Wupulula 11:1-19
11 Nave kaahivahiwa mutathi woolikana ni ekopo,* vaavaa owo aaloceiye ariki: “Ovinye wi waphime nipuro naweela na Empa ya Muluku ni altare, vamoha ni yaawo anamulapela mwemmo.
2 Nto okhwipi wa vaate wa nipuro naweela na empa ya Muluku, ohiye hiihaa ohiphime, woona wi nlo nooveleeliwa wa amalapo, nave awo ekaamunyikala epooma yaweela mu miyeeri makhumi masese ni miyeeri miili.
3 Kinanweeriha anamoona aka eeli oloca mwa miririmu mu mahiku ncikhwi nimoha ni masana meeli ni makhumi mathanu nammoha* ewanre isakhwi.”
4 Ala analikanyihiwa ni miri miili sa asitona ni mithuko miili, nave yeemenle vamiithoni va Pwiya a elapo yavathi.
5 Akhalavo mukina onachuna oweerela yoonanara, onamukhuma mooro mwaano mwaya ni waasuka amwiicani aya. Akhalavo mukina onachuna oweerela yoonanara, ti hiiha owo onaphwaneleiye okhwa.
6 Awo aakhalano owerya wa owala erimu wi epula ehiruperu variyari va mahiku eneeraaya elaleerye mwa miririmu, nave aakhalano owerya wa otatuxa maahi okhala nikhami ni ophoreiha elapo ni ipahu sa mukhalelo woothene ntoko anachunelaaya.
7 Vaavaa eneeraaya ekwaase ovaha onamoona aya, mwaasinama awoopiha onakhuma mu nlici nawiixa* onanwana ekhoco ni yaawo nave onamwaavootha ni owiipha.
8 Miruchu saya inahaala okhala muramphani ya epooma etokweene yeeyo moosiphela eniichaniwa Sotoma ni Yikuputu, weiwo tho Pwiya aya iiphiweiyewo va mwiri woohooxiwavo.
9 Nave achu a maloko, mahimo, ilocelo ni ilapo soohiyanahiyana anamoona miruchu saya mu mahiku mararu ni emeya, nave awo hiyeemererya wi miruchu ihe ivithiwe mmahiyeni.
10 Nave yaawo anakhala veelaponi yavathi anamuhakalala ni opaka efesta wa nthowa na yaawo, nave enarwa evahana samahala mukina ni mukhwaawe, woona wi alipa a miririmu yaala eeli yaanaahooxa yaawo anakhala veelaponi yavathi.
11 Evinre mahiku mararu ni emeya, Muluku aahaaveerela yaawo miwiya sa okumi,* nave awo yaaheemela, nave yaawo yaawoonne yaatepa woova.
12 Anamoona yaale eeli yaahiiwa nsu noovuwa noorweela wirimu nlocaka ni yaawo: “Nwele nno.” Mwawiihiiha, yaawela wirimu muneekuni, nave amwiicani aya yaanawoona yaawo.*
13 Ewora ene yeele aaheereya mwaacikinye mutokotoko; makupa a neekhumi a epooma yaamora, achu macikhwi mathanu nameeli* yaahikhwa wa nthowa na mwaacikinye, nave oohalela yaakhala a woova nave emucicimiha Muluku a wirimu.
14 Otakhaliwa wanawiili woovira. Onani! Otakhaliwa waneeraru onnarwa mwawaakuveya.
15 Munkeelo aneethanu napiili aahoopa nipenka nawe. Nave yaahiiweya masu oovuwa wirimu, eriki: “Omwene wa veelaponi woothatuwa okhala omwene wa Apwiya ahu ni wa Kristu awe, nave owo onahaala olamulela ntoko mwene okhala wookhala.”
16 Asitokweene makhumi meeli nasese yaawo yaakiranthe mminyukhuni mwaya vamiithoni va Muluku yaakokhora ethipela iyuuci saya vathi nave emulapa Muluku,
17 eriki: “Ninnoothamalelaani nyuwo Yehova Muluku, Aikuru Soothene, yoowo ori ni yoowo aari, woona wi mookusa owerya wanyu otokweene nave moopacerya olamulela ntoko mwene.
18 Nyenya maloko aamalapo aananariwa, nave esara anyu yohoorweelaani, nave yoophiya elukuluku yoolakeleliwa wi alipa ookhwa ethorihiwe ni ochuweliwa akapuro anyu, alipa a miririmu, hiiha ntoko aweela murima ni yaale anoova nsina nanyu, akhaani ni atokweene, nave wi mwaatolose yaale anatolosa* elapo yavathi.”
19 Nipuro naweela na empa ya Muluku wirimu naahuliwa, nave aahooneya aarka a waataana wawe o nipuro naweela na empa awe. Waakhalavo overunya, masu, itari, mwaacikinye ni maralala matokweene.
Inoota
^ Naari: “ekopo yoophimano.”
^ 1.260
^ Mu Ekriki, “apismu.”
^ Naari: “munepa wookumi.”
^ Naari: “yaahiwoona yaawo.”
^ 7.000.
^ Naari: “mwaapahule yaale anapahula.”
