Saweeriwa ti Arummwa 11:1-30
11 Arummwa ni anna yaari o Yuteya, yaahiiwa wi achu yahaari Ayuta yaaheemererya tho masu a Muluku.
2 Mwawiihiiha, vaavaa Petru aawenleiye ayaaka o Yerusalemu, yaale yaacicimiherya othikiliwa yaapacerya omwaakaaha* yoowo,
3 eriki: “Weyaano woovolowa vaate va achu oohithikiliwa nave olya vamoha ni yaawo.”
4 Hiihaa, Petru aapacerya waatharihela mookwakwaleya sa yeeyo yeeren’ye, ariki:
5 “Miyaano kaari epooma yo Yope kivekelaka nave kaakhalano yawoona, mu yaawoona yaakhuruwa wirimu echu yeeyo yaari ntoko ekuwo etokweene ya eliinyu yoomakiwa maveru maxexe, nave yaarwa vaavaa kaaryaakavo.
6 Kaavarenryaakamo, kaawoona axinama a meco mixexe a veelaponi, axinama amutakhwani, sawaapasa* vamoha ni ipalame sa wirimu.
7 Nave tho kaahiiwa nsu nlocaka wa miyo nriki: ‘Vinya Petru, wiiphe nave okhuure!’
8 Nto kaahaakhula kiriki: ‘Ii Pwiya hooye, ntakhara vayanoni vaka hiyintonko ovolowavo echu yoothanyeya naari yooriipiheya.’
9 Nave nsu noorweela wirimu naaloca ni miyo ekwaha yanaawiili nriki: ‘Oheere yoothanyeya echu yeeyo Muluku eelinheiye.’
10 Ela yaaheereya ekwaha yaneeraru, nave ichu soothene saakookiheriwa wirimu.
11 Nave tho elukuluku ene yeele, yaaphiya alopwana araru vaate naaryaahuvo, oorweela o Kaisareya ekaavyaka.
12 Voocharela, munepa waakileela wi kichaanane ni yaawo, kihikhwaakaru minikwa. Anna yaala athanu nammoha yaayawo ni miyaano, nave naavolowa vaate va Korneliyu.
13 “Owo aanileela wi aahooneya munkeelo vaate vawe, amuleela ariki: ‘Waarume alopwana oya o Yope, yamwiichane Simoni awiichaniwa tho Petru,
14 yoowo onamooleelaani ichu seiho inii soovuluxeeni nyuwo vamoha ni aveechokoni vanyu.’
15 Vaavaa kaapacenryaaka oloca, munepa waweela waahaakhuruwela yaawo hiiha ntoko weenraaya ni hiyo woopaceryani.
16 Mwawiihiiha, kaahuupuwela masu a Apwiya, yaawo yaaloca eriki: ‘Yohani aapatisa ni maahi, nto nyuwo munarwa mpatisiwa ni munepa waweela.’
17 Vano waakhanle wi Muluku ohaavaha yamahala emohamoha yeeyo onivanheiye hiyo, nnaaroromela Apwiya Yesu Kristu, miyo kaari aani wi kimuhiihe Muluku?”*
18 Vaavaa yiiwalaaya ichu seiha, awo hiyaatitelenle omvaanya,* nto yaamucicimiha Muluku eriki: “Vano, Muluku ohaavaha tho achu ahiri Ayuta ocharuwa onakeriha wookumini.”
19 Yaale yaamwaramwaxiwe nthowa na wiikariwa waapacenrye ni Estefanu, yaaya o Fenisiya, o Xipre ni o Antiyokeya, nto yaaloca masu pahiru wa Ayuta.
20 Nave mwa alopwana yaawo akina yaari o Xipre ni o Sirene, yaaya wa Antiyokeya nave epacerya oloca wa achu yaaloca Ekiriki, elaleeryaka michaka saphaama vooloca sa Apwiya Yesu.
21 Opwaha yeeyo, ntata na Yehova naari ni yaawo, nave ancipale yaanaroromela, erukunuwela wa Apwiya.
22 Ovuwa waya waaphiya owaruni wa muloko waakhala o Yerusalemu, nave awo yaamurumiha Parnape oya wa Antiyokeya.
23 Aaphiyaleiye, aahoona mahala matokweene a Muluku, aahakalala nave apacerya waalipiha wi etitelele okhala mwa Apwiya ni murima woothene;
24 woona wi aari mulopwana aphaama oosareya munepa waweela ni nroromelo. Nave muloko muncipale wa achu waahaaceereryiwa wa Apwiya.
25 Mwawiihiiha, owo aaya o Tarsu wi amutholathole Sawulu.
26 Aamphwannyeiye, aamukuxa ayano wa Antiyokeya. Yaakhala weiwo ophiyerya muyakha mmoha, ethukumanaka ni muloko yaahusihaka achu ancipale. Ti wa Antiyokeya weiwo, oohuserya yaapacenryaayawo wiichaniwa Akristu moorweela wa ohoolela wa Muluku.
27 Mmahiku yaale, alipa a miririmu akina yaakhuruwa o Yerusalemu eyaaka o Antiyokeya.
28 Mmoha a yaawo awiichaniwa Akapo aavinya, nave aaloca mwa miririmu moorweela wa munepa wi enahaala orwa etala etokweene mu elapo yoothene yavathi. Mweeparipari, eyo yeeren’ye elukuluku ya Kalawutiyu.
29 Mwawiihiiha, oohuserya yaalakelela wi mmoha ti mmoha mwawiiwanana ni owerya wawe, eveleele nikhaviheryo* wa anna yaakhala o Yuteya;
30 yaawo yaaheerano yeela, erumiha wa asitokweene ewiinnyerenrye Parnape ni Sawulu.
Inoota
^ Naari: “ovaanyihana ni yoowo.”
^ Naari: “sawiipurula.”
^ Naari: “kiwerye ommwareela Muluku.”
^ Mu Ekriki, “awo yaakhala oomaaleene.”
^ Naari: “ephare muteko wa okhaviherya.”
