“AUTOBÚS uelis kisas, san ika, ¡tlakatl akin ualeua China kipiya ika nokauas!”. Yejuin tlen Alexandra okikak kampa notlalijtoya ijkuak kichiatoya kipanauis se país niman kalakis okse ipan Sudamérica. Ijkuak otemok niman ijkon kitas tlenon panotoya, okitak se telpochtli akin ualeua China akin san achijtsin ueliya español niman kiyejyekotoya kitomilis policía tlenon ipan onochiujka. Pampa Alexandra se iteixpantijkauj Jehová akin tlapaleuijtoya ipan se tlanechikojli kampa tlajtouaj chino, okijto ika kinekiya tepaleuis tetlajtolkuepilis.

Tlakatl okijto ika chanej katka ipan yejon país, san ika, okixtekilijkej iamauan niman itomin. Kachtopa policía xokineltokak niman hasta okinemili ika Alexandra kitlaniya tomin inpampa tlaltikpakchanejkej. Sakin policía okiseli tlen okijli yejon tlakatl akin ononek tlatlaxtlauas pampa xkipiaya iamauan. Alexandra okijli ika kitlaneujtiskia 20 dólares. Yejon tlakatl melak okitlasojkamachili niman okijli ika kikuepiliskia itomin niman ika hasta okseki kimakaskia. Alexandra okijli ika xkichiaya makitlaxtlauilikan niman ika melak pakiya pampa ouel okipaleui niman yejon tlen nonekiya. Noijki okimakak seki amatlajkuiloltin tlen tlajtouaj itech Biblia niman okiyolchikauj manomachti Biblia imiuan iteixpantijkauan Jehová.

Nochipa melak teyolpaktia nokakis kenon sekimej kitemakaj tlen kipiyaj akin nion xkixmatij. Melauak, maski sekimej kipiyaj intlaneltokil noso akin kijtouaj xnemij ipan se tlaneltokijli tlapaleuiyaj ijkon ken Alexandra. San ika ¿melak tiknektoskia tikinpaleuis oksekimej maski yejuin tejua xmitspaleuis? Yejuin melak noneki manonankili pampa Jesús okijto: “Más paki on yejuan kitemaka xken on yejuan kiselia” (Hechos 20:35). Noijki yejuin, hasta akin ixtlamatkej, melak kinekij kimatiskej pampa yononexti ika melak tepaleuiya tikuelitas titemakas. Matikitakan kenon tepaleui.

Kuajli yonoitak ika tikuelitas titemakas kichiua xpaki. Apóstol Pablo okijkuilo ika “Dios kitlajsojtla on yejuan kitemaka iofrenda ikan paktli”. Yejua tlajtouaya itech akin kichiuayaj ken Cristo, akin okinejkej temakaskej tlen kipiayaj ika tomintsin niman kisaya itech inyojlo, ijkon kinpaleuiskiaj imikniuan akin noijki tlaneltokayaj akin kixnamiktoyaj tlaueltin (2 Corintios 8:4; 9:7). Pablo xokijto tla yejuamej kuelitayaj temakaskej tlen kipiayaj pampa pakiyaj okijto ika yejuamej pakiyaj pampa kuelitayaj temakaskej.

Seki tlamachtiltin tlen yokikixtijkej ixtlamatkej kijtouaj ika tla yakaj kuelita itlaj kitemakas “ijtik itsontekon kichiua mapaki, kuajli manouika iuan oksekimej niman ueli kinneltoka oksekimej yejuin kichiua ika kuajli manomachili”. Okse kijtouaya ika “akin kitemaka tomin melak paki xijkon ken tla san iselti kitlamiskia itomin”.

 ¿Kemantika otiknemili ika xueli tikchiua nochi kech tiknekiskia? San ika, nochimej uelis tikmachiliskej pakilistli tlen kimachilia akin “kitemaka [...] ikan paktli”. Tla ijkuak tiktemakaj kisa itech toyojlo, xnoneki ika tlen tiktemakaj maueyi. Se iteixpantijkauj Jehová okintitlanili tomintsin tlen okis itech iyojlo akin kichijchiuaj yejuin revista niman okimijkuilouili yejuin: “Itech miyek xiujtin yonitemak san achijtsin tomintsin ipan Kajli kampa Tosentlaliaj”. Noijki okijto: “Jehová yonechkuepili miyek xijkon ken nejua onikmakak. [...] Tlaxtlaui ika nenkiseliaj tlen niktemaka, kichiua ika kuajli maninomachili”.

Tikuelitas titemakas xsan nochiua ika tomin, onka miyek okseki ken noteititia.

Biblia kijtoua: “Se yolkuajli tlakatl sa no yejua nopaleuiya, san ika, tlaltikpakchane akin tetlajyouiltia sa no yejua nouajkuilia tlaueltin” (Proverbios 11:17). Tlaltikpakchanejkej akin kipiyaj kuajli inyojlo kinektokej temakaskej niman tepaleuiskej ika intiempo, inchikaualis niman ika okseki. Ijkuak nomatij ijkon kichiuaj, melak kinpaleuiya pampa xnimantsin kualoj.

Yononexti ika akin tepaleuiyaj noso kuelitaj temakaskej yokitakej ika xijkon nokokouaj ken oksekimej niman kuajli nomachiliaj. Xnimantsin kualoj. Yejuin ijkon inpan nochiua hasta akin kipiyaj esclerosis múltiple noso VIH. Noijki yonoitak ika akin kikajkaujtokej tlauaniskej, ijkuak yejuamej kinpaleuiyaj oksekimej, xnimantsin noyolkokouaj nion xok oksejpa tlauanij.

¿Tleka ijkon nochiua? Nonemilia ika “titeiknelis, tiyolkuajli yes niman tikuelitas titemakas yejuin kipopoloua xkuajli tlanemililtin”. Noijki tiknektos titepaleuis maski tejua xmitspaleuis kichiua ika kuajli xmomachili. Noijki akin kauajli kipaleuiya maka melak manoyolkoko ijkuak kinpaleuiya oksekimej.

Kuajli tikmatij ika tla tikuelitaj tiktemakaskej kichiua kuajli matinemikan.

Jesús okimijli inomachtijkauan: “Xkinmakakan tlajtlamach on oksekimej, niman Dios no mechmakas. Xkinmakakan ken se kuajli tlanamakaketl kitemaka ikan se tlatemachiuajli yejuan kuajli tentikaj, yejuan kuajli kipachoua, niman yejuan kikoxonia niman yejuan kiteuitsoltia, pampa Dios mechmakas sa no ijki ken nemejuamej nenkiminmakaj oksekimej” (Lucas 6:38). Ijkuak sekimej kitaj ika tikuelitaj tiktemakaskej uelis kitlasojkamatiskej niman noijki ijkon kichiuaskej. Yejuin tlen kuajli nochiua noso kualneskayotl kichiua ika oksekimej manopaleuikan niman kuajli manouikakan.

Se tlamachtijli itech kuajli timouikas iuan oksekimej kijtoua ika “akin yonomatkej temakaskej maski yejuamej xika nopaleuiyaj kinmauaj oksekimej noijki ijkon makichiuakan”. Niman “maski san nopoua ipan seki amatlajkuiloltin itech kenon sekimej melak tepaleuiyaj, kichiua ika oksekimej noijki makinekikan temakaskej”. Ika yejon okse tlamachtijli kijtoua ika “tisesentemej uelis tikinmauaskej miyekej noso melak miyekej tlaltikpakchanejkej maski tla tikimixmatij noso ka”. Yejuin kijtosneki ika tla yakaj maski san sejpa kitemakas itlaj, uelis kichiuas ika oksekimej akin nemij kampa yejua chanti noijki makichiuakan. ¿Xtikuelitaskia tinemis kampa ijkon nochiua? Kuajli nesi ika tla miyekej kuelitaskiaj temakaskej, nochimej melak techpaleuiskia.

 Se ken noteititia ika melak tepaleuiya titemakas noteititia ika tlen opanok Florida (Estados Unidos). Sakin ijkuak opanok se chikauak ajakakiyaujtli, sekimej iteixpantijkauan Jehová okinejkej tepaleuiskej. Ijkuak kichiatoyaj mayejko tlen ika tekitiskiaj, okitakej ika tepantli tlen kiyeualouaya ichan se akin nisiuj chanti melak oijtlakauj niman okijtokej ika kiyektlaliskiaj. Sakin tlakatl akin okipaleuijkej okititlan se amatlajkuilojli ipan oficina kampa noyekanaj nochi sucursales, kijtouaya: “Nochipa nemechtlasojkamachilis, nemejuamej melak kuajli nemoyojlo”. Pampa melak kitlasojkamatiya tlen yokichiujkaj, itech iyojlo okis kitemakas miyek tomintsin niman ijkon tlapaleuis ipan tlen yejua okitokayoti “se melak kuajli tekitl tlen kichiuaj iteixpantijkauan Jehová”.

“Tlaltikpakchanejkej ijkuak tlakatij kuajkuij ika kinekij kinpaleuiskej oksekimej”, ijkon okijtokej ixtlamatkej. Noijki, ika kokonej “maski melak pipitikej melak kinektokej tepaleuiskej, yejon maski ok xuelij tlajtouaj”. Biblia temachtia ika tlaltikpakchanejkej otexchijchiujkej matikpiyakan “itlachialis toTajtsin”, yejuin kijtosneki ika tikpiyaj ikualneskayouan (Génesis 1:27).

Tikuelitas titemakas san se kualneskayotl itech okseki tlen kipiya toTajtsin Jehová akin Tlachijchiujketl. Itech ualeua tonemilis niman nochi tlen kichiua matipakikan (Hechos 14:17; 17:26-28). Biblia noijki techpaleuiya kuajli matikixmatikan toTajtsin iluikakchane niman tlen ika itlasojtlalis kineki kichiuas inpampa tlaltikpakchanejkej. Noijki techmachtia ika yokichiuj nochi tlen noneki niman ijkon uelis tipakiskej ika tlayekapan * (1 Juan 4:9, 10). Pampa itech Jehová ualeua tiknekis tiktemakas niman tikpiyaj ikualneskayouan, xtitlamojkaitaj ika tla tikuelitaj tiktemakaskej, ijkon ken yejua, techpaleuiya niman kichiua kuajli matechita (Hebreos 13:16).

¿Kenon otlamito tlen ipan onochiuj Alexandra akin otikteneujkej ipeujyan yejuin tlamachtijli? Ipan autobús yakaj okijli ika xkeman kikuepiliskiaj itomin. San ika, yejon tlakatl akin Alexandra okipaleui okonnots sekimej akin imiuan nouikaya niman chantiyaj kampa noteltiskia autobús niman ijkon ouel otekuepili 20 dólares tlen okitlaneujtikaj. Noijki okichiuj tlen Alexandra okijli niman opeuj nomachtia Biblia. Yeyi metstli sakin, Alexandra melak opak ijkuak oksejpa okitak ipan se ueyi tlanechikojli ika tlajtojli chino tlen iteixpantijkauan Jehová okichiujkej Perú. Pampa tlakatl kitlasojkamatiya nochi tlen okichiujka ipampa, okinots Alexandra niman akin inuan yayaj matlakuatij kampa kinemakaya tlakuajli.

Kuajli tikitaj ika tikuelitaskej tiktemakaskej niman tikin paleuiskej oksekimej kichiuas melak matipakikan. Niman tla ijkuak ijkon tikchiuaj, tikinpaleuiyaj oksekimej makixmatikan Jehová, akin melak kinektok kitemakas, ¡melak kuajli yes! (Santiago 1:17). ¿Niman tejua? ¿Tikselijtika pakilistli pampa tiktemaka tlen tikpiya?