Wupulula 1:1-20
1 Wuupulula* wa Yesu Kristu, yoowo Muluku omvanheiye, wi awoonihe akapuro awe ichu inaphwanela weereya voohilekela. Yesu aamurumiha munkeelo awe, nave moorweela wa yoowo aamusuweliha ni ineneeryo ichu seiha wa kapuro awe, Yohani,
2 yoowo eerenle onamoona masu yaawo Muluku aavanheiye ni onamoona ovahiwe ni Yesu Kristu, aa, wa ichu soothene oonneiye.
3 Oohakalala ti yoole onaalakhanya moovuwa ni yaale aniiwa masu yaala a miririmu, nave anachariha ichu seiho irempwe mummo, ntakhara elukuluku yaalakeleliwe yohaacamela.
4 Miyaano Yohani, kinnarepela miloko mithanu namiili iri o eprovinsia yo Asiya:
Mukhaleno mahala matokweene ni murecele soorweela wa “Yoowo ori, yoowo aari ni yoowo oni arwe,” nave soorweela wa minepa mithanu namiili seiho iri vamiithoni va munyukhu awe,
5 ni soorweela wa Yesu Kristu, “Namoona Oororomeleya,” “oopacerya oyariwa mwa alipa ookhwa,” ni “Mulamuleli a mamwene a veelaponi yavathi.”
Yoowo onanisivela nave onitaphunle wa soocheka sahu moorweela wa nikhami nawe,
6 nave aneera okhala mamwene ni alipa a mukucho* wa Muluku awe ni Tiithi, aa, wa yoowo aakhele ncicimiho ni owerya okhala wookhala. Aamen.
7 Onani! Owo onnarwa mmeekuni nave miitho oothene anahaala omoona, ni yaawo ene yaamuhomme; nave mahimo oothene a veelaponi yavathi enarwa yinla vancipale* wa nthowa na yoowo. Aa, Aamen.
8 Yehova Muluku oni: “Miyaano ka Alfa ni Omeka,* Yoowo ori, aari ni oni arwe, Aikuru Soothene.”
9 Miyaano Yohani, munninyu ni awuukano vamoha ni nyuwo yoohooxa, Omwene ni ovilela mwawiiwanana ni Yesu, kaari o evilivili yawiichaniwa Patimu wa nthowa na oloca sa Muluku ni ovaha onamoona vooloca sa Yesu.
10 Mwa munepa waweela kaari mu nihiku na Apwiya, nave kaahiiwa oculi waka nsu nakuru, noolikana ni oruma wa nipenka,
11 nriki: “Yeeyo onoonaawe, orepe va eroolu nave orumihele miloko mithanu namiili: O Efesu, Esumurna, Perkamu, Tiyatira, Sarti, Filatelfiya, ni o Lawotikeya.”
12 Kaarukunuwa wi kimoone yoowo aaloca ni miyo, nave vaavaa kaarukununwaaka, kaahoona mithuko mithanu namiili sa ooru,
13 nave veeri wa mithuko seiye, aakhalavo mmoha oolikana ni mwaana a muchu, awanre yoowara yaakotela mu inaani nave awanre ekuwo ya ooru vachirima vawe.
14 Ohiya yeeyo, muru awe ni miihi awe yaari aweela ntoko mapururu* aweela, ntoko mucarapo; nave miitho awe yaari ntoko nikalume na mooro;
15 inaani sawe saanaarya ntoko muchove onatotoxiwa vaikho nave nsu nawe naari ntoko oruma wa maahi mancipale.
16 Owo aakhalano itheneeri thanu napiili ontata nawe noolopwana, mwaano mwawe waanakhumamo nlema noorekama naweetha wu ni wu,* nave ethoi awe yaari ntoko nsuwa nnoopa ni ikuru.
17 Vaavaa kaamonnaaka yoowo, kaahuuwela va manaani awe ntoko ookhwa ene.
Voocharela, owo aakikuherya ntata nawe noolopwana nave aloca ariki: “Ohoove. Miyo ka Oopacerya ni Ookuchula,
18 ni yoowo ori mukumi. Kaari ookhwa, nto vano ka mukumi okhala wookhala, nave kookhalano ixaavi sa okhwa ni sa Mahiye.*
19 Mwawiihiiha, orepe ichu seiha wonnaawe, ichu seiho ineereya hiihaano ni ichu seiho inii seereye imanle seiha.
20 Ela yoovitheya yaweela ya itheneeri thanu napiili wonnaawe ontata naka noolopwana ni ya mithuko mithanu namiili sa ooru: Itheneeri thanu napiili inataphulela ankeelo a miloko mithanu namiili nave mithuko mithanu namiili inataphulela miloko mithanu namiili.
Inoota
^ Naari: “wooneiha.”
^ Mu Ekriki, “ooneera omwene, alipa a mukucho.”
^ Naari: “yiimana vanaakhopeni.”
^ Ela tiwi, oopacerya ni ookuchula. Naari “A ni Z ya alfapetu Eekriki.”
^ Naari: “manri.”
^ Naari: “nrino orele wu ni wu.”
^ Naari: “Hati,” ela tiwi, nipuro achu oothene anavithiwaayawo. Moone Masu Atharihiwe.
