Salmu 83:1-18
Ncipo. Salmu a Asafi.
83 Khwoo Muluku, muhimaale;Muhikhale cuu* naari mano weemela, khwoo Muluku.
2 Nkoonani! Amwiicani anyu annampaka namvutuka,Yaale anawiicaani annapaka ichu mmukhalelo wa wiirumiha.*
3 Moovyaka awo annaaphakanela moovitheya achu anyu;Awo annavaanela oweerela yoonanara yaale munaasivelaanyu.*
4 Awo annaloca: “Rwaani, hankooni naatoloxe ntoko nloko,Wi nsina na Isarayeli nihirweru nuupuweliwe.”
5 Awo annaphakana vamoha echu yaweera;*Ahiiwanana* wi ewane ni nyuwaano.
6 Mixakala sa Etomu ni sa Aisimayeli, Mowape ni sa Ahakare,
7 Akepali, Amooni, ni Amaleki,Afilisti vamoha ni achu o Tiru.
8 Asiriya tho ari vamoha ni yaawo;Annaakhaviherya* anamwane a Loti. (Selaha)
9 Nweerele yaawo yeeyo mwaamweerenlaanyu Mitiya,Yeeyo mwaamweerenlaanyu Sisera ni Yapini o muhice Kisoni.
10 Awo yaatoloxiwa o Eni-tori,Ekhala manyowa ntakhara echaya.
11 Nweerele achu aya oocicimiheya yeeyo mwaamweerenlaanyu Orepi ni Sepi,Ni ahooleli aya yeeyo mwaamweerenlaanyu Sepa ni Salmona.
12 Tiwi awo aaloca: “Nikuxe elapo yeeyo Muluku onakhaleiyemo.”
13 Khwoo Muluku aka, mwaavavihe yaawo ntoko manaxi awuuma anavavihiwa ni echeku,Ntoko mitathi sawuuma inavavihiwa ni echeku.
14 Hiiha ntoko mooro oneeyela ntakhwa,Ntoko nikalume nnasuka miyaako,
15 Nwiikare yaawo ni echeku anyu yawuupaNave nwoopopihe yaawo ni echeku anyu yoowali.
16 Mwaakhuneele* owanoni ni munyemu,Wi yaavye nsina nanyu, khwoo Yehova.
17 Yuulihiwe muru nave yoopopiheye okhala wookhala;Enyemuliwe nave ehikhaleworu;
18 Wi achu esuwele wi nsina nanyu ti Yehova,Nyeenyuru muri Awiirimurimu, mulamuleli a veelaponi yoothene yavathi.
Inoota
^ Naari: “oohiloca echu.”
^ Naari: “annaviiha muru.”
^ Mu Ehepiri, “achu anyu oovitheya.”
^ Mu Ehepiri, “annakohana vamoha, ni murima mmoha.”
^ Naari: “Aapaka nlakano.”
^ Mu Ehepiri, “Aakhala nwono wa.”
^ Mu Ehepiri, “Mwaasareihe.”
