Felisa: Oninoskalti España niman nochanejkauan católicos katkaj. Trece nochanejkauan curas katka noso tekitiyaj ipan teopan. Se katka iprimo nonan niman temachtiaya ipan se kaltlamachtijli itech religio católica. Ijkuak omik, papa Juan Pablo II okichiuj santo. Nochanejkauan xkipiaya tlen ika nopanoltiskej. Notaj tekitiya kampa kinchijchiuayaj tlemach ika tepostli niman nonan noijki noneki tekitis. Nejua kachtopa onen itech chikueyi nokniuan.

Ijkuak nikpiaya 12 xiuitl, opeuj se guerra civil ipan España, niman ijkuak otlan, tekiuajkej okitsajkej notaj pampa onokalakti ipan política. Kuakon nonan melak ouijtika kitaya techtlakualtis tinochimej. Ika yejon yeyimej nokniuan okintitlan ipan se convento, kampa nochiua tekitl itech teopixkej, ipan ueyi kalpan Bilbao. Ompa, Araceli, Lauri niman Ramoni kipiyaskiaj tlen kikuaskej.

Araceli: Ijkuak otechtitlankej ipan convento, nejua nikpiaya 14 xiuitl, Lauri kipiaya 12 niman Ramoni kipiaya 10. Ompa monjas otechnauatijkej matitlachipauakan. Opanok ome xiuitl sakin otechtitlankej ipan okse convento melak ueyi ipan Zaragoza, kampa kintlajpiyaj ueuentsitsintin. Ompa titlachipauayaj ipan cocina niman nochipa tisiauiyaj ijkuak titlamiyaj. Noijki melak tajmanayaj pampa xtinemiyaj iuan tochanejkauan.

Felisa: Ijkuak nokniuan oyajkej ipan convento tlen onka Zaragoza, notaj iuan notío okinemilijkej nechtitlaniskej kampa yejuamej nemiyaj. Notío katka se teopixki. Yejua iuan nonan kinekiyaj nechkaualtiskej se telpochtli akin nechuelitaya. Nejua nechyolpaktia ninemis ipan convento pampa niktlasojtlaya toTajtsin. Niaya mojmostla misa niman hasta niknekiya ninochiuas misionera, ijkon ken se noprimo akin nemiya África.

 Ipan convento xkuajli ninomachiliaya pampa xueli nikchiua tlen yoniknemilijka. Monjas xkeman onechyolchikaujkej maniktekichiuili toTajtsin ipan okse país, ijkon ken nejua niknekiya. Ijkuak yopanok se xiuitl, oninokuep nochan pampa nonekiya niktlajpiyas notío, akin cura katka. Nikpaleuiaya ipan ichan. Nochi teotlak tikijtouayaj san sekan rosario. Nejua nikuelitaya nikyektlalis xochitl tlen notlalia ipan teopan niman nikintlakentis santos niman tlen kineskayotia virgen.

Araceli: Ijkuak ninemiya ipan Zaragoza, onikijto ika nikchiuas tlen nonekiya kachtopa niman ijkon ninochiuas monja. Kuakon monjas okinemilijkej nexcheloskej itech nokniuan. Lauri oyaj ipan convento tlen onka ipan Valencia, Ramoni onokauj Zaragoza niman nejua oniaj Madrid. Ompa onikijto ika nikchiuas tlen nonekiya okse niman ijkon ninochiuas monja. ipan convento tlen onka Madrid. Miyekej ompa nemiyaj, ken nomachtijkej niman ueuentsitsintin. Kuakon onkatka miyek tekitl niman nejua nitekitiya ipan hospital tlen onkatka ipan convento.

Ijkuak xininochiuaya monja, niknemilia ika nochipa nikpoujtoskia niman ninomachtitoskia Biblia. San ika, xijkon katka. Xakaj kikuiya Biblia nion xtlajtouaj itech toTajtsin noso itech Jesús. Oninomachti nitlajtos san achijtsin latín, oninomachti kenon katka inemilis santos católicos niman nikueyichiuaya María. San ika, san melak titekitiyaj.

Opeuj melak xkuajli ninomachilia. Niknemiliaya ika noneki kanaj niktlantoskia tomin tlen ika nikinpaleuiskia nochanejkauan. Niman xok nitekitis ipan convento ika oksekimej manotomintikan. Kuakon onitlajto iuan akin ueyixtika katka niman onikijli ika niknekiya nias. Yejua onechtsauk ipan se cuarto pampa kinemiliaya ika ijkon nikpatlaskia tlen niknemilia.

Kuakon monjas onechkauilijkej nikisas, san ika, ijkuak okitakej ika ok niknekiya nias, oksejpa onechtsajkej. Yexpa onechtsajkej, niman onechijlikej ika tla niknekiya nias, manikijkuilo ken yejuin: “Niauj pampa nikneki niktekichiuilis Satanás niman xnikneki niktekichiuilis toTajtsin”. Xkeman oniknemili tla nechijliskia yejon manikchiua. Nejua niknekiya nias, san ika, xkeman nikijkuiloskia ken yejon. Kuakon onikimijli ika nikneki nias niman niknekiya nitlajtos iuan se cura niman onikijli nochi yejon. Kuakon yejua okitlajtlanili obispo ika manechtitlanikan ipan convento tlen onka Zaragoza. Ompa oninen san seki metstli niman onechkauilijkej maniuiya. Xouejkauj opanok Lauri niman Ramoni noijki okiskej ipan convento.

Felisa: Sakin oninonamikti niman oniaj oninochantito España, ipan ueyi kalpan itoka Cantabria. Ompa ok niaya ipan misa ipan nochi semanas. Se tonajli  donmigo, teopixki okikixti se amoxtli La verdad que lleva a vida eterna. Melak kualantoya niman otechijli ika tla yakaj kipiaya yejon amoxtli, makimaka noso makitlajkali ipan tlasojli.

Nejua xnikpiaya yejon amoxtli niman niknekiya nikpiyas se. Opanok seki tonaltin, omemej siuamej iteixpantijkauan Jehová oajsikej nochan niman onechmakakej yejon amoxtli. Onikpouj ipan yejon yeuajli. Ijkuak yejon siuamej oksejpa onechitakoj, onechijlikej ika tla nikneki ninomachtis Biblia niman onikimijli ika kema.

Nochipa oniknek nikyolpaktis toTajtsin. Ijkuak opeuj ninomachtia tlen melauak itech Jehová, opeuj niktlasojtla. Niknekiya nochimej nikinnojnotsaskia. Ipan xiuitl 1973 oninoapolakti. Nochipa ijkuak niueliya nikinnojnotsaya nochanejkauan itech tlen melauak. San ika, nochimej nechijliayaj ika xmelauak tlen nikijtouaya, Nokniuj Araceli kijtouaya tlen nikneltokaya xkuajli.

Araceli: Pampa miyek tlen xkuajli yonexchiuilijkaj ipan convento, melak xkuajli ninomachiliaya itech noreligión. Maski ijkon, nochipa niaya misa ipan domingos niman nikijtouaya rosario nochi tonaltin. Ok niknekiya nikasikamatis Biblia niman niktlajtlaniliaya toTajtsin ok manechpaleui. Se tonajli, Felisa onechijli itech tlen nomachtijtoya. San ika, nejua xnikneltokaya tlen nomachtiaya. Onikitak ika melak kuelitaya ika tlen nomachtiaya niman oniknemili ika san pampa melak kitlasojtlaya yejon tlaneltokijli.

Sakin oksejpa oniaj Madrid onitekitito. Ompa oninonamikti. Ipan miyek xiuitl yonikitaka ika miyekej tlaltikpakchanejkej nochipa yayaj ipan teopan, san ika, xkichiuaj ken Jesús otemachti. Kuakon xok keman oniaj teopan. Nion onikinneltokak santos niman infierno. Nion xok onikneltokak ika tla se cura ueliskia kitlapopoluis totlajtlakoluan. Niman onikinxini nochi tajtsitsintin tlamachijchiualtin tlen nikinpiayaj. Xnikmatiya tla ken nikchiujtoya kuajli katka. San ika, ijkon onikchiuj pampa melak yoninoyolkokoka niman xniyolpakiya. Onikijli toTajtsin: “Nikneki nimitsixmatis. ¡Xnechpaleui!”. Iteixpantijkauan Jehová  miyekpa kitetepiniaya nopuerta, san ika, xkeman onikintlapouili. Nejua xok nikneltokaya nion se religión.

Lauri chantiya Francia niman Ramoni España. Kanaj ipan 1980 yejuamej opeujkej nomachtiaj Biblia iuan iteixpantijkauan Jehová. Nejua niknemiliaya ika noijki yokinkajkayaujkaj ken Felisa. Sakin opeuj ninouika iuan se siuatl itoka Angelines akin nisiuj chantiya kampa nejua nichanti, niman noijki iteixpantijkauj Jehová katka. Yejua iuan iueuentsin miyekpa onechijlikej ika tla niknekiya ninomachtis Biblia. Yejuamej kitayaj ika kema niknekiya nikixmatis Biblia maski onikimijli ika xnikuelitaya nikmatis itech se tlaneltokijli. San ika, oajsik tonajli ika onikimijli ika niknekiya ninomachtis imiuan san tla nijkuiskia noBiblia Nácar-Colunga.

Felisa: Ijkuak oninoapolakti ipan xiuitl 1973, nemiyaj kanaj 70 iteixpantijkauan Jehová ipan Santander, capital Cantabria. Ompa onkatkaj melak miyek kalpamej pitentsitsintin. Ijkuak tontenojnotsayaj ompa, melak tiuejkauiyaj tajsiyaj maski tiayaj ipan autobús melak uejka katka. Sakin opeuj tiauej ipan carros.

Hasta aman itech yejuin xiuitl melak miyekej yonikinmachti itech Biblia. Niman 11 akin onikinmachti yonoapolaktijkej. Niman miyekej akin yonikinmachti katkaj católicos. Ononek nikimijyouis ijkon ken nejua, nonekiya panoskiaj tonaltin iuan ijkon kitaskiaj ika tlen kineltokayaj xmelauak. Nejua nikmatstoya ika san Biblia niman iespíritu santo toTajtsin ueliskia kinpaleuis manopatlakan niman makasikamatikan tlen melauak (Hebreos 4:12). Noueuentsin policía katka niman onoapolakti ipan 1979. Nonan opeuj nomachtia Biblia achto mikiskia.

Araceli: Ijkuak opeuj ninomachtia Biblia iuan iteixpantijkauan Jehová, xnikmatiya tla nikinneltokaskia. San ika, sakin opeuj nikinneltoka pampa nikitaya ika ken tlen kijtouayaj kichiuayaj. Notlaneltokil itech Jehová niman itech Biblia oueyiyak. Aman melak nipakiya. Sekimej akin nisiuj chantiyaj kampa nichanti okitakej yejon niman onechijlikej: “Araceli, nochipa xuiya ipan yejon ojtli tlen yotikajsik”.

Nikilnamiki ika nikijliaya Jehová: “Tlaxtlaui pampa xok timokajkauj ika tinechpaleuis niman otinechpaleui manikixmati tlen melauak tlaixmatilistli itech Biblia”. Noijki, yonikijli Felisa manechtlapopolui itech nochi tlen onikijli. Aman xok tokualaniaj, aman tipakij titlajtlatoskej itech Biblia. Ipan xiuitl 1989 oninoapolakti, ijkuak nikpiaya 61 xiuitl.

Felisa: Aman nikpiya 91 xiuitl niman yoninokauj siuakauajli. Xueli nikchiua ijkon ken kachtopa nikchiuaya, san ika, ok nikpoua Biblia mojmostla. Niman nochipa ijkuak niueli niauj ipan tlanechikoltin niman notenojnotsa.

Araceli: Nikuelita nikinnojnotsas curas niman monjas. Kanaj pampa nejua nimonja katka. Melak kuajli imiuan yonitlajto sekimej akin tekitij teopan. Miyekej yokiselijkej amatlajkuiloltin niman revistas. Nikilnamiki itech se cura akin iuan onitlajto miyekpa. Yejua xkualaniya ken nikijliaya. San ika, yejua onechijli: “¿Kanon uelis nias nejua iniueuentsin? ¿Tlenon kijtoskej akin kuajkakij tlen nikijtoua niman nochanejkauan?”. Nejua oniknankili: “¿Niman tlenon kijtoskia toTajtsin?”. Onikitak ika onajman pampa yejua okasikamat tlen nikijtouaya melauak. San ika, xkipiaya chikaualistli ika manopatla.

Xkeman nikilkauas yejon tonajli ijkuak noueuentsin onechijli ika kinekiya yas ipan tlanechikojli. Ikipiaya 80 xiuitl ijkuak kemach oyaj tlanechikojli niman xkeman okinopolouili yas. Onomachti Biblia niman opeuj tenojnotsa. Nikilnamiki miyek ken kualtsin otipanokej ijkuak san sekan tontenojnotsayaj. Yejua omik ijkuak poliuiya omemej metstli ika noapolaktiskia.

Felisa: Ijkuak opeuj niktekichiuilia toTajtsin, yeyimej nokniuan okualankej. San ika, sakin yejuamej noijki onochiujkej iteixpantijkauan Jehová. Kuajli nesi ika yejuin, ika seki se tlen melak kualtsin nopan onochiuj. Aman ueliskia san sekan tinemiskej niman titlajtoskej itech toTajtsin Jehová niman itech iTlajtol, Biblia. Aman yoyejkoka tonajli ijkuak ueliskia san sekan tikueyichiuaskiaj Jehová. *