1. ¿Akinon okichijchiuj nochi tlen yoltika?

JEHOVÁ yejua “melauak Dios niman yejuan nochipa nemi”, okijto Pablo (1 Tesalonicenses 1:9). Yejua okichijchiuj nochi tlen yoltika. Ijkon okijtokej sekimej iluikaktekitkej: “Tejua nochi tlajtlamach otiktlalij niman ken tejua otiknek otikintlalij niman onokej” (Apocalipsis [Revelación] 4:11). Noijki ijkuak Pablo okontlajkuilouili Timoteo okijli ika “Dios yejuan kimaka nemilistli nochi tlen yoltikaj” (1Timoteo 6:13). Kuakon, nemilistli se tetlayokolijli tlen ualeua itech toTajtsin.

2. ¿Tlenon kichiua toTajtsin niman ijkon kuajli matinemikan?

² Noijki, Jehová kichiua matiyoltokan (Hechos 17:28). Yejua techmaka tlakuajli, atl, ajakatl tlen ika tijyotiaj, niman otechmakak tlaltikpaktli kampa tichantij (xpoua Hechos 14:15-17). Niman kichiua pampa kineki matiyolpakikan. San ika, tla tiknekij melak tiyolpakiskej ipan tonemilis, noneki tikixmatiskej itlanauatiluan toTajtsin niman tikintlakamatiskej (Santiago 1:25).

3. ¿Tlenon okichiuj toTajtsin ijkuak okimiktijkej Abel?

³ ToTajtsin kineki matiktlasojkaitakan tonemilis niman innemilis oksekimej. Xtlanemili itech yejuin. Caín, ikoneuj Adán iuan Eva, melak okualan iuan ikniuj Abel. Jehová okijli ika pampa melak kualaniya ueliskia kichiuas se ueyi tlajtlakojli, san ika, Caín xotlakak niman okimikti ikniuj (Génesis  4:3-8). Biblia kijtoua ika pampa otemikti, Jehová xokikauili Caín kuajli manemi (Génesis 4:9-11).

4. Ipan tlanauatiltin tlen Jehová okimakak Moisés, ¿kenon okiteititi itech ken noneki matikitakan nemilistli?

⁴ Melak miyek xiuitl sakin, Jehová okinmakak israelitas tlanauatiltin kampa okimijli kenon kineki makitekichiuilikan. Pampa okimaktili teotlajtoketl Moisés, yejon tlanauatiltin okintokayotijkej: Tlanauatijli tlen okimakakej Moisés. Jesús okiteneuj yejon tlanauatijli ijkuak okijto: “Ma ka titemiktis” (Mateo 5:21). Itech tlen toTajtsin xokinkauili makichiuakan israelitas okiteititi ika kitlasojkaita nemilistli. Tinochimej noneki tiktlasojkaitaskej innemilis oksekimej.

5. ¿Kenon noneki tikitaskej ijkuak se siuatl kitlajkali ikoneuj akin xiuajtlakati?

⁵ Niman, ¿tlenon kinemilia toTajtsin itech kokonej akin ok nemij ijtik inminan? Ipan Tlanauatijli tlen okimakakej Moisés kijtouaya ika xkipiaya nomiktis se akin ok xiuajtlakati. Kema ijkon: Jehová noijki kitlasojkaita yejon nemilistli (xpoua Éxodo 21:22, 23; Salmo 127:3). Yejon kijtosneki ika xkuajli ijkuak se siuatl kitlajkali ikoneuj.

6. ¿Tleka xkipiya ika tikintlauelitaskej oksekimej?

⁶ Tla tiknekij tiktlasojkaitaskej nemilistli, noijki noneki kuajli matikimitakan oksekimej. Ipan Biblia kijtoua: “San akinon yejuan kitlauelita ikniu, yejua se temiktijketl ipan iyojlo. Niman nemejuamej nenkimatstokej ika xakaj yejuan temiktijketl kipia yenkuik nemilistli yejuan para nochipa” (1 Juan 3:15). Tla tiknekij nochipa tinemiskej, kipiya ika tijkixtiskej itech toyojlo nochi tlauejli tlen tikmachiliaj itech oksekimej. Pampa tla titetlauelitaj, ompa ualeua nochi tlen xkuajli uelis tikchiuaskej (1 Juan 3:11, 12). Melak noneki matiuelikan matotlasojtlakan iuan oksekimej.

7. ¿Kenon tikteititiskiaj ika xtiktlasojkaitaj tonemilis?

⁷ ¿Niman kenon tikteititiaj ika tiktlasojkaitaj tonemilis? Maski xakaj kineki mikis, miyekej kichiuaj tlen xkuajli niman kauilmatij innemilis san pampa kinekij nopaktiskej. San xkonemili, miyekej tlachichinaj noso pokij niman  kitekitiltiaj drogas, ken marihuana. Nochi yejuin kijtlakoua tonemilis niman kemantika hasta temiktia. Kuakon, akin kichiua nochi yejuin xkitlasojkaita inemilis. Ixpan toTajtsin, yejon melak xkuajli noso tsokuiltik (xpoua Romanos 6:19; 12:1; 2 Corintios 7:1). Tla tiknekij tiktekichiuiliskej ken yejua kineki, noneki tijkakauaskej nochi yejuin. Kanaj tikitaskej melak ouijtika, san ika Jehová techpaleuis. Yejua kitlasojkaita nochi tlen tikchiuaj ijkuak tikitaj tonemilis ken noneki: se tetlayokolijli tlen yejua yotechmakak.

8. ¿Tleka noneki nochipa matikitstokan ika maka tokokoskej noso titekokoskej?

⁸ Tla tiktlasojkaitaj tonemilis, nochipa tikitaskej maka itlaj topan manochiua nion maka matokokokan. Tikitaskej nochipa kuajli maonia tlen tiktekitiltiaj niman xsan tikauilmatiskej tonemilis. San kualtsin tiknejnemiltiskej se carro niman xtauiltiskej kampa uelis tikpoloskej tonemilis (Salmo 11:5). Se Tlanauatijli tlen Jehová okinmakaka israelitas kijtouaya: “Tla tikchijchiuas se yenkuik kajli, kuakon kipiya ika tiktlalilis se tepantli ikuatipan, niman ijkon maka nenkipiyaskej tlajtlakojli pampa yakaj ompa uajuetsis” (Deuteronomio 22:8). Yejon tlanauatijli kipiya se tlajtojli tlen ika timoyekanas. Se neskayotl, tla mokal kipiya escaleras, xkita nochipa kuajli maonia niman ijkon maka yakaj ompa mauetsiki niman manokoko. Tla tikpiya se carro, xkita nochi kuajli maonia. Maka xtekauili itlaj xkuajli manochiua mochan, noso tla tikpiya carro, maka itlaj makipolo pampa uelis timokokos noso tikinkokos oksekimej.

9. Tla tiktlasojkaitaj nemilistli, ¿tlenon xtikinchiuiliskej yolkamej?

⁹ ¿Kenon kita toTajtsin innemilis yolkamej? Noijki kintlasojkaita. Yejua tekauilia makinmiktikan yolkamej tla kinkuaskej, tla ika notlakentiskej noso tla itlaj kinekij kinchiuiliskej (Génesis 3:21; 9:3; Éxodo 21:28). San ika, akin kintlajyouiltia yolkamej noso kinmiktia san pampa kuelita kichiuas, kichiua tlen xkuajli niman kiteititia ika xkitlasojkaita nemilistli (Proverbios 12:10).

10. ¿Kenon okiteititi toTajtsin ika nemilistli iuan yestli san sekan onka?

¹⁰ Ijkuak Caín okimikti Abel, Jehová okijli: “Iyesyo mokniuj tlen otoyauj ipan tlajli nechuajtsatsilijtika” (Génesis 4:10). Ijkuak toTajtsin okiteneuj iyesyo Abel, tlajtotoya itech inemilis. Caín yokimiktijka ikniuj, niman aman Caín xok kikauiliskiaj kuajli manemi. Kentla iyesyo noso inemilis Abel, kitlajtlanilitoskia Jehová maka san ijkon manokaua. Ijkuak yopanoka Apachiuilistli ipan itonaluan Noé, oksejpa ones kenon noneki noitas nemilistli iuan yestli. Ijkuak xipanouaya Apachiuilistli, tlaltikpakchanejkej kikuayaj tlakilyotl, kijli niman tlakilyomej tlen yokiuatskaj. San ika, sakin onopatlak. Jehová okijli Noé iuan ikoneuan: “Nochi yolki tlen yoltika uelis nenkikuaskej”. San ika, toTajtsin okimijli yejuin: “San nakatl iuan inemilis —iyesyo— maka nenkikuaskej” (Génesis 1:29; 9:3, 4). Kuajli nesi ika itech Jehová, nemilistli iuan yestli san sekan onka.

11. ¿Tlen tlanauatijli yokijtoka toTajtsin itech yestli ne ipan itonaluan Noé?

¹¹ Tla xtijkuaj yestli, tikteititiaj ika tiktlasojkaitaj. Ipan tlanauatijli tlen Jehová okinmakak israelitas, okinnauati: “Tla se israelita [...] ijkuak kajsi se yolki noso se tototl tlen uelis nokuas, kuakon kipiya ika kitoyauas iyesyo niman kitlalpachos. Pampa [...] nejua onikimijli israelitas: ‘Nion se yolki maka nenkikualiskej iyesyo [...]’” (Levítico 17:13, 14). Yopanoka kanaj ochocientos xiuitl ijkuak Jehová okijli Noé maka manokua iyesyo yolkamej. San ika, yejuin tlanauatijli xnopatlaya. Kuajli nesiya tlen Jehová kinemiliaya: itekipanojkauan ueliskiaj kikuaskej innakayo yolkamej, san ika, inyesyo ka. Nonekiya kitoyauaskej, tlen kijtosnekiya kentla oksejpa kikuepiliskiaj toTajtsin inemilis yolkatl.

12. ¿Katlejua tlanauatijli itech yestli okinmakak toTajtsin itlatitlankauan Jesús, tlen aman noijki noneki matiktlakamatikan?

¹² Akin tikchiuaj ken Cristo noijki yotechmakakej se tlanauatijli. Itlatitlankauan Jesús niman oksekimej tlakamej akin  tlayekanayaj ijkuak yomijka Jesús, onosentlalijkej niman ompa okijtokej tlen tlanauatijli nonekiya kitlakamatiskej nochimej akin kichiuaj ken Cristo. Yejuin tlen okijtokej: “On Espíritu Santo okinemilij niman tejuamej no otiknemilijkej ika kuajli yes para xitlaj okse más tlamamajli temechmakaskej, yej san yejua in tlajtlamach tlen más polijtikaj: Ma ka xkuakan innakayo on yolkej yejuan yokinuenchijkej intech on tlamachijchijualtin tetajtsitsiuan; no ijki ma ka xkuakan yestli nion innakayo on yolkej yejuan san nokechmiktiaj, niman ika ma ka yakaj auilnemis” (Hechos 15:28, 29; 21:25). Kuakon, noneki ‘maka matijkuakan yestli’. Ixpan toTajtsin, melak xkuajli ijkon ken ijkuak se kinueyichiua tajtsitsintin niman auilnemi.

13. ¿Ika tlen neskayotl tikasikamatij ika noijki xkuajli matotlalilikan yestli?

¹³ Itech tlanauatijli kampa kijtoua maka matijkuakan yestli, ¿kijtosneki noijki maka matotlalilikan? Kema. Matitlanemilikan itech yejuin. Tla se tlapajtiketl techijlia maka matikonikan alcohol, ¿kijtosneki ika tla xtikonij kema uelis totlaliliskej ipan totlaluayouan? Ka. Noijki ijkon, tla xtijkuaj yestli noijki kijtosneki maka matotlalilikan. Tla tiknekij tiktlakamatiskej yejon tlanauatijli, kuakon maka matokauilikan matechtlalilikan yestli.

14, 15. Tla tlapajtikej kijlia se akin kichiua ken Cristo ika noneki makitlalilikan yestli, ¿tlenon kichiuaskia niman tleka?

¹⁴ San ika ¿tlenon panos tla se akin kichiua ken Cristo melak nokokoua noso noneki makitekikan tlapajtikej? Matiknemilikan ika tlapajtikej kijliaj ika tla xnotlalilis yestli, mikis. Tikmatstokej ika yejua xkineki mikis. Pampa xkineki kipolos inemilis tlen toTajtsin yokitlayokoli, kinekiskia makichiuilikan okseki tlemach kampa maka makitekitiltikan yestli. Ika yejon, yejua kitejtemoskia makichiuilikan yejuin tla onka.

¹⁵ Se akin kichiua ken Cristo, ¿xkitlakamatiskia itlanauatil toTajtsin pampa kinekis nemis okseki tonaltin? Jesús okijto:  “Yejuan kinekis kimakixtis inemilis ipan in tlaltikpaktli, kipolos ialma [inemilis], pero yejuan san nopampa kipolos inemilis ipan in tlaltikpaktli, yejua kiselis nemilistli” (Mateo 16:25). Xakaj kineki mikis. San ika, tla xtiktlakamatij itlanauatil toTajtsin san pampa tiknekij timakisaskej, uelis tikpoloskej nemilistli tlen xkeman tlamis. Kuakon, melak kuajli tla tiktlakamatij itlanauatil toTajtsin, pampa san ijkon kuajli tonkisaskej. Uelis kuajli tikmatstoskej ika tla timikij, Akin temaka nemilistli techilnamikis ijkuak kinyolitis akin yomijkej niman oksejpa techmakas tonemilis (Juan 5:28, 29; Hebreos 11:6).

16. ¿Tlenon yokinemilijkej kichiuaskej itekipanojkauan toTajtsin ika yestli?

¹⁶ Itekipanojkauan toTajtsin kuajli yokinemilijkej kitlakamatiskej yejuin tlanauatijli itech yestli. Ika yejon, xkikuaj yestli nion xkiseliaj ika makinpajtikan. * Kuajli kimatstokej ika akin okichijchiuj yestli kimatstika tlenon noneki makichiuakan. ¿Noijki ijkon titlanemilia?

17. ¿San kenon toTajtsin okinkauili israelitas makitekitiltikan yestli?

¹⁷ Ipan Tlanauatijli tlen okimakakej Moisés kuajli okijto san kenon notekitiltis yestli. Ijkuak Jehová okimijli israelitas kenon nonekiya makiueyichiuakan okimijli: “Nemilistli  onka ipan yestli, niman nejua yoniktemakak [yestli] tlaixpan nemopampa niman ijkon notlapachoskej nemotlajtlakoluan, pampa yejon yestli kitlapachoua tlajtlakoltin” (Levítico 17:11). Ijkuak israelitas tlajtlakouayaj, ueliya kintlapopoluiayaj tla kitemakayaj se yolki niman kitkiyaj iyesyo itlaixpan tabernáculo noso, sakin, ipan teopan. San ijkon nonekiya notekitiltis yestli.

18. ¿Kenon uelis techpaleuis pampa Jesús okitoyauj iyesyo?

¹⁸ Akin melauak kichiuaj ken Cristo xkipiya ika kitlakamatiskej Tlanauatijli tlen okimakakej Moisés. Kuakon, xkinuentlaliaj yolkamej nion xkitlaliaj yestli ipan se tlaixpan (Hebreos 10:1). San ika, ken israelitas kitekitiltiayaj yestli san kijtosnekiya uentli tlen kitemakaskia sakin iKoneuj toTajtsin, Jesucristo. Ken otomachtijkej ipan capítulo 5, Jesús okitemakak inemilis topampa ijkuak okitoyauj iyesyo  niman okitemakak kentla se uentli. Sakin oyaj iluikak niman toTajtsin okiseli tlen Jesús okichiuj (Hebreos 9:11, 12). Ijkon okichiuj matechtlapopoluilikan totlajtlakoluan niman ika tlen okichiuj uelis tikseliskej nemilistli tlen xkeman tlamis (Mateo 20:28; Juan 3:16). Kuajli tikmatstokej ika ken onotekitilti yestli melak yotepaleui (1 Pedro 1:18, 19). San timakisaskej tla titlaneltokaj itech tlen Jesús okichiuj ika iyesyo.

19. ¿Tlenon noneki tikchiuaskej niman ijkon xtikpiyaskej tlajtlakojli tla yakaj popoliui?

¹⁹ ¡Melak tiktlasojkamachiliaj toTajtsin pampa otechmakak tonemilis! Tla tiktlasojkamatij, kipiya ika techyolmapeuas matikimijlikan oksekimej ika tla tlaneltokaj itech tlen Jesús okichiuj, uelis nemiskej nochipa. Niman tikchiuaskej ika nochi toyojlo, pampa ijkon ken Jehová, tiktlasojkaitaj innemilis oksekimej (xpoua Ezequiel 3:17-21). Tla tikchiuaj yejuin tekitl tlen noneki matikchiuakan, uelis tikijtoskej ijkon ken Pablo: “Nejua xok nikpias tlajtlakojli tla yakaj ixpoliuis [popoliuis], pampa yonemechpantlantilij nochi on kech itetlakanonotsalis [itlajtolpaleuilis] Dios” (Hechos 20:26, 27). Kema ijkon, tla tikinnojnotsaj oksekimej itech toTajtsin niman itech tlen kineki kichiuas, tikteititiaj ika tiktlasojkaitaj nemilistli niman yestli.