Tlen okijkuilo Juan 5:1-47
5 Ijkuak yopanoka yejuin, judíos oiluichijkej, niman Jesús oyaj Jerusalén.
2 Ne Jerusalén nisiuj Puerta itoka Borregos, onka se tanque tlen ika hebreo itoka Betzata, niman kipiya makuijli icorredor.
3 Ompa onoyaj* miyekej akin kualouayaj, xtlachiayaj, xueliyaj nejnemiyaj niman akin ipan intlalnakayo kipiayaj itlaj tlen xueliyaj koliniayaj.
4 ——
5 Niman ompa nemiya se tlakatl akin youejkajka 38 años ika kualouaya.
6 Pampa Jesús yekimatstoya ika yejon tlakatl akin ompa onoya, youejkajka ika kualouaya, ijkin okitlajtolti: “¿Tikuelitaskia tipajtis?”.
7 Yejon tlakatl akin kualouaya ijkin okinankili: “NoTeko, xyakaj nikpiya akin manechkalaki ijtik tanque ijkuak atl koxoni, nochipa ijkuak nikneki nonkalakis, yakaj nechpanauiya niman achto ontemoua”.
8 Jesús ijkin okijli: “¡Xmokuiteua! Xkajkokui motlapech niman xpeua xnejnemi”.
9 Yejon tlakatl nimantsin opajtik, okajkouk itlapech niman opeuj nejnemi.
Katka sábado ijkuak ijkon opanok.
10 Kuakon judíos opeuj ijkin kijliaj on tlakatl akin okipajtijkej: “Aman sábado. Xuelis tikitkitinemis yejon tlapechtli”.
11 Pero yejua ijkin okinnankili: “On tlakatl akin onechpajti ijkin onechijli: ‘Xkajkokui motlapech niman xpeua xnejnemi’”.
12 Yejuamej okitlajtoltijkej: “¿Akinon yejon tlakatl akin omitsijli ‘Xkajkokui motlapech niman xpeua xnejnemi’?”.
13 Pero yejon tlakatl akin okipajtijkaj xkimatiya, pampa Jesús yononelojka imiuan akin ompa nemiyaj.
14 Satepan, Jesús okinamik ne ipan templo niman okijli: “Xkita, yotipajtik. Maka sa xtlajtlako para maka mopan nochiuas tlen más xkuajli”.
15 Yejon tlakatl oyaj niman okimijlito judíos ika Jesús yejua akin okipajtijka.
16 Yejua ika, judíos opeuj kixnamikij Jesús pampa kichiuaya nochi yejuin ijkuak katka sábado.
17 Pero yejua kinnankiliaya: “NoTaj hasta aman tekititika, niman nejua noijki xnikajkaua ika nitekiti”.
18 Ipampa yejon, judíos nokojtiliayaj más kitejtemoskej kenijki kimiktiskej, pampa xkitlakaitaya sábado niman noijki pampa kijtouaya ika toTajtsin yejua iTaj. Ijkon, kijtojtoskia kentla san noijki yeskia ken toTajtsin.
19 Pero, Jesús ijkin okimijli: “Melauak nimechijlia ika teKoneuj xueli itlaj kichiua san pampa kineki, san kichiua tlen kita ika kichiua iTaj. Pampa nochi tlen kichiua Tajtli, teKoneuj noijki ijkon kichiua.
20 Pampa Tajtli kitlasojtla teKoneuj niman kititia nochi tlen yejua kichiua, niman kititis tlen más ueyi para nemejuamej xmojkatlachiakan.
21 Pampa ijkon ken Tajtli kinyolitia* akin yomikkej niman kinmaka nemilistli, teKoneuj noijki kimaka nemilistli akin yejua kineki kimakas.
22 Pampa Tajtli xakaj kitlajtlakolmaka, yejon tekitl yokimaktili iKoneuj,
23 para nochimej makitlakaitakan teKoneuj ijkon ken kitlakaitaj Tajtli. Akin xkitlakaita teKoneuj noijki xkitlakaita Tajtli pampa yejua akin okuajtitlan.
24 Melauak nimechijlia ika akin kinkaki notlajtoluan niman tlaneltoka itech akin onechajtitlan, kipiya nemilistli tlen xkeman tlami niman xkitlajtlakolmakaskej, yeskia kentla tla yomikka niman aman oksejpa kipiya nemilistli.
25 ”Kuajli nimechijlia ika uajlauj* on hora, maski aman yoyejkok, ijkuak akin yomikkej kikakiskej itlajtol iKoneuj toTajtsin, niman akin otlakakkej nemiskej.
26 Pampa, ijkon ken Tajtli kipiya poder para kitemakas nemilistli, noijki yokikauili iKoneuj makipiya poder para kitemakas nemilistli.
27 Niman yokikauili matetlajtlakolmaka, pampa yejua iKoneuj Tlakatl.
28 Maka mamechmojkatlachialti yejuin, pampa uajlauj on hora ijkuak nochimej akin nemij ipan intlalkon kikakiskej itlajtol
29 niman uajkisaskej: akin okichijkej tlen kuajli kinyolitiskej para kinmakaskej nemilistli, niman akin okichijkej tlen xkuajli kinyolitiskej para kintlajtlakolmakaskej.
30 Nejua xueli nikchiua itlaj san pampa nikneki. Nitetlajtlakolmaka ipampa tlen nikaki niman nitetlajtlakolmaka ijkon ken kinamiki, pampa xniktejtemoua nikchiuas tlen nejua nikneki, niktejtemoua nikchiuas tlen kineki akin onechajtitlan.
31 ”Tla san nejua nikijtoskia ika niiKoneuj toTajtsin, xkineltokaskiaj tlen nikijtoua.
32 Pero nemi okse yakaj akin kiteijlia ika niiKoneuj toTajtsin, niman nikmatstok ika melauak tlen yejua notech kiteijlia.
33 Nemejuamej yonenkintitlankej sekimej tlakamej para makitlajtoltitij Juan, niman yejua melauak tlen yokijto.
34 Nejua xnoneki ika yakaj manechpaleui ika tlen kijtoua, pero nikijtoua nochi yejuin para nemejuamej xmakisakan.
35 Yejon tlakatl katka se lámpara tlen tlikuitoya* niman petlaniya, niman nemejuamej san achijtsin tiempo onenkinekkej nenyolpakiskej ika itlauil.
36 Pero tlen nejua nikpiya más ueyi kijtosneki xijkon ken tlen Juan okijto, pampa tlen noTaj onechnauati manikchiua kiteititia ika Tajtli yejua akin onechajtitlan.
37 NoTaj, akin onechajtitlan san no yejua yokijto ika nejua niiKoneuj. Nemejuamej xkeman nenkikakij itlajtol nion xkeman nenkitaj,
38 niman itlajtol xonka ipan nemoyojlo pampa xnenkineltokiliaj akin yejua okuajtitlan.
39 ”Nemejuamej kuajli nemomachtiaj Tlajkuiloltin pampa nenkinemiliaj ika yejon mechpaleuis nenkipiyaskej nemilistli tlen xkeman tlami; niman yejon tlen nemomachtiaj kiteititia ika nejua niiKoneuj toTajtsin.
40 Maski ijkon, nemejuamej xnenkinekij notech nenuajlaskej para nenkipiyaskej nemilistli.
41 Nejua xnikneki ika oksekimej manechueyiteneuakan.*
42 Pero, nejua nikmatstika ika nemejuamej xnenkitlasojtlaj toTajtsin.
43 Nejua oniuajla ipampa itoka noTaj niman nemejuamej xnennechseliaj. Pero, tla yakaj okse uajlaskia ipampa itoka, yejua kema nenkiseliskiaj.
44 ¿Kenijki uelis nennechneltokiliskej nemejuamej, akin san nenkinekij ika oksekimej mamechueyiteneuakan* niman xnenkitejtemouaj kenijki san toTajtsin nenkiyolpaktiskej?*
45 Maka xnemilikan ika nikijlis noTajtsin nochi tlen yonenkichijkej. Moisés yejua akin kijlia, akin nemejuamej itech nentlaneltokaj.
46 Tla nenkineltokiliskiaj Moisés, nejua nennechneltokiliskiaj, pampa yejua onechteneuj ijkuak otlajkuilo.
47 Pero, tla xnenkineltokaj tlen okijkuilo, ¿kenijki uelis nenkineltokaskej tlen nejua nikijtoua?”.
Notas
^ Noso “temiyaj”.
^ Ika griego kijtoua “kinkuiteua”.
^ Noso “uits”.
^ Noso “xotlatoya”.
^ Ika griego kijtoua “ueyilistli”.
^ Ika griego kijtoua “ueyilistli”.
^ Ika griego kijtoua “ueyilistli”.
