela wa Muluku, nave owo onamukiiwa.
2 Mu nihiku na wuukhuwa waka kinnamwaavya Yehova.
Ohiyu, kinnookolela matata aka wa yoowo moohihiyererya;Miyaano nkinamaaliheya.*
3 Kaawuupuwelaka sa Muluku, kinnuukhuwa;Kinnakhala ohaleeliheya nave kinnayeleela ikuru.* (Selaha)
4 Nyuwo munneeriha makwikhwi aka okhala oohuleya ene;Kinnuukhuwa nave nkinawerya oloca.
5 Muupuwelo aka onnakookela mu ilukuluku sakhalai,Iyaakha ivinre khalai.
6 Kinnuupuwela ncipo naka* ohiyu;Kinnuupuwelela mmurimani mwaka;Kinnaavyaavya* moomaaleleya.
7 Apwanne Yehova onahaala onikhooca okhala wookhala?
Apwanne owo harwa anooniherya mahala?
8 Apwanne osivela wawe woororomeleya woomala okhala wookhala?
Apwanne yoororomeliha awe hiyaakhwanela wa miyareriwo soothene?
9 Mano, Muluku oocuwala wooniherya mahala,Naari apwanne esara awe yoheeriha ikharari sawe omala? (Selaha)
10 Apwanne kinamutitelela oloca kiriki: “Yeeyo enakitannyerya wuukhuwa* ti yawiAwiirimurimu ootoroka meerelo awe ni hiyaano?”
11 Kinahaala wuupuwelela miteko sa Yehova;Kinahaala wuupuwela saweera sawe sootikhiniha sa elukuluku yakhalai.
12 Kinamuupuwelela miteko sanyu sootheneNave kinamuupuwelela saweera sanyu.
13 Khwoo Muluku, iphiro sanyu ti saweela.
Muluku taani ori mutokweenexa ntoko nyuwo, khwoo Muluku?
14 Nyuwo muri Muluku eeparipari, onapaka ichu sootikhiniha.
Moowuupululela achu ikuru sanyu.
15 Ni owerya wanyu* mwaahaavuluxa* achu anyu,Anamwane a Yakopo ni a Yosefe. (Selaha)
16 Maahi yaawoonani, khwoo Muluku;Maahi yaawoonani nave yaatannyeya.
Nave maahi awiixa yaahitekhuma.
17 Mahuruku yaayeeha maahi.
Erimu ya mahuruku yaahoopa itari,Nave mavaka anyu yaanachimakela wu ni wu.
18 Oruma wa etari anyu waari ntoko oruma wa maroota a ikaaro sakhoco;Overunya waahimwaleela veelaponi yavathi,Elapo yaathukumela nave ecikinyeya.
19 Mwaahula ephiro mphareya,Ni mphiro mmaahi mancipale;Nave haavo aawenrye ophwanya inaani sanyu.
20 Mwaahaahoolela achu anyu ntoko muhuwo,Ekhapeleliwaka ni* Mose vamoha ni Aroni.
Inoota
^ Moone Masu Atharihiwe.
^ Naari: “Okumi aka honamaaliheya.”
^ Mu Ehepiri, “munepa aka onnookhwa.”
^ Naari: “ncipo naka na mikoi.”
^ Mu Ehepiri, “Munepa aka onnaavyaavya.”
^ Naari: “enakinyaanya.”
^ Mu Ehepiri, “nwono anyu.”
^ Mu Ehepiri, “mwaahiwoopola.”
^ Mu Ehepiri, “Ni ntata na.”
