1, 2. a) ¿Tleka san noijki tlen xkuajli onka ipan tlaltikpaktli ken se xkuajli tlakatl akin ikimiktiskej? (Xkita tlaixkopinajli kampa peua tlen tomachtijtokej). b) ¿Kenon nomachiliskej akin nemij ipan iluikak niman ipan tlaltikpaktli ijkuak popoliuis tlen xkuajli onka ipan tlaltikpaktli?

XTLANEMILI itech yejuin: se xkuajli tlakatl yokijlikej ika ikimiktiskej. Aman, yejua kuikaj kampa konmiktiskej. Maski yejon xkuajli tlakatl ok yoltika niman nesi chikaujtok, uelis tikijtoskej ika yomik, pampa sa achijtsin poliui ika kimiktiskej.

² Tlen xkuajli onka ipan tlaltikpaktli kentla yejon xkuajli tlakatl akin sa achijtsin poliui ika mikis. Biblia kijtoua: “Niman in tlaltikpaktli ye tlantiu” (1 Juan 2:17). Jehová yokijto ika tlen nochiujtika aman xok uejkauis ika tlamis, niman kuajli tikmatstokej ika ijkon nochiuas. San ika, onka tlen nopatla itech yejon xkuajli tlakatl niman tlen xkuajli onka ipan tlaltikpaktli. Sekimej tlaltikpakchanejkej uelis kinemiliskej ika xkinamiki tlen yonoijto kichiuiliskej, niman kiyejyekoskej maka makimiktikan. San ika, tlen kijtoua Jehová nochipa kichiua ika melajkayotl. Ika yejon, kinamiki kipopolos tlen xkuajli panotok ipan tlaltikpaktli (Deuteronomio 32:4). Xuejkaujtipan poliui ika yejkos tonajli ijkuak tlapopoliuis. Sakin,  ijkuak yopopoliuj tlen panotok aman, nochimej akin nemij iluikak niman ipan tlaltikpaktli kijtoskej ika okinamik tlen Jehová okijto kichiuas. ¡Melak kuajli nomachiliskej!

3. ¿Tlenon naui tlemach popoliuis ijkuak uajlas iTekiuajyo toTajtsin?

³ ¿Tlenon xok onias ijkuak popoliuis tlen onka ipan tlaltikpaktli? Yejuin nochi tlemach tlen xkuajli tlen tikixnamikij mojmostla ipan tonemilis. Nochi yejon tlemach sa achijtsin popoliui ika popoliuis. Yejuin tlen noneki nomatis ken “kuajli tlajtojli” itech Tekiuajyotl (Mateo 24:14). Ipan yejuin tlamachtijli, tikitaskej naui tlemach tlen popoliuis ijkuak iTekiuajyo toTajtsin uajlas: xkuakualtin tlaltikpakchanejkej, xkuakualtin organizaciones, tlen xkuajli nochiua niman ken xkuajli tinemij. Ijkuak tikitaskej yejuin, tomachtiskej kenon techijtlakoua, tlenon kichiuas Jehová ika yejon niman ika tlenon kipatlas.

4. ¿Kenon techijtlakoua xkuakualtin tlaltikpakchanejkej aman?

⁴ ¿Kenon techijtlakoua xkuakualtin tlaltikpakchanejkej aman? Pablo, itlatitlankauj Cristo, okijto ika ipan san itlamiyan tonaltin yeskia “sanoyej xkuajli tonaltin”. Kuakon noijki okijto ika “xkuajkualtin tlakamej niman tlakajkayajkej tlakamej, inyojlo más ijtlakautias” (2 Timoteo 3:1-5, 13). ¿Yotikitak ika panotika yejuin? Timiyekej yotitlajyouijkej inpampa yejon xkuakualtin tlaltikpakchanejkej, pampa kichiuaj tlen melak xkuajli, tetlaueltotokaj niman techikoitaj ika tlauejli. Sekimej nion xkiyakanaj tlen xkuajli kichiuaj. Oksekimej nesi ika kinekij kinpaleuiskej tlaltikpakchanejkej, san ika, yejon xmelauak, pampa san kinekij kinchiuiliskej tlen xkuajli. San ika, maski tla xtexchiuiliaj itlaj tlen xkuajli, kema techijtlakoua pampa nemij xkuakualtin tlaltikpakchanejkej. Melak xkuajli tomachiliaj ijkuak tijkakij kenon kintlayouiltiaj kokonej, ueuentsitsintin niman oksekimej akin xuelij nopaleuiyaj. Yejon xkuakualtin tlaltikpakchanejkej ika tlen kichiuaj nesi kentla yolkamej noso espíritus xkuakualtin (Santiago 3:15, TNM). San ika, melak teyolpakti pampa onka tlamachialistli tlen temaka iTlajtol toTajtsin.

5. a) ¿Tlenon ok uelis kichiuaskej xkuakualtin tlaltikpakchanejkej? b) ¿Tlenon inpan nochiuas akin xkinekiskej nopatlaskej?

⁵ ¿Tlenon kichiuas Jehová? Aman Jehová kineki ika xkuakualtin tlaltikpakchanejkej manopatlakan (Isaías 55:7). Maski yejuin tlen panotok aman xok uejkauis ika kipopoloskej, tlaltikpakchanejkej ok xkinyolkuitiaj. ¿Kuakon tlenon inpan nochiuas akin xkinekiskej nopatlaskej niman kipaleuiskej tlen panotok hasta ijkuak yejkos ueyi tlajyouilistli? Jehová yokijto kinpopolos nochimej xkuakualtin tlaltikpakchanejkej (xpoua Salmo 37:10). * Ipan yejuin tonajli, miyekej youelkej kiyanaj tlen xkuajli kichiuaj niman miyekpa xtlaj kinchiuiliaj (Job 21:7, 9). San ika, Biblia techilnamiktia: “Ixtololojuan toTajtsin kitstokej nochi iojuiuan tlakatl, niman Yejua kita nochiuiyan kampa nejnemi. Xonka tlayoualyotl nion tilauak tlaseualyotl kampa akin kichiuaj tlen xkuajli uelis niyanaskej” (Job 34:21, 22). Kuakon xtlaj uelis niyanas ixpan Jehová. Yejua ueli kita nochi tlen kichiujtokej akin xkuakualtin. Sakin ijkuak yopanok Armagedón, yejuamej xok nemiskej. Niman xok keman tikimitaskej (Salmo 37:12-15).

6. ¿Akinomej ok nemiskej ijkuak xkuakualtin tlaltikpakchanejkej popoliuiskej, niman tleka yejuin se kualtsin tlajtojli?

⁶ ¿Akinomej ok nemiskej ijkuak xkuakualtin tlaltikpakchanejkej popoliuiskej?  Jehová techijlia: “Akin yolmelaujkej nemiskej ipan tlaltikpaktli, niman nochipa ipan chantiskej”. Noijki techijlia: “Akin yolmelaujkej nemiskej ipan tlaltikpaktli, niman nochipa ipan chantiskej” (Salmo 37:11, 29). ¿Akinomej “yolmelaujkej”? Tlaltikpakchanejkej akin yolyemankej akin nomachtiaj itech Jehová niman kitlakamatij. Noijki “yolmelaujkej” pampa kinekij kichiuaskej tlen toTajtsin kijtoua ika kuajli. Ipan yejuin tlaltikpaktli, nemij miyekej xkuakualtin tlaltikpakchanejkej xijkon ken yolmelaujkej. San ika, ipan yenkuik tlaltikpaktli, san nemiskej tlaltikpakchanejkej akin yolmelaujkej, niman yejuamej kichiuaskej tlaltikpaktli manokuepa se xochitlalpan.

7. ¿Kenon xkuakualtin organizaciones techijtlakoua aman?

⁷ ¿Kenon xkuakualtin organizaciones techijtlakoua aman? Miyek tlen xkuajli nochiua ipan yejuin tlaltikpaktli ipampa seki organizaciones niman xipampa san se tlaltikpakchane. Onka organizaciones ika tlaneltokiltin akin kinkajkayauaj miyekej tlaltikpakchanejkej. Se neskayotl, yejuamej xkijtouaj akinon yemelak toTajtsin, yejuamej kijtouaj ika Biblia xuelis itech titlaneltokaskej niman tekajkayauaj itech tlen ipan nochiuas tlaltikpaktli niman tlaltikpakchanejkej. Xkuakualtin tekiuajkej kichiuaj ika maonia guerras, makintlauelitakan akin oksekan ualeuaj niman kintlayouiltiaj akin xkipiyaj tlen ika nopanoltiskej. Yejon tekiuajkej melak yonotomintijkej niman kipiyaj kojtilistli pampa techikoitaj niman nokauiliaj makintomintlaxtlauilikan. Uejueyimej empresas tlen san kitejtemouaj kipiyaskej miyek tlemach noijki melak yokijtlakojkej tlaltikpaktli. Yejuamej xkinmakaj tlaltikpakchanejkej tlen kinamiki kiseliskej niman ika yejon san sekimej melak yonotomintijkej. Kuajli nesi ika xkuakualtin organizaciones kipiyaj miyek tlajtlakojli ika onka tlajyouilistli ipan yejuin tlaltikpaktli.

8. ¿Tlenon kijtoua Biblia inpan nochiuas organizaciones tlen nesi ika kipiyaj kojtilistli yejuin tonajli?

⁸ ¿Tlenon kichiuas Jehová? Ueyi tlajyouilistli peuas ijkuak tekiuajkej kixnamikiskej nochi tlaneltokiltin xmelajkej, tlen Biblia kintokayotia ken Ueyixtika Babilonia niman kijtoua ika auilnemi (Apocalipsis 17:1, 2, 16; 18:1-4). Yejon tlaneltokiltin xmelajkej popoliuiskej. San ika ¿tlenon inpan nochiuas nochimej xkuakualtin organizaciones? Biblia kijtoua ika yejuamej kentla tepemej niman “tlaluaktsitsintin yejuan onokej atlajkotian” pampa nesi chikaujkej (xpoua Apocalipsis 6:14). San ika, tekiuajkej niman nochimej organizaciones tlen xkipaleuiyaj iTekiuajyo toTajtsin popoliuiskej. Yejuin nochiuas ijkuak ontlamis ueyi tlajyouilistli (Jeremías 25:31-33). Kuakon itech yejon tonajli ika tlayekapan, xok keman onias xkuakualtin organizaciones.

9. ¿Tleka uelis kuajli tikmatstoskej ika yenkuik tlaltikpaktli melak kuajli noyekanas?

⁹ ¿Tlenon ika nopatlas xkuakualtin organizaciones? ¿Onias okse organización ipan tlaltikpaktli ijkuak yopanok Armagedón? Biblia kijtoua: “Tejuamej tikmachixtokej on yenkuik cielo iuan on yenkuik tlaltikpaktli yejuan Dios otechprometerouilij. Ompa, tej, nochimej nouikaskej yolmelajkej” (2 Pedro 3:13). Iluikamej niman tlaltikpaktli tlen xyenkuikej kijtosneki xkuakualtin tekiuajkej niman tlaltikpakchanejkej akin kinyekanaj. ¿Tlenon kinpatlas ijkuak yopopoliujkej? “Yenkuik cielo iuan on yenkuik tlaltikpaktli”. “Yenkuik cielo” noso yenkuik iluikamej kijtosneki se yenkuik tekiuajyotl, Tekiuajyotl tlen okimakakej Jesucristo niman 144,000 akin iuan tekiuajtiskej. Yenkuik tlaltikpaktli kijtosneki tlaltikpakchanejkej akin kinyekanas iTekiuajyo  toTajtsin. Jesús niman akin iuan tekiuajtiskej kiteititiskej ikualneskayouan Jehová, toTajtsin akin kuelita nochi kuajli manoyekana (1 Corintios 14:33). Kuakon, “yenkuik tlaltikpaktli” melak kuajli noyekanas. Nemiskej kuakualtin tlakamej akin kitaskej nochi kuajli manochiua (Salmo 45:16). Yejon tlakamej kinyekanas Cristo niman 144,000. San xkonemili kenon yes ijkuak nochimej xkuakualtin organizaciones nopatlaskej san ika se tlen san sekan nemis niman xkeman kichiuas tlen xkuajli.

10. ¿Tlenon melak xkuajli onka kampa tichanti niman kenon tejua niman mochanejkauan yomechijtlako?

¹⁰ ¿Kenon techijtlakoua tlen xkuajli aman? Tinemij ipan tlaltikpaktli kampa melak nochiua auilnemilistli, xmelajki noyekanaj niman melak temojti ken nokokouaj. Tlen ika noyolpaktilo kichiua ika yejuin tlemach manesi ken itlaj kualtsin niman kipijpinaujtia itlanauatiluan Jehová itech tlen kuajli niman tlen xkuajli (Isaías 5:20). Tajtin melak noneki makintlajpiyakan inkoneuan itech yejon xkuajli tlanemililtin. Xsan yejuamej ijkon noneki kichiuaskej, tinochimej noneki tochikauaskej niman ijkon tiktlajpiyaskej ken iuan touikaj Jehová kampa xkitlakaitaj itlanauatiluan toTajtsin.

11. ¿Tlenon tomachtiaj itech tlen Jehová okichiuili Sodoma niman Gomorra?

¹¹ ¿Tlenon kichiuas Jehová ika tlen xkuajli nochiua? Matiknemilikan tlen Jehová okichiuj ika tlen xkuajli panotoya ipan Sodoma niman Gomorra (xpoua 2 Pedro 2:6-8). Lot katka se tlakatl yolmelaujki. Yejua niman ichanejkauan otlajyouijkej ipampa nochi tlen xkuajli kichiujtoyaj tlaltikpakchanejkej inyeualiyan. Jehová okinpopolo yejon kalpamej niman nochi iyeualiyan niman ijkon okipopolo tlen xkuajli nochiujtoya ompa. San ika, noijki tlen okichiuj teititia “ika no ijkon impan nochiuas” xkuakualtin tlaltikpakchanejkej ipan yejuin tonajli. Ijkon ken Jehová okipopolo nochi auilnemilistli tlen ompa nochiuaya, noijki ijkon kichiuas ijkuak kipopolos tlen panotok aman.

12. ¿Tlenon tikneki tikchiuas ijkuak yopopoliuj nochi tlen xkuajli panotok?

¹² ¿Ika tlenon nopatlas tlen xkuajli onka aman? Ipan yenkuik tlaltikpaktli, tikpiyaskej miyek tlen tikchiuaskej tlen techyolpaktis. Se neskayotl, tikchiuaskej ika tlaltikpaktli manokuepa se xochitlalpan niman tikinchijchiuaskej tokaluan niman tikinchijchiuiliskej akin tikintlasojtlaj. Noijki tikinseliskej melak miyekej akin yoliuiskej niman tikinmachtiskej itech Jehová niman itech nochi tlen yokichiuj ipampa tlaltikpakchanejkej (Isaías 65:21, 22; Hechos 24:15). Ipan yejon tonaltin, tikpiyaskej miyek tekitl tlen techyolpaktis tejuamej niman kiueyiteneuas Jehová.

13. ¿Tlenon panoua aman pampa okixnamijkej Jehová ipan xochitlalpan Edén?

¹³ ¿Kenon techijtlakoua ken xkuajli tinemij? Ipan yejuin tlaltikpaktli, nemij xkuakualtin tlaltikpakchanejkej, xkuakualtin organizaciones niman nochiua tlen xkuajli. Nochi yejuin kichiua maka kuajli matinemikan. Tinochimej techijtlakoua tlen xkuajli panotok, ken guerras, xtlaj ika topanoltiskej, ika nemij akin techikoitaj, onka kokolistli niman mikilistli. Yejuin tlemach tlen xkuajli onka ipampa Satanás, Adán niman Eva pampa yejuamej okixnamijkej Jehová. Niman tinochimej yotechijtlako ipampa tlen okichiujkej.

14. ¿Tlenon kichiuas Jehová ipampa ken xkuajli tinemij?

¹⁴ ¿Tlenon kichiuas Jehová ipampa ken xkuajli tinemij? Matitlanemilikan itech seki  tlemach tlen kichiuas. Jehová kijtoua ika kipopolos nochi guerras (xpoua Salmo 46:8, 9). * Yejua kipopolos kokolistli (Isaías 33:24). Noijki kipopolos mikilistli niman xok keman onias (Isaías 25:8). Yejua kichiuas ika matikpiyakan tlen ika topanoltiskej (Salmo 72:12-16). Jehová kipopolos nochi tlen kichiua maka kuajli matinemikan ipan yejuin tonajli. Yejua noijki kipopolos ken Satanás niman espíritus xkuakualtin kichiuaj xkuajli matlanemilikan tlaltikpakchanejkej (Efesios 2:2).

15. ¿Tlenon xok keman onias sakin tla yopanok Armagedón?

¹⁵ San xkonemili kenon tinemiskej ipan tlaltikpaktli kampa xok onias guerras, kokolistli noso mikilistli. Xok nemiskej soldados, xok onias armas, kampa tepajtilo, xok nemiskej tlapajtikej nion kampa notokalos. Xok onias tlen xkuajli. Ika yejon xok nonekis manemikan policías, notlaliskej alarmas noso tiktsakuas mokal ika llave. Nochi tlen aman techajmana popoliuis niman xok keman onias.

16, 17. a) ¿Kenon nomachiliskej akin makisaskej itech Armagedón? Xkijto se neskayotl. b) ¿Tlenon uelis tikchiuaskej niman ijkon timakisaskej ijkuak popoliuis tlen xkuajli onka ipan tlaltikpaktli?

¹⁶ ¿Kenon yes nemilistli ijkuak popoliuis ken xkuajli tinemij? Kanaj ouijtika tiknemiliskej yejon. Melak yotiuejkaujkej tinemij kampa onka tlen xkuajli, niman kanaj nion xok tikmatij kenon yejuin kichiua melak matokuaajmanakan. Matikonnemilikan yejuin: tlaltikpakchanejkej akin chantij nisiuj kampa panoua tren kanaj hasta yonomatkej kikakiskej kenon chikauak kakisti. Niman tlaltikpakchanejkej akin chantij nisiuj kampa konxiniaj tlasojli nion xok kimachiliaj kenon xkuajli ijnekuisti. San ika, ijkuak Jehová kipopolos nochi tlen xkuajli panotok, melak kualtsin tomachiliskej.

¹⁷ ¿Tlenon kipatlas tlen aman melak techkuaajmanaj? Salmo 37:11 kijtoua: “Kinextiskej inyolpakilis ika ueyi yolseuilistli”. ¡Melak techyolpaktia tikmatiskej ika yejuin tlen Jehová kineki topampa! Ipan yejuin tonaltin ijkuak melak tokuaajmanaj, matikchiuakan nochi tlen tiueliskej niman ijkon uelis tinemiskej nisiuj itech Jehová niman ikalpan. Tikmatstokej ika melak kualtsin tlen tikchiaj. Kuakon, nochipa matitlanemilikan itech yejon, niman matikimijlikan oksekimej (1 Timoteo 4:15, 16; 1 Pedro 3:15). Kuakon, uelis kuajli tikmatstoskej ika ijkuak yejkos tlapopolouilistli, tejuamej timakisaskej niman nochipa melak tiyolpakiskej.