Saweeriwa ti Arummwa 24:1-27
24 Evinre mahiku mathanu mulipa a mukucho mutokweene Ananiya aakhuruwa vamoha ni asitokweene, ni mulopwana oosuwelano oloca* iichaniwa Tertulu, nave awo yaamusomela Paulo wa mulamuleli.
2 Vaavaa iichaniweiye, Tertulu aapacerya omusomela ariki:
“Oocicimiheya Felix hiyo ninnakhala mmureceleni mmahiku mancipale mwanthowa na olamula wanyu; miruku mureherenryaanyu sinniichaaliha muloko ola.
3 Mu ilukuluku soothene nave tho mmapuro oothene ninnasuwela yeela, Oocicimiheya Felix, nave ninnathamalela vancipale.
4 Nto wi kihiiye elukuluku anyu yincipale, kinnoovekaani wi muniwiriyane mwawaakuveya mu oreera wanyu murima.
5 Vawi nohoona wi mulopwana ola epahu,* onnamutannya namvutuka variyari va Ayuta oothene anakhala veelaponi yavathi, nave muhooleli a nikhuuru na Anasareti.
6 Oheererya tho onyemula empa ya Muluku, ti nthowa nene nimphanraahu.
7 *——
8 Wakhala wi moomukoha, munahaala osuwela ichu soothene seiha nnamusomelaahuno.”
9 Voocharela, Ayuta yaakhaviherya tho yeela, ecicimiheryaka wi ichu soothene seiha saari seeparipari.
10 Vaavaa mulamuleli aamuthoonnyeiye wi aloce, Paulo aahi:
“Kisuwelaka phaama wi nyuwo munnathoriha muloko ola mu iyaakha sincipale, kinnaloca masu awiisaakihano kihoovelelaka.
11 Ntoko munaweryaanyu ovareryela, havinrevo mahiku opwaha khumi napiili vaavaa kiwenlaaka kiyaaka o Yerusalemu wi kamulape Muluku;
12 nave awo hakiphwannye kaakhulanaka ni muchu mu empa ya Muluku, naari onyakuliha muloko mmapuro a malapelo* naari mu nipuro nikina na epooma.
13 Naari tho heni ewerye wooniherya vamiithoni vanyu ichu seiha anakisomelaaya hiihaano.
14 Nyenya kinneemererya wa nyuwo wi kinnamulapa Muluku a makholo aka kicharihaka ephiro yeeyo awo aniichanaaya nikhuuru. Kinnaroromela soothene inalociwa mu Nlamulo ni seiho irempwe ti alipa a miririmu.
15 Nave miyaano kookhalano ewehereryo wa Muluku, ewehereryo yeeyo achu ala tho aryaayano, wi onamukhalawo ovinya muukhwani wa awookololowa ni oohookololowa.
16 Wanthowa na yeela, kinniilipixerya okhalano yawuupuxerya-ya-murima yaweela* vamiithoni va Muluku ni wa achu.
17 Ivinre iyaakha sincipale, kaaphiya o Yerusalemu kiruuhaka yooveleela wa nloko naka ni operekha tho soovaha.
18 Keeraka seiha, awo yaakiphwanya kiri aweeliheya mwawiiwanana ni Nlamulo mu empa ya Muluku, nto ohiya kiri ni achu naari kimutannyaka namvutuka. Nyenya mwemmo yaakhalamo Ayuta akina oorweela eprovinsiya yo Asiya
19 ti yaawo yaaphwanenle orwa wa nyuwo wi ekisomele yaarimwi erino echu yookisomelano.
20 Naari alopwana ala ari vaava eloce yoonanara taani akiphwanyenryaayano vaavaa kaaryaaka o Sineetriyu.*
21 Pahiru echu kenraaka ti yeela kaaloncaaka variyari vaya kiriki: ‘Kinathoriheliwa olelo vamiithoni vanyu vanthowa na ewehereryo ya oviihiwa wa alipa ookhwa!’”
22 Nto woona wi Felix aaleeliwa phaama vooloca sa Mphiro yoola, aahiyererya mulacu, ii: “Kinarwa kisuwela phaama sa mwaha anyu, arwiile mutokweene a anakhoco, Lisiya.”
23 Nave owo aamulamulela muhooleli a anakhoco wi anwalele, nto amvahe otaphuwa wa vakhaani nave eemererye wi asinthamwene awe yaakhwaniheryeke soothowa sawe.
24 Evinre mahiku vakhaani, Felix aarwa ni mwaariye Trusila yoowo aari Muyuta; owo aamwiichaniha Paulo nave aanwiriyana alocaka sa omuroromela wawe Kristu Yesu.
25 Nto vaavaa Paulo aapacenryeiye oloca sa wookololowa murima, wiihiiha ni othoriha yoowo onoorwa, Felix aatepa woova nave aloca ariki: “Mwahiihaano opwahevo, nto kakhalano ekari ekina kinanwiichana wanaawiili.”
26 Elukuluku emohamoha, aanaweherya wi Paulo aahaala omwinnya ikhorowa. Wanthowa na yeeyo, aanamwiichaniha wiiliwiili nave aanachekulano.
27 Nto ivinre iyaakha piili, Felix aaraceeliwa ni Porsiyu Festu; nave woona wi Felix aanachuna waahakalaliha Ayuta, aamuhiya Paulo mukariposo.
Inoota
^ Naari: “mulipa a waakiha miyaha.”
^ Naari: “mulipa a waakanyerya.”
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
^ Mu Ekriki, “mmasinakooka.”
^ Naari: “yawuupuxerya-ya-murima yoohikhalano nthowa.”
^ Moone Masu Atharihiwe.
