1. Ken kijtoua Colosenses 2:4, 8, ¿kenon Satanás kiyejyekoua techkajkayauas?

SATANÁS kineki matijkauakan Jehová. Ika yejon, kiyejyekoua kijtlakos ken titlanemiliaj, kineki matitlanemilikan ijkon ken yejua kineki. Kikui tlen tikileuiyaj niman ijkon techkajkayauas niman kichiuas matikchiuakan tlen yejua kineki (xpoua Colosenses 2:4, 8).

2, 3. a) ¿Tleka noneki kuajli matikitakan tlen kijtoua Colosenses 2:8? b) ¿Tlenon tikitaskej ipan yejuin tlamachtijli?

² ¿Yemelak ika Satanás uelis techkajkayauas? Kema. Matikilnamikikan ika Pablo xokimijkuilouili Colosenses 2:8 akin xkichiuayaj ken Cristo, yejua okimijkuilouili tokniuan akin tlapejpeniltin katkaj (Col. 1:2, 5). Satanás ueliskia kinkajkayauas yejuin tokniuan, niman tejuamej noijki uelis techkajkayauas ipan yejuin tonajli (1 Cor. 10:12). ¿Tleka? Pampa Satanás okuajtlakalkej ipan tlaltikpaktli niman kineki kinkajkayauas nochimej itekipanojkauan toTajtsin (Apoc. 12:9, 12, 17). Noijki, tinemij ipan tonaltin ijkuak más ijtlakaujtiuj inyojlo “xkuajkualtin tlakamej niman tlakajkayajkej tlakamej” (2 Tim. 3:1, 13).

³ Ipan yejuin tlamachtijli tikitaskej kenon Satanás kikui “temachtilistli tlen xmelauak” niman ijkon kijtlakos ken titlanemiliaj. Tikitaskej yeyi tlakajkayaualistin tlen kikui (Efes. 6:11). Ipan okse tlamachtijli tikitaskej tlenon uelis tikchiuaskej niman ijkon tijkixtiskej itech totlamachilis tlanemililtin tlen xkuajkualtin. San ika, kachtopa matikitakan kenon Satanás okinkajkayauj israelitas ijkuak yokalajkaj ipan Tlajli tlen Jehová yokimijlika kinmakas, niman tikitaskej tlenon tiuelij itech yejon.

4-6. Ken kijtoua Deuteronomio 11:10-15, ¿kenon onopatlak ken tokayaj israelitas ijkuak onochantijkej ipan Tlajli tlen Jehová yokimijlika kinmakas?

⁴ Satanás melak tlamachilise, yejua okiyejyeko ika israelitas makinueyichiuakan okseki tajtsitsintin. Yejua okitak ika kinekiyaj tlenon kikuaskej, niman ika yejon okintlatlatak. Ijkuak okalajkej ipan Tlajli tlen Jehová yokimijlika kinmakas, ononek nomachtiskej kenon ompa tokaskej. Ipan Egipto kiatekiayaj intlal ika atl tlen kikixtiayaj ipan atentli Nilo. San ika, ipan Tlajli tlen Jehová yokimijlika kinmakas xonkatka se atentli kampa ueliskiaj konkuiskiaj atl. Ompa san kiyaujtli niman ajuachtli kichiuaya matlatlaki (xpoua Deuteronomio 11:10-15; Is. 18:4, 5). Ika yejon, israelitas kipiaya ika nomachtiskiaj kenon tokaskej ipan yejon tlajli. Niman yejuin melak ouijtika yeskia, pampa miyekej akin ueliyaj tokayaj omijkaj ipan tlaluaktli.

⁵ Jehová okimijli ika aman miyek nopatlaskia. Xok ijkon tokaskiaj ken yeuejkaui. Ijkuak ijkon kimijlitoya, yejua noijki okimijli: “Xpiyakan cuidado para maka mechkajkayauaskej niman nenkitlalkauiskej toTEKO. Maka nenkinmauistiliskej oksekimej dioses, niman maka nemotlakuantelketsaskej imixpan” (Deut. 11:16, 17). ¿Tleka okimijli maka makinueyichiuakan tajtsitsintin tlen xmelajkej ijkuak kimijlitoya ika okse tlamantik tokaskiaj?

⁶ Jehová kimatstoya ika israelitas kinekiskiaj yaskej intech kalpamej kampa xkitekichiuiliayaj Jehová niman ijkon ueliskej kenon tokaskej. Kema, cananeos melak ueliyaj tokayaj xijkon ken itekipanojkauan toTajtsin niman miyek ueliskiaj intech. San ika, tla ijkon kichiuayaj, israelitas xkuajli onkisaskiaj. Cananeos tlaneltokayaj itech Baal, kineltokayaj ika yejua  itlatki katka iluikak niman ika yejua kichiuaya makiyaui. Jehová xkinekiya ika israelitas makineltokakan yejon tlen xmelauak. San ika, israelitas miyekpa okiueyichiujkej Baal (Núm. 25:3, 5; Juec. 2:13; 1 Rey. 18:18). ¿Kenon Satanás ouel okinkajkayauj israelitas? Matikitakan.

7. ¿Kenon onotlatlatak intlaneltok israelitas ijkuak okalajkej ipan Tlajli tlen Jehová yokimijlika kinmakas?

⁷ Kachtopa, Satanás ouel okinkajkayauj israelitas pampa okikuik tlen melak kinekiyaj. Yejuamej kinekiyaj makiyaui niman ijkon matlapatsiui kampa otokakej. Ipan Tlajli tlen Jehová yokimijlika kinmakas, xmás kiyauiya desde itlamiyan abril hasta septiembre. Tla kiyauiya ijkuak peuaya octubre, kuakon kuajli tlakiya tlen kitokayaj. Kalpamej tlen nisiuj onkatkaj kinemiliayaj ika nonekiya kichiuaskej itlaj niman ijkon tajtsitsintin kichiuaskiaj makiyaui. Satanás okichiuj ika israelitas makineltokakan ika tla kinekiyaj kuajli chantiskej niman kuajli nemiskej, nonekiya kichiuaskej yejon costumbres tlen xkuelita toTajtsin. Akin xtlaneltokayaj itech Jehová okinemilijkej ika san ijkon ueliskia kiyauis, kuakon, okiueyichiujkej Baal.

8. ¿Kenon noijki otekajkayauj Satanás?

⁸ Ika ome, Satanás noijki ouel okinkajkayauj pampa okikuik tlen israelitas kileuiayaj. Kalpamej tlen xkitekichiuiliayaj toTajtsin melak auilnemiyaj. Ipan inteopanuan, tlakamej niman siuamej auilnemiyaj niman ijkon kitlaniyaj tomin. Yejon kalpamej xsan kitekauiliayaj ijkon manochiua, yejuamej kuajli kitayaj auilnemilistli niman ijkuak se tlakatl notekaya iuan okse tlakatl noso ijkuak se siuatl notekaya iuan okse siuatl (Deut. 23:17, 18; 1 Rey. 14:24). Kinemiliayaj ika nochi yejuin tepaleuiaya niman ijkon tajtsitsintin ueliskiaj kichiuaskiaj matlatlaki. Miyekej israelitas okinyoltilan yejuin auilnemilistli niman opeujkej kinueyichiuaj tajtsitsintin tlen xmelajkej. Okinokauilijkej ika Satanás makinkajkayaua.

9. Ken kijtoua Oseas 2:16, 17, ¿kenon Satanás okichiuj ika miyekej makilkaujtiakan Jehová?

⁹ Ika yeyi, Satanás okichiuj ika miyekej makilkaujtiakan Jehová. Ijkuak nemiya teotlajtoketl Jeremías, Jehová okijto ika teotlajtokej akin xmelajkej okichiujkej ika israelitas makilkauakan itoka Jehová ipampa Baal (Jer. 23:27). Nesi ika israelitas xok kikuiyaj itoka toTajtsin, yejuamej san kikuiyaj itoka Baal, tlen kijtosneki “NoTeko”. Ijkon, itekipanojkauan toTajtsin xok kimatiyaj akinon katka Jehová niman akinon katka Baal, yejon okichiuj makinelokan ken kiueyichiuayaj Baal niman ken kiueyichiuayaj Jehová (xpoua Oseas 2:16, 17, TNM). * *

10. ¿Kenon tekajkayaua Satanás ipan yejuin tonajli?

¹⁰ Ijkon ken yeuejkaui, Satanás san noijki ken tekajkayaua ipan yejuin tonajli. Yejua kikui tlen kinekij tlaltikpakchanejkej, noijki kikui auilnemilistli niman kichiua makilkaujtiakan Jehová. Kachtopa matikitakan kenon kichiua ika miyekej makilkaujtiakan Jehová.

11. ¿Kenon Satanás yokichiuj ika miyekej makilkaujtiakan Jehová?

¹¹ Satanás kichiua ika miyekej makilkaujtiakan  Jehová. Ijkuak iapóstoles Jesús yomijkaj, sekimej akin kijtouayaj ika kichiuayaj ken Cristo opeujkej temachtiaj tlen xmelauak (Hech. 20:29, 30; 2 Tes. 2:3). Yejon okichiuj ika tlaltikpakchanejkej makilkaujtiakan toTajtsin akin melauak. Yejuamej xok kitlaliayaj ipan Biblia itoka toTajtsin, san kitlaliayaj “toTeko” noso okse tlamantik kijkuilouayaj. Yejua ika, akin kipouayaj Biblia xueliyaj kimatiyaj kemanon noteneujtoya Jehová niman kemanon oksekimej “tekomej” (1 Cor. 8:5). Okikuikej “toTeko” niman ijkon ika kitokayotiskej Jehová niman Jesús, yejon okichiuj maka manasikamati ika toTajtsin niman ikoneuj xsan no yejuamej (Juan 17:3). Niman yejuin noijki okichiuj manoneltoka itech trinidad, itlaj tlen Biblia xtemachtia. Yejua ika, miyekej kijtouaj ika toTajtsin xuelis tikixmatiskej nion xuelis tikmatiskej akinon yejua. ¡Yejon se ueyi tlakajkayaualistli! (Hech. 17:27).

12. a) ¿Tlenon yotemachti tlaneltokijli tlen xmelauak? b) Ijkon ken kijtoua Romanos 1:28-31, ¿tlenon yopanok ipampa yejuin?

¹² Satanás kikui tlen kileuiya totlalnakayo. Ipan itonaluan israelitas, Satanás okikuik tlaneltokijli tlen xmelauak niman ijkon miyekej maauilnemikan. Aman noijki ijkon kichiua. Tlaneltokijli tlen xmelauak xsan kitekauilia maauilnemilo, noijki kichiua manesi ika yejon xtlajtlakojli. Yejua ika, miyekej akin kijtouaj kitekichiuiliaj toTajtsin xok kitlakamatij itlanauatiluan toTajtsin. ¿Tlenon yopanok pampa ijkon nochiua? Apóstol Pablo kiteneua ipan amatlajkuilojli tlen okintitlanili romanos (xpoua Romanos 1:28-31). Itech “on tlen xkitocaroua kichiuaskej” tlaltikpakchanejkej, ompa kalaki nochi auilnemilistli, niman noijki ijkuak se tlakatl noteka iuan okse tlakatl niman ijkuak se siuatl noteka iuan okse siuatl (Rom. 1:24-27, 32; Apoc. 2:20). Kuajli tikitaj ika noneki matiktlakamatikan tlen kijtoua Biblia.

13. ¿Kenon noijki tekajkayaua Satanás?

¹³ Satanás kikui tlen melak tiknekij. Tinochimej tiknekij tikpiyaskej tlen techpoloua niman tikinmakaskej tochanejkauan tlen kinpoloua. Ika yejon, tiknekij tiueliskej se tekitl (1 Tim. 5:8). Niman tikchiuaj yejuin ijkuak tiauej escuela niman ijkuak kuajli tomachtiaj. San ika, noneki totlajpiyaskej. Ipan miyek países, xsan temachtiaj tlen uelis tepaleuis, noijki temachtiaj tlen  kinemiliaj tlaltikpakchanejkej. Kimijliaj akin yauej escuela maka matlaneltokakan itech toTajtsin niman maka makipatiojkaitakan Biblia. Kimijliaj ika tejuamej tiyoltokej ipampa evolución, niman akin tlamachilisejkej tlaneltokaj itech yejon (Rom. 1:21-23). Nochi yejon tlanemililtin kixnamiki ken toTajtsin tlanemilia (1 Cor. 1:19-21; 3:18-20).

14. ¿Kenon teijtlakoua intlanemililuan tlaltikpakchanejkej?

¹⁴ Intlanemililuan tlaltikpakchanejkej kixnamikij itlanauatiluan toTajtsin pampa xtemachtiaj ikualneskayouan toTajtsin, temachtiaj “tlen xkuajli keleuiya intlalnakayo” (Gál. 5:19-23). Niman yejon kichiua ika se manoueyimati, kuakon tlaltikpakchanejkej san no yejuamej peuaj notlasojtlaj (2 Tim. 3:2-4). Yejuin kixnamiki tlen Jehová kineki, pampa Jehová kineki matiyolyemankej (2 Sam. 22:28). ¿Tlenon inpan yonochiuj sekimej tokniuan akin yonomachtijkej carreras universitarias? Intlanemililuan tlaltikpakchanejkej yokijtlakojkej intlamachilis. Matikitakan tlenon ipan onochiuj se tokniuj siuatl.

15, 16. ¿Tlenon tiuelij itech tlen ipan onochiuj se tokniuj siuatl?

¹⁵ Se tokniuj akin youejkauj ipantsin 15 xiuitl ika kitekichiuilia toTajtsin kijtoua: “Nejua yoninoapolaktijka, miyekpa yonikpoujka niman yonijkajka kenon teijtlako timomachtis universidad. San ika, xonitlakak. Oniknemili ika nejua xnechijtlakoskia”. ¿Tlen tlauejli okipix? Yejua kijtoua: “Nonekiya uejkaujtipan ninomachtijtos niman melak ninokojtiliaya ninomachtis, kuakon xok niueliya nikchiuiliaya teoyotl Jehová ijkon ken yeuejkaui; pampa melak nisiauiya, hasta xnechyolpaktiaya nitlajtos  itech Biblia ijkuak nontenojnotsaya, niman noijki xok kuajli ninomachtiaya tlen noitaskia ipan tlanechikoltin. Onikitak ika melak yoninotekimakaka ipan universidad niman xok kuajli ninouikaya iuan Jehová. Melak kuajli ika onikasikamat ika nonekiya nijkauas yejon. Niman ijkon onikchiuj”.

¹⁶ ¿Kenon yopeujka tlanemiliaya tokniuj pampa nomachtijtoya? Yejua technankilia: “Nipinaui nikijtos ika universidad onechmachti san manikitsto tlenon kichiuaj oksekimej, melak nikintejteneuaya tokniuan; nikchiaya maka keman manopopolokan, niman xok intech ninonisiuiaya. Ouejkauj ika onikpatlak ken nitlanemiliaya. Tlen nopan onochiuj onechititi ika noneki nochipa manijkaki tlen techijlia toTajtsin iluikakchane itechkopa ikalpan. Jehová melak kuajli nechixmatiya xijkon ken nejua. ¡Tla san nitetlakamatiskia, xnikixnamikiskia miyek tlauejli!”.

17. a) ¿Tlenon xkipiya ika tokauiliskej? b) ¿Tlenon tikitaskej ipan okse tlamachtijli?

¹⁷ Maka keman matokauilikan ika Satanás matechkajkayaua  “ika on xkuajli temachtilistli tlen xmelauak”. Nochipa matotlajpiyakan itech ken tekajkayaua (1 Cor. 3:18; 2 Cor. 2:11). Maka matokauilikan ika Satanás makichiua matikilkauakan akinon Jehová niman kenon kineki matiktekichiuilikan. Matikintlakamatikan itlanauatiluan Jehová. Niman maka matijkauilikan ika Diablo makichiua maka matiktlakamatikan tlen toTajtsin techijlia. Aman, ¿tlenon uelis tikchiuaskej tla tikitaj ika yotechijtlako ken tlanemiliaj tlaltikpakchanejkej? Ipan okse tlamachtijli tikitaskej kenon iTlajtol toTajtsin techpaleuis matijkixtikan tlanemililtin niman costumbres tlen saliujtokej ipan totlamachilis (2 Cor. 10:4, 5).