Saweeriwa ti Arummwa 5:1-42
5 Nyenya, mulopwana awiichaniwa Ananiya vamoha ni mwaariye awiichaniwa Safira, yaakuliha emaca aya.
2 Nto owo aahiiwanana ni amwaariye avitha ikhorowa ikina, nave ikina aaveleela wa arummwa.
3 Nyenya Petru aahi: “Ananiya, ntakhara heeni Satana oovolonweiye ophiyerya onawoka munepa waweela ni ovitha ikhorowa ikina sa emaca?
4 Emaca hiyaari yawaa ohaakumve otumiha? Nave omanlaawe otumiha, apwanne ikhorowa sene hisaari mmatani mwaa? Vano ntakhara heeni wuupuwenlaawe weera echu ntoko yeela mmurimani mwaa? Hiwoonthe vamiithoni wa achu, nto wa Muluku.”
5 Iiwaleiye masu yaala, Ananiya aahuuwa akhwa nave oothene yiiwale yaatepa woova.
6 Mwawiihiiha, amiravo yaavinya nave emuhuruwela ni ikuwo, voocharela yaamukumiherya vaate eya yamvitha.
7 Vano evinre echu ya iwora raru, mwaariye aavolowa ahisuwelaka yeeyo yeeren’ye.
8 Petru aamukoha ii: “Okileele, mwaatuminhaanyu emaca, ikhorowa mwaakhenlaanyu ti seiharu chiri?” Owo aahi: “Aa, ti seiha.”
9 Hiihaa, Petru aahi: “Ntakhara heeni nyuwo oopiili mweemerenryaanyu owoka munepa wa Yehova? Vano yaale aavinthe aiyaa ari vamilako; nave awo anamookumiherya vaate.”
10 Elukuluku ene yeele Safira aahuuwela ohoolo wawe nave akhwa. Vaavaa amiravo yaavolonwaaya, yaamphwannye akhwile nave yaamuteexerya vaate eya yamvitha waacamana ni aiyawe.
11 Mwawiihiiha, muloko woothene waatepa woova vamoha ni oothene yaale yiiwale ichu seiha.
12 Opwaha yeeyo, arummwa yaanapaka ineneeryo sincipale ni sootikhiniha variyari va achu; nave oothene yaanathukumana mu Nipithela na Solomoni.
13 Mweeparipari, akina hiyaarino olipa murima wi ethukumane ni yaawo, nyenya achu yaanaaloca yaawo mwaphaama.
14 Ohiya yeeyoru, achu ancipale ophitaanyerya alopwana ni athiyana yaanaaroromela Apwiya nave yaanakhala vamoha ni yaawo.
15 Ophiyerya wi yaanaakuxa awiiceliwa yaakerihaka mu arampha atokweene, enawaatelela mu ikaama ikhaani ni mmaphaani, echunaka wi wookhala mano wi vaavaa Petru aavireiye, muuruxi awe waaphwanye akina a yaawo.
16 Nave tho, muloko mutokweene wa achu orweela mu ipooma sawaacamela sa o Yerusalemu, yaanaaruuha alipa awiiceliwa ni alipa oophariwa ni minepa soonanara, nave oothene awo yaanapenuxiwa.
17 Mwawiihiiha, mulipa a mukucho mutokotoko aavinya vamoha ni oothene aareiyeno a nikhuuru na Asatuki, esaren’ye ehace.
18 Awo yaahaaphara arummwa nave yaawalela mu ekariposo ya achu pure.
19 Nto elukuluku ya ohiyu, munkeelo a Yehova aahula milako sa ekariposo, aakumiherya vaate nave aloca ariki:
20 “Haweni, mwiisooneihe mu empa ya Muluku nave mutitelele oloca wa achu michaka soothene vooloca sa okumi.”
21 Nave yiiwalaaya yeela, waaxilaayavo awo yaavolowa mu empa ya Muluku nave epacerya ohusiha.
Vaavaa aaphiyaleiye mulipa a mukucho mutokweene vamoha ni yaawo aareiyeno, yaahaathukumanya alipa oothoriha ni nikhuuru na asitokweene a anamwane a Isarayeli nave elamulela wi eruuhiwe arummwa yaari mukariposo.
22 Vaavaa alipeleli yaakelaayawo, hiyaaphwannyemo mukariposo. Mwawiihiiha, awo yaakooka yaaleela,
23 eriki: “Noophwanya ekariposo ewaliwe ni olipiha woothene nave alipa oolipelela yeemenle va milako, nto vaavaa nihunlaahumo, hinimphwannyemo muchu.”
24 Yiiwalaaya yeela, muhooleli a alipa ooweherya a empa ya Muluku vamoha ni ahooleli a alipa a mukucho, yaahaleeliheya, yiikohaka sa yeeyo enahaala weereya voocharela.
25 Muchu mmoha aaphiya nave aaleela ariki: “Alopwana yaale mwaawalenlaanyu mukariposo, ari mu empa ya Muluku yaahusihaka achu.”
26 Voocharela, muhooleli vamoha ni alipa ooweherya awe yaayawo nave yaaruuhawo arummwa, nto hiyenreno moowali woona wi yaanoova ovonyiwa maluku ti muloko.
27 Hiihaa, yaahaaruuha nave yaaperekha o Sineetriyu.* Voocharela mulipa a mukucho mutokweene ahaakoha
28 ariki: “Hinoolamulenleeni wi muhititelele ohusiha mu nsina nenla? Vano onani, moosareiha o Yerusalemu ni mahusiheryo anyu, munachuna onivaha hiyo nthowa na nikhami na mulopwana ola?”
29 Petru ni arummwa akina yaahaakhula: “Nnaphwanela omwiiwelela Muluku ntoko mulamuleli waapwaha achu.
30 Muluku a makholo ahu omviiha Yesu mookhwani, yoowo nyuwo mwaamwiiphalaanyu, moorweela wa omuthomeya va mwiri.
31 Muluku aamucicimiha yoowo, amukuha omoono awe woolopwana ntoko Muhooleli Mutokweene ni Mvuluxa, wi aavahe Aisarayeli orukunuwa murima ni okhurumuweliwa wa soocheka.
32 Hiyo ninneerela onamoona wa ichu seiha, nave tho munepa waweela yoowo Muluku aavanheiye yaawo anamwiiwelela ntoko mulamuleli onneerela tho onamoona.”
33 Yiiwalaaya yeela, yaatepa onyeenyeya* enachuna owiipha.
34 Nto aaheemela mu Sineetriyu* mwemmwe Mfarisi mmoha awiichaniwa Kamaliyeli, muhusiha a Malamulo oocicimihiwa ni muloko woothene, owo aalamulela wi ekumiheriwe vaate alopwana ale mu elukuluku vakhaani.
35 Hiihaa, aahi: “Alopwana nyu o Isarayeli, mukhaleno ephoole ni yeeyo munachunaanyu oweerela alopwana yaala.
36 Ntoko yootakiherya, mahiku avirale, aavinya Tewuta aniiseera okhala echweenevo. Echu ya alopwana masana maxexe yaanamuchara yoowo, nto owo aakhwa, nave oothene yaale yaamuchara yaamwaramwaxiwa ehikhala echweenevo.
37 Evinre yeela, aakhalavo tho muchu mukina awiichaniwa Yuta o Kalileya, elukuluku ya namarepela, nave aahiikuxerya muloko mukina. Owo tho aarimeela, nave achu yaawo yaamuchara yaamwaramwaxiwa.
38 Vano, nthowa na yeela kinnooleelaani, mwaataphule alopwana ala, mwaahiye mmureceleni. Woona wi, waakhanle wi muteko ola ti wa achu onahaala opwata;
39 nto waarweelaka wa Muluku, himuwerya waapwatiha. Nyenya moohiyana, akhweya muni munawana ni mwaneene Muluku.”
40 Mwawiihiiha, awo yaachariha olopola wawe. Yaawiichana arummwa, emanle waawaxula* yaahaalamulela wi ehiloce tho mu nsina na Yesu nave yaahaarowiha.
41 Mwawiihiiha, awo yaakhuma mu Sineetriyu* ehakalanle, woona wi yaaheeriwa okhala oophwanelela onyemuliwa vanthowa na nsina nawe.
42 Nave mahiku oothene, mu empa ya Muluku vamoha ni empa ni empa, yaatitelela ehihiyerenrye, ohusiha ni olaleerya michaka saphaama vooloca sa Kristu Yesu.
Inoota
^ Moone Masu Atharihiwe.
^ Naari: “yaahommwa murima.”
^ Moone Masu Atharihiwe.
^ Naari: “waamana.”
^ Moone Masu Atharihiwe.
