Jehová kichij iní̱n Ta̱jli iga tejeme̱n ompa matonokan. Pan Biblia kijtowa: «Cieloj, inó̱n de Jehová, pero ta̱jli kimaʼ ipilowa̱n tajta̱gamej» (Salmo 115:16). Jehová ayá̱ kichij Adán wan Eva iga maonokan ajko wan iga ompa makipiakan ipilowa̱n. Achto iga makichi̱wa ta̱gaʼ, Dios kichij angelmej iga ompiga maonokan (Job 38:4, 7). Jehová kita̱lij yej achto ta̱gaʼ pan se̱ monsajta̱jli, yej ito̱ka̱ Edén (Génesis 2:15-17). Dios kinekiá iga Adán wan nochi ipilowa̱n mayolpa̱kikan, wan maonokan nochipa pan Ta̱jli. Tajto̱lti Salmo 37:29.

Pero ayá̱ pan nochi Ta̱jli onoya monsajtiʼ, sinoke pan san Edén ka̱n cha̱ntitoyaj Adán wan Eva. Dios kijlij iga makipiakan ipilowa̱n iga mate̱mi Ta̱jli de tajta̱gamej wan siwa̱tkej, wan ijkí̱n welij makimonsajtili̱kan nochi Ta̱jli (Génesis 1:28). Ta̱jli nochipa ya̱ti icha̱n de nochi tajta̱gamej wan siwa̱tkej, wan nike̱man poliwis. Pan Biblia kijtowa: «Yéj, kita̱lij ta̱jli kan onoʼ, wan ompa onos nochipa» (Salmo 104:5).

Dios kiki̱xtij Adán wan Eva pan Edén iga akitajto̱lkakikej. Inó̱n iga, inó̱n ta̱jli yej monsajtiʼ poliwiʼ wan nise̱ ta̱gaʼ welij kichi̱wa seuʼ biáj. Pan Itajto̱l Dios kijtowa iga «ta̱jli momaʼ pan ima̱ de yej kichi̱waj yej aye̱kti» (Job 9:24). Tajto̱lti Génesis 3:23, 24.

¿Kijtojneki iní̱n iga ompa tamiʼ yej Dios kinekiá iga tejeme̱n? ¡Ayá̱! Iga Dios nochi welij kichi̱wa, wan yej kijtowa yéj nochipa mochi̱wa (Isaías 45:18). Dios yawi kichi̱wati iga tejeme̱n matonokan nochipa pan Ta̱jli, ijkó̱n ken yéj kinekiá achto. Pan Biblia kijtowa: «Yej yo̱lyama̱nimej yawij mocha̱nti̱tij pan ta̱jli wan yawij yo̱lpa̱kitij wan kipiaskej komati yo̱lsewilis. Xikta̱li nochi moyo̱loj pan Jehová wan xiktoka iojti, wan yéj mitsweychi̱was iga ximocha̱nti pan ta̱jli. Kua̱ mapoliwikan yej kichi̱waj yej aye̱kti, téj tiá tikitati» (Salmo 37:11, 34).

Nochi Ta̱jli yawi mochi̱wati sej monsajtiʼ, iní̱n yawi kichi̱wati Jesús iga yéj Tekiwaj yej Dios kitapejpen. Yéj wan iyangelmej yawij  kipolo̱tij nochimej yej akinekij Dios, pan Armagedón, iní̱n kijtojneki, tamijmiktilis de Dios. De ompa, Jesús yawi kitsakuati Tsitsimiʼ o Satanás, mil xiwiʼ. Siga tiktajto̱lkakij Dios ayá̱ timikiskej pan Armagedón, iga Jesús yawi te̱ojkuilti̱ti wan te̱manawi̱ti, wan de ompa tonoskej nochipa pan se̱ Ta̱jli yej puxsan monsajtiʼ. Tajto̱lti Revelación (Apocalipsis) 20:1-3 wan 21:3, 4.

Kua̱ kitaj tejté̱ yej pano̱toʼ a̱man, sekin tajla̱mikij iga tiawij tipoliwitij. Inó̱n iga, ¿ke̱man yawi kitami̱ti Dios nochi tejté̱ yej aye̱kti? Jesús kijtoj sekin tejté̱ yej panoskiá achto iga maasi tamilis. A̱man némiya panowa yej kijtoj Jesús, iní̱n kine̱xtiá iga tonókejya pan itamilis de tejté̱ yej aye̱kti. Tajto̱lti Mateo 24:3, 7-14, 21, 22.

Desde ajko Jesús yawi kigoberna̱ro̱ti mil xiwiʼ iní̱n Ta̱jli wan yawi kitami̱ti nochi tejté̱ yej aye̱kti yej a̱man onoʼ (Isaías 9:6, 7; 11:9). Jesús yawi kichi̱wati tejté̱ yej ye̱kti iga yej kinekij Dios. Iga Jesús tekiwaj wan ya̱ti se̱ sacerdote, yawi kipojpowili̱ti nochi tejté̱ yej aye̱kti yej kipiáj. Dios yawi kichi̱wati iga Jesús makipolo kokolis, wan kichi̱was iga niágaj mawewejtiá wan niágaj mamiki. Tajto̱lti Isaías 25:8 wan 33:24.

Yej kitajto̱lkakij Dios yawij onotij pan Monsajta̱jli (1 Juan 2:17). Jesús kitekimaʼ idiscipulojwan iga makite̱mo̱kan yej kinekij makitajto̱lkakikan Dios wan makine̱xtili̱kan kén welij makichi̱wakan yej yéj kineki. A̱man Jehová nemi kimachtiá komati tajta̱gamej wan siwa̱tkej iga welij maonokan pan Monsajta̱jli (Sofonías 2:3). Pan Kajli ka̱n Monechkowaj yej Tajto̱lmoya̱waj de Jehová, momachtiáj te̱ welij kichi̱waj yej na̱miktijtokej iga mayo̱lpa̱kikan, wan no̱ momachtiáj kén welij kiskaltiáj ye̱kti ipilowa̱n. Ompa nochi te̱tajmej wan ipilowa̱n sekan momachtiáj de Dios, wan ijkó̱n kitaj kén kipale̱wiáj yej kijtowa Itajto̱l Dios. Tajto̱lti Miqueas 4:1-4.