Yupu 26:1-14
26 Yupu aahaakhula:
2 “Chiri moomukhaviherya yoole ohirino ikuru!
Chiri moomvuluxa yoole orino miwono sooceecheya!
3 Mootepa omvaha miruku yoole oothoiwa miruku!
Mmusuwelihaka mookwakwaleya* miruku sanyu soophara muteko!*
4 Taani muneereryaanyu olocano,Nave taani ooveerenleeni oloca ichu seiha?*
5 Yaale ahirino owerya mookhwani annathukumela;Awo ari vathi va ephareya ni wa soothene inakhala mummo.
6 Mahiye* ari eepwitikiri ene vamiithoni va Muluku,*Nave nipuro na otoloxiwa* hinikhuneeliwe.
7 Owo ohaatela erimu vasiiyoni vene,Oothomeya elapo ehiphareliwe;
8 Owo onnamaka maahi mmeekuni,Nave meeku hanaphuleya ni olimela waya;
9 Owo onnakhuneela munyukhu awe,Iipithihaka yoowo nneeku.
10 Owo oohelavo munlaano variyari va erimu ni ephareya;Oohelavo munlaano variyari va omwaleela ni epiiphi.
11 Apoco a wirimu annathukumela;Annoopopiheya nthowa na osamela wawe.
12 Owo onnacikinya ephareya ni ikuru sawe,Nave onnamunyaanya mwaaxinama mutokweene amphareya* ni osuwela wawe.
13 Ni nwiya* awe, owo onnavela erimu;Ntata nawe noonyoka enowa yaachawa.
14 Onani! Iha pahi mixerexere sa iphiro sawe;Yeeyo niiwalaahu vooloca sa yoowo nniiwa tonto!
Vano taani onawerya wiiwexexa oruma otokweene wa etari awe?”
Inoota
^ Naari: “mwawaaca.”
^ Naari: “osuwela wanyu.”
^ Mu Ehepiri, “Nave nwiya (munepa) yoowo okhumme mwa nyuwo waari wawani?”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Mu Ehepiri, “vawe.”
^ Naari: “Nave Apiton.”
^ Mu Ehepiri, “Rapi.”
^ Naari: “echeku.”
