Yohani 17:1-26
17 Yesu aamanleiye oloca ichu seiha, aaviha miitho awe aweha wirimu, aloca ariki: “Tiithi, yoophiya elukuluku. Mmucicimihe mwaninyu, wi mwaninyu oocicimiheeni,
2 hiihaa ntoko mumvanhaanyu owerya wa waalamulela achu oothene, wi awerye waavaha okumi woohimala oothene yaale mumvanhaanyu.
3 Ekumi yoohimala ti ela, wi yoosuweleeni* nyuwaano Muluku mmoharu eeparipari, ni yoole mmurummaanyu, Yesu Kristu.
4 Kohoocicimihaani veelaponi yavathi, nave koomaliha muteko yoowo mukivanhaanyu wi kiphare.
5 Vano Tiithi, mukicicimihe vamiithoni vanyu, ni ncicimiho nenle kaaryaakano kiri ni nyuwaano, elapo ehaakumve okhala.
6 “Koosuweliha* nsina nanyu wa achu a mweelaponi mukivanhaanyu. Awo yaari awinyu, nto mukivaha nave awo anniiwelela* masu anyu.
7 Vano awo aasuwela wi ichu soothene mukivanhaanyu inarwa wa nyuwo;
8 ntakhara miyaano kohaaleela masu mukivanhaanyu, awo aheemererya nave chiryene aasuwela wi kirwiile ntoko oorummwa anyu, nave annaroromela wi nyuwaano mukirumme.
9 Kinnaavekelela yaawo; nkinavekelela elapo,* nyenya wa yaale mukivanhaanyu, ntakhara awo tawinyu;
10 ichu saka soothene ti sawinyu nave sawinyu ti saaka, nave koocicimihiwa vamiithoni vaya.
11 “Miyo nkiri tho mweelaponi, nto awo ari mweelaponi nave miyo kinarwa wa nyuwo. Tiithi aweela, mwaakhapelele yaawo wa nthowa na nsina nanyu, nenlo mukivanhaanyu wi awo ekhale amoha* hiihaa ntoko hiyaano nryaahu amoha.*
12 Vaavaa kaaryaaka ni yaawo, kaanawaakiha wa nthowa na nsina nanyu, nenlo mukivahilaanyu; kohaakhapelela yaawo, nave haavo mmoha a yaawo orimeenle,* voohikhala pahiru mwaana a otoloxiwa, wi soorepa saakhwanele.
13 Nto vano kinarwa wa nyuwo, nave kinaloca ichu seiha mweelaponi wi awo ekhaleno ohakalala wawaakhwanela yoowo kiryaakano.
14 Kohaavaha yaawo masu anyu, nyenya elapo ennawiica, ntakhara hanapaka makupa a elapo, hiihaa ntoko miyaano kihinapakaaka makupa a elapo.
15 “Nkinoovekaani wi mwaavihemo mweelaponi, nto wi nwaakiheke yaawo nthowa na oonanara owo.
16 Awo hanapaka makupa a elapo, hiihaa ntoko miyaano kihinapakaaka makupa a elapo.
17 Nweelihe yaawo* moorweela wa eparipari; masu anyu ti eparipari.
18 Hiihaa ntoko nyuwaano mukiruminhaanyu mweelaponi, miyo tho kinnaarumiha yaawo mweelaponi.
19 Kinniiseeliha wa nthowa na yaawo, wi awo tho ekhale aweeliheya moorweela wa eparipari.
20 “Nkinaavekelela yaalaru pahi, nyenya tho yaale anooniherya nroromelo mwa miyo moorweela wa masu aya,
21 wi awo oothene ekhale amoha, hiihaa ntoko nyuwo Tiithi, muryaanyu awiiwanana ni miyo nave miyo awiiwanana ni nyuwo, wi awo tho ekhale awiiwanana ni hiyo, wi elapo eroromele wi nyuwo mukirumme.
22 Kohaavaha ncicimiho nenlo mukivanhaanyu, wi awo ekhale amoha, hiihaa ntoko hiyo nryaahu amoha.
23 Miyo kikhale awiiwanana ni yaawo nave nyuwo awiiwanana ni miyo, wi awo ekhale awiiwanana mwawaakhwanela;* hiihaa elapo esuwele tho wi nyuwo mookiruma nave wi munnaasivela hiihaa ntoko munakisivelaanyu.
24 Tiithi, kinachuna wi yaale mukivanhaanyu, ekhale ni miyo weiwo kineeraaka kikhalewo, wi yoone ncicimiho mukivanhaanyu, ntakhara mwaakisivela ehaakumve opatuxiwa elapo.
25 Tiithi awookololowa, elapo chiryene hiyoosuwenleeni, nto miyo kihoosuwelaani, nave ala aasuwela wi nyuwo mukirumme.
26 Kohaasuweliha yaawo nsina nanyu nave kinarwa kisuweliha, wi osivela yoowo mwaakisivenlaanyuno okhale ni yaawo nave miyo kikhale awiiwanana ni yaawo.”
Inoota
^ Naari: “wi yoosuwelekeeni nyuwo.”
^ Naari: “Koolaleya.”
^ Naari: “annachariha.”
^ Naari: “nkinaavekelela achu a mweelaponi.”
^ Naari: “awiiwanana.”
^ Naari: “awiiwanana.”
^ Naari: “otoloxiwe.”
^ Naari: “Mwaavalaanye awo; Nweerihe okhala awela.”
^ Naari: “wi ekhale tho amoha mwawaakhwanela.”
