Ko e tau vitiō he tau fonoaga faahimotu ha tautolu kua aamotia e tau loto ha tautolu mo e lagomatai ke holo ki mua e maamaaga he tau fakaakoaga he Tohi Tapu. Ko e Fonoaga Faahimotu 2020 “Always Rejoice”! ne fakakite 114 e vitiō, putoia 43 e lauga ne taute he tau matakainaga he Kau Fakatufono mo e tau lagomatai ha lautolu. Kua manamanatu nakai a koe ke he lahi he gahua mo e tau tupe ne fakaaoga ke taute aki e tau vitiō nei?

Kavi ke he 900 he tau matakainaga mai he lalolagi katoa ne foaki ha lautolu a tau magaaho mo e tau lotomatala ke lagomatai ke tuku fakalataha e fakaholoaga. Ne fakaaoga e lautolu teitei 100,000 e tulā he katoa ke lata mo e matagahua nei ke he ua e tau. Putoia ai foki 70,000 e tulā ma e taute tala Tohi Tapu ne 76 e minuti he Nehemiah: “The Joy of Jehovah Is Your Stronghold.”

Liga fitā he manamanatu a koe, kua loga e tau tupe ne fakaaoga ke lata mo e tau matakainaga nei kua foaki noa e tau magaaho, mo e lalagoaga ke he gahua mo e tau koloa fakaaoga, mo e tau fale kua lata ke taute e matagahua.

“Ko e Komiti Fakaako he Kau Fakatufono ne manako lahi ke putoia e tau aga fakamotu mo e tau matakavi kehekehe he tau vitiō ha tautolu. Lagomatai he puhala nei ke fakakite fakatonu ko e gahua ha tautolu kua putoia e tau matakainaga he lalolagi katoa,” he talahau e Jared Gossman, ne gahua mo e Audio/Video Services. “Ke hokotia e foliaga nei, ne 24 e matakau he 11 e motu kehekehe ne gahua auloa he matagahua nei. Ha ko e matagahua ne putoia e tau matakavi kehekehe he lalolagi katoa kua lahi mahaki e tupe, ke fakatokatoka ai, mo e ke leveki e gahua katoa.”

Ke maeke ke taute e loga he tau vitiō ha tautolu, kua lata ke moua e tau matini pauaki mo e tau vala (sets) mo fakaaoga. Ma e fakatai, ko e tau vala mo fakaaoga e Nehemiah: “The Joy of Jehovah Is Your Stronghold” ne talaga i loto he studio i Mt. Ebo ne tata ki Patterson, New York, U.S.A. Ke fakaaoga fakamitaki e tau tupe foaki mo e ke hakotika e fakatino he fakamauaga tuai he kifaga, ne talaga he tau matakainaga e tau mena ia he fakaaoga e tau koloa māmā ke fifitaki e tau kaupā i Ierusalema i tuai. Igatia e vala ia mo e ono e mita he tokoluga ne talaga mai he tau lapa akau mo e tuku aki e faux ko e tau mena fakamolū ne vali ke tuga e tau maka. Maeke e “tau kaupā” nei ke hikihiki ke felauaki mo e tau vala he kifaga, ti ai loga lahi e vala ne talaga. Ka e pete ia, teitei $100,000 (U.S.) ne lata ke talaga aki e tau mena nei ni hokoia ke fakaaoga he kifaga. *

He iloa e tau vala tala nei, kua fakamalikiti e loto fakaaue ha tautolu ma e fakaholoaga he fonoaga faahimotu he tau nei. Mauokafua a tautolu ko e tau gahua ne taute ke lata mo e fakaholoaga nei to fakaheke he lalolagi katoa a Iehova. Fakaaue ke he haau a tau foakiaga fakamokoi ke he gahua he lalolagi katoa ne tuku ai ke he donate.mr1310.com mo e falu puhala foki.