Yohani 3:1-36
3 Aakhalavo mulopwana a nikhuuru na Afarisi nsina nawe Nikotemu, yoowo aari mmoha a asitokweene a Ayuta.
2 Ola aaya wa Yesu ohiyu, alocano ariki: “Rapi, noosuwela wi nyuwaano mwa muhusiha oorweela wa Muluku, ntakhara haavo mukina onawerya weera ineneeryo* seiho muneeraanyuno Muluku ahiri mwa yoowo.
3 Yesu aamwaakhula ariki: “Mweeparipari kinnooleela wi, muchu aahiyariwa wanaawiili,* hawerya woona Omwene wa Muluku.”
4 Nikotemu aamukoha ariki: “Muchu oni awerye hai oyariwa uuluvanle? Apwanne onanwerya ovolowa mmirimani mwa amama awe wi ayariwe wanaawiili?”
5 Yesu aamwaakhula: “Mweeparipari kinnooleela wi, muchu aahiyariwa moorweela wa maahi ni munepa, hawerya ovolowa mu Omwene wa Muluku.
6 Yooyariwa mwa mwiili, ti mwiili, nave yooyariwa mwa munepa, ti munepa.
7 Ohitikhine nthowa na wooleela wi: Nyuwo munnaphwanela oyariwa wanaawiili.
8 Echeku enoopela weiwo enachunaayawo, nave nyuwo munniiwa oruma waya, nyenya hamunasuwela enarwaayawo naari mano enayaayawo. Ti hiihaa tho ni oothene yaale anayariwa mwa munepa.”
9 Mwawiihiiha, Nikotemu aamukoha: “Ichu seiha sinaweryeya hai?”
10 Yesu aamwaakhula ariki: “Weyaano wa muhusiha a Isarayeli, nave nlelo honasuwela ichu seiha?
11 Mweeparipari kinnooleela wi, hiyo nnaloca yeeyo nnasuwelaahu, nave ninneerela onamoona yeeyo nonnaahu, nyenya nyuwo hamuneemererya onamoona nnavahaahu.
12 Wakhala wi hamuneemererya kooleelakaani ichu sa veelaponi yavathi, muni mweemererye hai kooleelaani ichu sa wirimu?
13 Ohiya yeeyoru, haavo muchu owenle wirimu, voohikhala yoole okhurunwe wirimu, Mwaana a muchu.
14 Nave, ntoko Mose aathomen’yeiye enowa mutakhwani, hiihaa tho Mwaana a muchu onaphwanela othomeiwa,
15 wi oothene yaale anamweemererya yoowo, ekhaleno ekumi yoohimala.
16 “Vawi Muluku aatepa osivela elapo ophiyerya omvaha Mwanawe ooyariwa meekheiye, wi oothene yoole onamuroromela ahitoloxiwe, nto akhaleno ekumi yoohimala.
17 Tiwi, Muluku haamuruminhe Mwanawe veelaponi wi owo athorihe elapo, nyenya wi elapo evuluxiwe moorweela wa yoowo.
18 Yoole onamuroromela yoowo hathorihiwa. Nto yoole ohinamuroromela yoowo oothorihiwa, woona wi haroromenle mu nsina na Mwaana ooyariwa meekheiye a Muluku.
19 Vano, mathipelo a othorihiwa taala: Omwaleela waarwa veelaponi, nto achu yaasivela epiiphi ohiya omwaleela, woona wi miteko saya saari sootakhala.
20 Vawi, yoole oneerano soonanara onniica omwaleela, nave hanaacamela omwaleela wi miteko sawe sihooneyeke.*
21 Nto yoole oneerano yeeyo eri yeeparipari onnaacamela omwaleela, wi miteko sawe sooneyeke vanlakani wi oneerano mwawiiwanana ni yookhwela ya Muluku.”
22 Evinre yeela, Yesu ni oohuserya awe yaaya muceche wo Yuteya; weiwo, aamaliha elukuluku ari ni yaawo nave aanapatisa.
23 Yohani tho aanapatisa o Ayenoni waacamela elapo yo Salimu, ntakhara yaahaacawo maahi, nave achu yaanaya wa yoowo, enapatisiwa;
24 woona wi elukuluku yeeyo, Yohani eera ahaakumve owaleliwa mukariposo.
25 Vano oohuserya a Yohani yaavaanyihana ni Muyuta mmoha vooloca sa weelihiwa.
26 Voocharela, awo yaaya wa Yohani elocano eriki: “Rapi, mulopwana yoole aari ni nyuwaano okhopela wa Yortano, yoole mwaamweerenlaanyu onamoona, onnapatisa nave achu oothene annaya wa yoowo.”
27 Yohani aawaakhula: “Muchu hanawerya waakhela echu emoharu mano, voohikhala wi ovahiwe orweela wirimu.
28 Nyuwo aneene mwa anamoona a yeeyo kaaloncaaka wi: ‘Kristu tahi yoomi, nyenya kirummwale ohoolo wawe.’
29 Yoowo orino mulipa ootheliwa ti mulipa oothela. Nto nthamwene a mulipa oothela akhala vakhiviru nave anamwiiwa alocaka, onnatepa ohakalala nthowa na wiiwa nsu na mulipa oothela. Mwawiihiiha, ohakalala waka wohaakhwanela.
30 Owo onnaphwanela otitelela waaceereryeya, nave miyo kivukuweke.”
31 Yoole onarwa osulu onnaapwaha akina oothene. Yoole ori a veelaponi yavathi ta veelaponi yavathi nave onaloca ichu sa veelaponi yavathi. Yoole onarwa wirimu onnaapwaha akina oothene.
32 Owo onneerela onamoona wa ichu soothene onneiye ni iiwaleiye, nto haavo oneemererya onamoona awe.
33 Yoole oneemererya onamoona awe onnahela eneneeryo awe* wi Muluku teeparipari.
34 Woona wi yoole orummwale ni Muluku, onaloca masu a Muluku, vawi Yoowo hanamvaha munepa moohaakhwanela.*
35 Tiithi onnamusivela Mwaana nave oomunnyererya ichu soothene mmatani mwawe.
36 Yoole onamuroromela Mwaana, ookhalano ekumi yoohimala; yoole ohinamwiiwelela Mwaana harwa oona ekumi, nyenya esara ya Muluku enamutitelela okhala mwa yoowo.
Inoota
^ Naari: “sootikhiniha.”
^ Naari akhweya: “aahiyariwa orweela osulu.”
^ Naari: “ihivaanyiwe.”
^ Naari: “onnacicimiherya; onnooneiha.”
^ Naari: “amphimelelaka.”
