SE TETLAYOKOLIJLI tlen melak ueyi noneki texchiualtis matikteititikan ika tiktlasojkamatij. Jesús okiteititi yejon sakin ijkuak yejua okinpajti majtlaktli tlakamej “akin melak kualouayaj” niman ipan yejon tonaltin xnopiaya kenon kinpajtiskej. Se itech yejon majtlaktli tlakamej “onokuep, niman ikan chikauak tlajtojli kueyiliaya Dios”. Jesús okijto: “¿Xnochimej on majtlaktlimej opajtikej? ¿Kanon nemij on okse chiknauimej?” (Lucas 17:12-17). ¿Tlenon techmachtia yejuin? Ika tejuamej nimantsin uelis tikilkauaskej tlen kuajli texchiuiliaj oksekimej.

Tlaxtlauijli xsan noijki itech okse tetlayokolijli tlen yotechmakakej. Xkeman notemaka se ueyi tlaxtlauijli ken yejuin. ¿Kenon noneki matitlanankilikan itech tlen toTajtsin yokichiuj topampa?

• Matikixmatikan akin otechmakak yejuin tetlayokolijli. Nochimej tlaltikpakchanejkej noneki itlaj kichiuaskej niman ijkon tlaxtlauijli kinmakas nemilistli tlen xkeman tlamis. Miyekpa Jesús ipan teoyotl okijli toTajtsin: “Niman ijkuak se mitsixmati tejua yejuan san moselti melauak tiDios, niman nejua niJesucristo yejuan otinechajtitlan, yejua kipia on nemilistli yejuan para nochipa” (Juan 17:3). Tla yakaj mitsijliskia ika se tlakatl omitsmakixti ijkuak ok tikonetl katka, ¿xtikuelitaskia tikmatis okseki itech yejuin tlakatl niman itech tleka omitsmakixti? ToTajtsin Jehová yejua akin otemakak tetlayokolijli tlen techmakixtia, tlaxtlauijli. Yejua kineki ika tejua maka san xmati akinon yejua noijki kineki xmonisiui itech niman kuajli iuan xmouika. Biblia kijtoua:  “Xnisiuikan Dios niman yejua mechnisiuis” (Santiago 4:8).

• Matikteititikan tlaneltokijli ipan tlaxtlauijli. “Yejuan kineltoka iKonetsin Dios kipia nemilistli para nochipa” (Juan 3:36). ¿Tlenon kijtosneki tikteititiskej tlaneltokijli ipan tlaxtlauijli? Itlaj tikchiuaskej, noneki tikteititiskej tlaneltokijli ipan tlaxtlauijli ika tlen tikchiuaj (Santiago 2:17). ¿Tlenon noneki tikchiuaskej? Se tetlayokolijli san uelis yes moyaxka ijkuak tikajsi niman tikselia. Noijki ijkon, tejua noneki tikonnajsis niman tikselis tlaxtlauijli. ¿Kenon uelis tikchiuas yejuin? Xmomachti kenon toTajtsin kineki ika tejua xyekana monemilis niman xtlakamati. * Xtlajtlanili toTajtsin mamitstlapopolui niman xpiya chipauak motlamachilis. Matonisiuikan itech toTajtsin ika ueyi tlaneltokijli ika tlaxtlauijli techmaka tlamachialistli ika tlayekapan ijkuak tinemiskej ika yolseuilistli, ika toyojlo niman xtlaj techpolos tinochimej akin titlaneltokaj itech tlaxtlauijli (Hebreos 11:1).

• Xmosentlali ipan tonajli ijkuak noilnamiki imikilis Cristo. Jesús otlanauati manopanolti se tlanechikojli sejpa ipan se xiuitl niman ijkon matikilnamikikan tlaxtlauijli tlen onotemakak. Itech yejuin tlen nochiuaskia yejua okijto: “Xchiujtokan yejuin niman ijkon xnechilnamikikan” (Lucas 22:19, TNM). Iteixpantijkauan Jehová tikilnamikiskej imikilis Jesús ipan martes 11, metstli abril 2017, ijkuak yokalak Tonajli. Tlamachtijli tlen nopanoltis uejkauis kanaj se hora niman techtomiliskej tlen kijtosneki imikilis Jesús niman kenon techuajkuilis tlateochiualistli aman niman ika tlayekapan. Ipan xiuitl tlen opanok kanaj 20 millones ika tlaltikpakchanejkej itech nochi tlaltikpaktli onosentlalijkej ijkuak onoilnamik imikilis Cristo. Timitsnotsaj ika nochi toyojlo touan xmosentlali niman ijkon tikteititis ika tiktlasojkaita iueyi tetlayokolil toTajtsin.