Saweeriwa ti Arummwa 10:1-48
10 O Kaisareya aakhalawo mulopwana mmoha nsina nawe Korneliyu, owo aari muhooleli aanakhoco* niichaniwa nikhuuru no Italiya.*
2 Owo aari mulopwana oomucicimiha ni oomoova Muluku vamoha ni oothene a veechokoni vawe; aanaakhaviherya oohaawa ancipale variyari va muloko nave aanapaka mavekelo a vathi va murima wa Muluku moohihiyererya.
3 Variyari va ewora yaneethanu naxexe ya nihiku,* owo aahoonihiwa mookwakwaleya mu yawoona munkeelo a Muluku arwaaka wa yoowo, nave aloca: “Korneliyu!”
4 Oovaka, Korneliyu aananweha munkeelo amukoha ariki: “Tiheeni Apwiya?” Yoowo aamwaakhula: “Mavekelo aa ni waakhaviherya waa oohaawa, soowela iphiya vamiithoni va Muluku ikhala sawuupuxerya.
5 Mwawiihiiha, waarume hiihaano alopwana wi eye o Yope nave yamwiichane mulopwana awiichaniwa Simoni, yoowo tho oneeriwa Petru.
6 Mulopwana ola ohan’ye vaate va Simoni, mulipa oocikicha ixapala yoowo omanke waacamela ophareya.”
7 Moohilekela, munkeelo yoowo aaloca ni yene, amanle opwahavo, aawiichana anamuteko awe eeli ni nakhoco mmoha oomucicimiha Muluku variyari va akhaviheryi awe,
8 aaleela ichu soothene nave aaruma oya o Yope.
9 Mmeeloni mwaya, eri va mukwahani yaacamelaka ophiya opooma, Petru aaya vasulu va empa wi avekele, yaari ewora yaneethanu nammoha.*
10 Nto aatepa ovoliwa nave aanachuna olya. Epakiwaka hiihale yoolya, owo aakhalano yawoona,
11 aahoona wirimu ohulen’yewo, yaakhuruwa echu yeeyo yaari ntoko ekuwo etokweene ya eliinyu yoomakiwa maveru maxexe ekhuruwelaka veelaponi yavathi;
12 nave yaakhalamo axinama oohiyanahiyana a meco mixexe, sawaapasa* sa veelaponi, ni ipalame sa wirimu.
13 Voocharela, naahiiweya nsu nlocaka ni yoowo nriki: “Vinya Petru, wiiphe nave okhuure!”
14 Nto Petru aahi: “Ii Pwiya hooye, ntakhara nkintonko olya echu yooriipiheya naari yoothanyeya.”
15 Nave nsu naaloca wanaawiili ni yoowo nriki: “Oheere yoothanyeya echu yeeyo Muluku eelinheiye.”
16 Yeela yaaheereya ikwaha raru, nave mwawaakuveya ekuwo yeele yaakuxiwavo ewelihiwa wirimu.
17 Petru aahaleeliheya, iikohaka sa yootaphulela ya yawoona yeele aareiyeno. Elukuluku ene yeele, yaaphiya alopwana yaarumihiwe ti Korneliyu, yeemela va mulako enakoha vaate va Simoni.
18 Awo yaahiichana nave tho yaakoha waakhanle wi Simoni yoowo tho aasuweliwe ntoko Petru, aahan’ye vaavale.
19 Nlelo Petru uupuwelelaka sa yawoona yeele, munepa waahi wa yoowo: “Wiriyana! Alopwana araru annawaavya.
20 Mwawiihiiha ovinye, okhuruwe nave onapwaha ni yaawo; ohikhwe minikwa ntakhara miyo kaarumme yaawo.”
21 Petru aakhuruwa, aya wa alopwana yaale ii: “Mookiphwanya, ti yoomi ene munakaavyaanyu. Mwaarweelani wenno?”
22 Awo yaahi: “Korneliyu, muhooleli a anakhoco, mulopwana eekhaikhai ni oomoova Muluku, yoowo muloko woothene wa Ayuta onamulocaaya phaama, ohaakhela ohoolela wa Muluku moorweela wa munkeelo aweela wi awiichaneeni nyuwo wi muye owannyawe wi iiwe masu anyu.”
23 Vaavaa Petru aawaakhela nave ehaya.
Mmeeloni mwaya, Petru aacimula vamoha ni yaawo, nave anna akina o Yope yaamuhoola.
24 Nihiku noocharela, owo aavolowa o Kaisareya. Korneliyu aanaawehererya aawompe ahima awe, vamoha ni asinthamwene awe a vamurimani.
25 Vaavaa Petru aavolonweiye, Korneliyu aamuthikirerya, akokhora vamiithoni vawe nave amucicimiha.*
26 Nto Petru aamviiha ariki: “Vinya, miyaano tho pahiru ka muchu ntoko weyaano.”
27 Achekulaka ni yoowo, aavolowa nave aaphwanya achu ancipale ethukumanne.
28 Owo aahi wa yaawo: “Nyuwaano moosuwela phaameene wi honeemereryiwa wa Ayuta okhala vamoha ni achu a nloko nikina. Nto Muluku ookooniha wi nkinaphwanela omweera muchu okhala oothanyeya naari ooriipiheya.
29 Mwawiihiiha, kiichaniwaaka koorwa kihikhoonceru. Vano kinnookohaani ntakhara heeni mukiichannaanyu.”
30 Korneliyu aahaakhula: “Mahiku maxexe avinre, miyaano kaamvekela mpa mwaka ewora ntoko yeela, ewora yaneethanu naxexe,* aahooneya wa miyo mulopwana yoowo aawanre soowara sawaarya;
31 nave aahi: ‘Korneliyu, Muluku ohiiwa nivekelo naa, ohuupuwela tho waakhaviherya waa oohaawa.
32 Mwawiihiiha, omurume muchu oya o Yope, amwiichane Simoni awiichaniwa tho Petru. Mulopwana ola ohan’ye vaate va Simoni mulipa oocikicha ixapala yoowo omanke oxerexere wa ephareya.’
33 Hiihaa, kaahaarumiha achu owiichanaani nyuwo mwawaakuveya, nave moheerano phaama orwa. Vano oothene hiyo, nri vamiithoni va Muluku wi niiwe ichu soothene Yehova oolamulenleiyeeni wi muloce.”
34 Voocharela, Petru aapacerya oloca ariki: “Chiryene, vano kinniiwexexa wi Muluku haano nthalu,
35 nto mwa maloko oothene, muchu ori oothene yoowo onamoova nave aneerano yawookololowa, owo onnamweemererya.
36 Owo aarumiha masu awe wa anamwane a Isarayeli, alaleyaka michaka saphaama sa murecele moorweela wa Yesu Kristu, ola ti Pwiya a oothene.
37 Nyuwaano moosuwela mwaha waalociwa o Yuteya woothewene, ovinyerya o Kalileya, omanle olaleiwa opatiso wa Yohani:
38 Vooloca sa Yesu yoowo aari o Nasareti, mukhalelo Muluku aamuthanlileiye ni munepa waweela ni ikuru; owo aaheeceeca makupa oothene eerakano saphaama nave aapenuxaka oothene yaahooxiwa ti Musaserya, woona wi Muluku aari ni yoowo.
39 Nave hiyo na anamoona a ichu soothene eenreiye elapo yo Yuteya ni o Yerusalemu; nto awo yaamwiipha, emuthomeya va mwiri.
40 Muluku aamviiha yoowo mu nihiku naneeraru nave eemererya wi owo ooneye,*
41 ohiya wa achu oothene, nto wa anamoona yaathanliwe khalai ti Muluku, hiyo, nlyile vamoha ni owurya ni yoowo amanle oviihiwa mookhwani.
42 Nave tho, owo onlamulela wi nlaleerye wa achu ni ovaha onamoona wawaakhwanela wi ti yoowo Muluku omuthanlileiye wi akhale muthoriha a akumi ni aalipa ookhwa.
43 Wa yoowo alipa a miririmu oothene anneerela onamoona, wi oothene yoole onamuroromela yoowo onarwa akhurumuweliwa soocheka moorweela wa nsina nawe.”
44 Nlelo Petru arikimuloca ichu seiha, munepa waweela waahaakhuruwela oothene yiiwa masu.
45 Nave oothikiliwa oororomela* yaawo yaaruule vamoha ni Petru, yaatikhina, woona wi yamahala ya munepa waweela yaanayeeheriwa tho wa achu a maloko.
46 Nthowa nawi awo, yaanawiiwa elocaka mu ilocelo* soohiyanahiyana ni emucicimihaka Muluku. Voocharela Petru aahi:
47 “Achu ala ahaakhela munepa waweela hiiha ntoko hiyaano; apwanne ookhalavo oni aawatiiherye maahi, aahiihaka wi ehipatisiwe?”
48 Mwawiihiiha, owo aalamulela wi epatisiwe mu nsina na Yesu Kristu. Nave awo yaamveka owo wi akhale ni yaawo mahiku vakhaani.
Inoota
^ Naari: “kenturiyu,” muhooleli a anakhoco nsana.
^ Nikhuuru na anakhoco o Roma awaakhwana 600.
^ Ela tiwi, variyari va ewora ya 15.
^ Ela tiwi, variyari va ewora ya 12, mitiya.
^ Naari: “sawiipurula.”
^ Naari: “amulapela.”
^ Ela tiwi, variyari va ewora ya 15.
^ Naari: “iisooneihe.”
^ Naari: “oororomeleya.”
^ Mu Ekriki, “malumi.”
