Winston, xtechijli kenon opeuj tiktejtemoua toTajtsin.

Oninoskalti Queensland (Australia). Notajuan xtlaneltokayaj itech Biblia. Pampa tichantiyaj ipan se granja tlen uejka onkatka, xnitlajtouaya imiuan oksekimej, san imiuan nochanejkauan. Ijkuak nikpiaya 12 xiuitl, opeuj niktejtemoua toTajtsin. Onikchiuili teoyotl niman onikijli manechpaleui manikixmati. Sakin oniaj Adelaida (Australia Meridional) niman ompa oniknexti se tekitl. Ijkuak nikpiaya 21 xiuitl, onipaxaloto Sydney, ompa onikixmat Pam. Yejua onechnojnots itech israelismo británico, se grupo akin kijtoua ika pueblos británicos ualeuayaj itech tribus de Israel tlen yopoliujkaj. Yejon grupo kijtoua ika yejon tribus yejuamej katkaj 10 tribus tlen nemiyaj ipan reino del norte akin okinkixtijkej kampa chantiyaj ipan siglo 8 ijkuak xpeuaya xiuitl 1. Ijkuak oksejpa oniuajnokuep Adelaida, onitlajto itech yejon iuan akin nitekitiya. Yejua yopeujka nomachtiaya Biblia imiuan iteixpantijkauan Jehová. Ijkuak achijtsin iuan yonitlajtoka itech tlen kineltokayaj iteixpantijkauan Jehová, onikasikamat ika toTajtsin ikinankilijtoya noteoyouj tlen onikchiuilijka ijkuak nikonetl katka. Ininomachtijtoya itech akin onexchijchiuj niman itech iTekiuajyo. ¡Yoniknextijka yejon perlas “yejuan sanoyej patioj”! (Mat. 13:45, 46).

Pam, tejua noijki opeuj tiktejtemoua yejon perla ijkuak tiichpochtli katka. ¿Kenon otiknexti?

Oninoskalti Coffs Harbour (Nueva Gales del Sur). Nochanejkauan tlaneltokayaj itech toTajtsin. Notajuan niman noabuelos okiselijkej tlen temachtiaya israelismo británico. Nokniuj akin xokoyotl, nokniuj siuatl akin yakatstiuj, miyekej noprimos niman nejua otechmachtijkej ika toTajtsin kinseliaya británicos. San ika, nejua xkeman onikneltokak  yejon niman ninomachiliaya ika uejka ninemiya itech toTajtsin. Ijkuak nikpiaya 14 xiuitl oniajka ipan miyek teopantin kampa nosentlaliayaj anglicanos, bautistas niman adventistas del séptimo día. San ika, xonechpaleuijkej manikixmati toTajtsin.

Sakin, otichantitoj Sydney imiuan nochanejkauan, ompa onikixmat Winston ijkuak yejua opaxaloto. Ken yejua yokijto, pampa titlajtouayaj itech religión, opeuj nomachtia imiuan iteixpantijkauan Jehová. Sakin, ijkuak yejua nechontitlaniliaya cartas, ompa kimijkuilouaya miyek textos itech Biblia. Noneki nikijtos ika yejon onechajman niman hasta onechkualani. San ika, ika yolik onikasikamat ika yejon katka tlen melauak.

Ipan 1962 onichantito Adelaida niman ijkon nisiuj ninemis kampa chantiya Winston. Yejua yotlajtoka iuan se matrimonio akin iteixpantijkauan Jehová katkaj niman ijkon imiuan manichanti. Intoka katka Thomas niman Janice Sloman, yejuamej yotekichiujkaj Papúa Nueva Guinea ken misioneros. Kuajli onechselijkej; nejua san nikpiaya 18 xiuitl niman onechpaleuijkej maninonisiui itech Jehová. Kuakon, noijki opeuj ninomachtia Biblia. Nimantsin onikasikamat ika yoniknextijka tlen melauak. Sakin, ijkuak otonamiktijkej, Winston niman nejua otipeujkej tiktekichiuiliaj Jehová ika pakilistli. Niman pampa ijkon otikchiujkej, más yotiktlasojtlakej tlen otiknextijkaj maski yotikixnamijkej miyek tlemach tlen ouijtika.

Winston, xtechijli kenon opeuj tiktekichiuilia Jehová.

Sakin, ijkuak otonamiktijkej, kentla Jehová otechititi kenon noneki matiktekichiuilikan (1 Cor. 16:9). Tokniuj Jack Porter, akin nemiya ken tlayekanketl ipan circuito, kontlajpalouaya totlanechikol niman yejua otechijli kenon uelis tiktekichiuiliskiaj toTajtsin. Ijkuak otechtlajpalotoj, yejua niman isiuauj, Roslyn, otechpaleuijkej matochiuakan precursores regulares. Otechyolpakti titekitiskej ken precursores makuijli xiuitl. Nikpiaya 29 xiuitl ijkuak otechijlikej ika nitlapaleuiskia ken tlayekanketl ipan circuito ipan islas del Pacífico Sur, tlen kiyekanaya sucursal de Fiyi. Otiajkej islas de Kiribati, Nauru, Niue, Samoa, Samoa Norteamericana, Tokelau, Tonga, Tuvalu niman Vanuatu. Niman aman, Jack niman nejua san sekan titekitij ipan grupo akin tlayekana ipan sucursal tlen onka Australasia.

Ipan yejon xiujtin, sekimej akin chantiyaj ipan islas kinmakasiyaj iteixpantijkauan Jehová, kuakon nonekiya titlamachilisejkej yeskej (Mat. 10:16). Tlanechikoltin xuejueyimej katkaj, niman sekimej xueliyaj techmakayaj kampa tikochiskiaj. Kuakon, otikimijlikej oksekimej akin ompa chantiyaj tla ueliskiaj tokauaskiaj inchan. Nochipa kuajli otechselijkej.

Winston, tejua tikuelita ijkuak notlajtolkuepa amatlajkuiloltin. ¿Kenon opeuj tikuelita yejon?

Ipan yejon tonaltin, tokniuan akin chantiyaj ipan isla de Tonga kipiayaj san seki tratados niman folletos ika tongano, se tlajtojli polinesio. Ijkuak temachtiayaj, kikuiyaj amoxtli La verdad que lleva a vida eterna ika inglés. Kuakon, ipan naui semanas tlen ouejkauj escuela de ancianos, yeyimej tokniuan tlayekankej akin ueliyaj tlajtouayaj achijtsin inglés opeujkej kitlajtolkuepaj yejuin amoxtli ika tlajtojli tongano. Pam okijkuilo ipan máquina tlen okitlajtolkuepkaj, niman otikontitlankej sucursal de Estados Unidos niman ijkon manochijchiua ipan imprenta. Yejon tekitl onochiuj ipan chikueyi semanas. Maski ken onotlajtolkuepka xmás kuajli katka, okinpaleui miyekej akin tlajtouayaj tlajtojli tongano makixmatikan tlen melauak. Pam niman nejua xtitlajtolkuepayaj, san ika, yejon tlen opanok, okichiuj matikuelitakan yejon tekitl.

Pam, tichantis Austlalia xsan noijki ken ipan islas, ¿kenon katka ne ipan islas?

Melak sejneka katka. Kemantika melak nemiyaj miyekej moyotsitsintin, tona katka  niman tlakuechajkan, noijki nemiyaj kimichimej, onkatka kokolistli, niman kemantika tikpiayaj san achijtsin tlakuajli. San ika, ika teotlak toseuiayaj niman tikontlajtlatayaj mar kampa tichantiyaj, ipan se fale, ijkon kixmatij ika tlajtojli samoano se kajli tlachichiujtli ika sakatl niman tlen xkipiaya itepanuan. Ika tlayoua, ijkuak metstona katka, tikimitayaj palmeras kenon nouiyoniayaj, niman ixko mar nesiya metstli. Ijkuak ijkon tikitayaj, kichiuaya matitlanemilikan niman tikchiuayaj teoyotl, ijkon titlanemiliayaj san itech tlen kuajli.

Tikinuelitayaj kokonej. Teuetskitijkej katkaj niman kinekiyaj kimatiskej miyek tlemach ijkuak komintlajpalouayaj akin xompa chanejkej. Ijkuak otiajkaj isla de Niue, se telpokatsin opeuj kinkitskilia imauan noueuentsin niman okijto: “Nikuelita moijuiyo”. Telpokatsin xkeman kitaya se akin mamatsonej niman xkimatiya kenon kitokayotis.

Tajmanayaj ijkuak tikimitayaj tlaltikpakchanejkej kenon melak xtlaj kinopiliayaj. Iyeualiyan yejon isla melak kualtsin katka, san ika, xnemiyaj tlapajtikej niman onkatka achijtsin atl tlen ueliskia tijkuiskej. Maski ijkon, tokniuan xkimajmanaya, pampa yonomatkaj. Pakiyaj ika imiuan nemiyaj inchanejkauan, kipiayaj kampa kiueyichiuayaj Jehová niman ika ueliyaj kitekichiuiliayaj. Yejon otechpaleui san matikitakan tlen melak noneki matikchiuakan niman matiyolpakikan san ika tlen tikpiayaj.

Pam, kemantika nonekiya tikontejtemos atl niman sejneka katka kampa titlakualchiuaya. ¿Kenon tikchiuiliaya?

Niktlasojkamachilia notaj ika miyek onechititi. Onechititi kenon nitlatlatis niman ompa nitlakualchiuas niman ninemis san ika achijtsin. Ijkuak otiajkaj Kiribati, otokaujkej ipan se soyakajli, ipiso kipiaya coral niman itepanuan okichijchiujkaj ika bambú. Ijkuak onipeuj nitlakualchiua, onitlachkuak niman ijkon opeuj nitlatlatia ika ikakauayo cocos. Niman onijkuito atl ipan pozo, ononek nikchiuas fila imiuan miyekej siuamej. Kikuiyaj se kojtli de ome metros ika ueyak, niman kampa ontlamiya kojtli kipiaya se mekatl kampa saliujtoya se lata niman ijkon kikixtiayaj atl. Yejon kojtli kentla yeskia se tlakotl tlen ika michajsij. Ijkuak se siuatl kikixtiaya atl ika yejon kojtli, kontlajkaliya lata niman totoka kiuiyoniaya ima niman ijkon uelis polakis yejon lata ijtik atl. Nesiya xouijtika. Miyekpa nikontlajkaliya yejon tlakotl ika lata, san ika, san ajsiya ixko atl niman xueliya polakiya. Opeujkej uetskaj niman, ijkuak onokajkaujkej ika uetskayaj, se opeuj nechititia kenon nikchiuilis. Akin chantiyaj ipan islas nochipa otechpaleuijkej niman kuajli technotsayaj.

Melak onenkuelitakej kenon onentekichiuilijkej toTajtsin ipan islas. Xtechijlikan tlen kualtsin nenkilnamikij.

Winston: Seki tlen kichiuayaj tlaltikpakchanejkej otiuejkaujkej otikasikamatkej. Nikilnamiki ika ijkuak tokniuan techtlakualtiayaj, techmakayaj nochi tlen kipiayaj. Xtikmatiyaj ika nonekiya tikinkauiliskej achijtsin tlen yejuamej kikuaskiaj. Kuakon, tiktlamiayaj nochi tlen techmakayaj. San ika, ijkuak otikasikamatkej, kuakon opeuj tikinkauiliaj seki tlakuajli. Maski miyekpa otopopolojkej, tokniuan techasikamatiyaj. Pakiyaj oksejpa techitaskej chijchikuasen metstli ijkuak tikomintlajpalouayaj. Ipan yejon xiujtin, tokniuan xkimixmatiyaj oksekimej iteixpantijkauan Jehová, san tejuamej techixmatiyaj.

Miyekej okasikamatkej akinomej iteixpantijkauan Jehová pampa tikomintlajpalouayaj tokniuan. Miyekej kinemiliayaj ika tokniuan san okinejnemilijkaj tlen kineltokayaj. Ika yejon, ijkuak ajsiyaj oksekimej tokniuan akin xompa chanejkej katkaj, akin xnomachtiayaj kasikamatiyaj ika tikpiayaj se religión melak ueyi niman yejon kinmojkatlachialtiaya.

Pam: Nikilnamiki itlaj tlen kualtsin opanok ijkuak tinemiyaj Kiribati, kampa onkatka se pitentsin tlanechikojli. Tokniuj akin itoka  katka Itinikai Matera san yejua tlayekanketl katka, yejua nokojtiliaya kuajli techselis. Se tonajli, ijkuak oajsik kampa tichantiyaj, kitkiya se totoltetl ijtik se chikijtli. Otechijli: “Onimechajkuili yejuin”. Ipan yejon tonaltin, patioj katka tijkouas totoltetl. Yejon tlen okichiuj tokniuj oajsik ipan toyojlo.

Pam, tikmatstokej ika otikoneuatika, san ika, ouets mokonetsin. ¿Tlenon omitspaleui xkixnamiki yejon?

Onikoneuajtik ipan 1973 ijkuak tinemiyaj ipan Pacífico Sur. Kuakon otokuepkej Australia, niman naui metstli sakin ouets nokonetsin. Yejon okijtlako Winston, pampa noijki ikoneuj katka. Xueliya nikilkauaya tlen topan onochiujka hasta ijkuak otikselijkej La Atalaya del 15 de abril de 2009. Se tlamachtijli itech “Preguntas de los lectores” itoka katka: “Si una criatura muere en el vientre materno, ¿volverá a la vida en la resurrección?”. Yejon tlamachtijli kijtouaya ika Jehová kimati tlenon kichiuas niman ika nochipa kichiua tlen melajki. Yejua kiyektlalis nochi tlen xkuajli pampa yejua yokinauati iKoneuj makixoxotoni tlen yokichiuj Diablo (1 Juan 3:8). Yejon tlamachtijli noijki otechpaleui más matiktlasojtlakan yejon “perla” tlen yotiknextijkaj. ¿Kenon tinemiskiaj tla xtikmatiskiaj tlenon kichiuas iTekiuajyo toTajtsin?

Sakin ika ouets tokonetsin, oksejpa otosentemakakej ipan itekiyo toTajtsin. Seki metstli otitekitkej Betel tlen onka Australia niman sakin oksejpa opeuj titekichiuaj ipan circuito. Ipan 1981, otiajkej Nueva Gales del Sur niman Sydney, ompa otitekitkej naui xiuitl. Sakin, otechijlikej matitlapaleuitij ipan sucursal de Australia, ijkon kitokayotiayaj yeuejkaui, niman ok ompa titekitij.

Winston, ¿tiknemilia ika tlen mopan onochiuj ipan islas del Pacífico sur mitspaleuiya aman ika titekiti ipan grupo akin tlayekana ipan sucursal de Australasia?

Kema, melak nechpaleuiya. Kachtopa, Australia kitaya tekitl tlen nochiuaya Samoa niman Samoa Norteamericana. Sakin, sucursal de Nueva Zelanda onosentlali iuan sucursal de Australia. Aman sucursal de Australasia kita tekitl tlen nochiua Australia, islas Cook, Niue, Nueva Zelanda, Samoa, Samoa Norteamericana, Timor Oriental, Tokelau niman Tonga. Jehová yonechkauili manikintlajpaloti seki itech yejon países ken representante de sucursal. Pampa onitekit imiuan tokniuan akin chantij ipan yejon islas, más kuajli nikinpaleuiya aman ika ninemi Betel.

Sa ika nontlamis, nikneki nikijtos ika Pam niman nejua yotikitakej ika xsan akin iuejueyimej kitejtemouaj toTajtsin. Telpokamej noijki kinekij kinextiskej yejon “perla”, maski tla inchanejkauan xkinekij kitejtemoskej (2 Rey. 5:2, 3; 2 Crón. 34:1-3). Tikmatij ika Jehová tetlasojtlani niman kineki ika telpokamej niman akin iuejueyimej manomakixtikan.

Yopanok cincuenta xiuitl ika Pam niman nejua opeuj tiktejtemouaj toTajtsin, xtiknemiliayaj kanon tajsiskiaj. Kuajli nesi ika tlen melauak itech Tekiuajyotl melak ueyi kijtosneki. Niman tiknekij tiktlajpiyaskej ika nochi toyojlo.