KUA aoga mo e kakano lahi e fekafekauaga ha tautolu. Ka e nakai maama oti he tau tagata ne fakamatala a tautolu ki ai e mena nei. Pete ne fiafia e tau tagata ke he mena ne talahau he Tohi Tapu, nakai logona hifo tumau e lautolu e latatonu ke fakaako e Kupu he Atua mo tautolu.

Ke tuga e fakatai ki a Gavin. Ne fano a ia he tau feleveiaaga he Fale he Kautu, ka e nakai manako a ia ke fakaako e Tohi Tapu. Fakamaama e Gavin kua tote lahi e maamaaga haana ke he Tohi Tapu ti nakai manako ke iloa he falu e mena nei. Hopoate a ia neke tala age ki a ia ke matutaki ke he taha lotu, ti nakai manako a ia ke fakavaia ai. Fēfē e manatu haau? Maeke nakai ke lagomatai a Gavin? Manamanatu ke he lauiaaga mitaki ka moua he tagata ha ko e tau fakaakoaga he Tohi Tapu. Pehē a Iehova ke he tau Isaraela: “To to hifo tuga ne hahau haku a vagahau; ke tuga ne uha ke he vao mui.” (Teutaronome 31:19, 30; 32:2) Kia fakaako a tautolu ke he falu mena hagaao ke he hahau ti fakatatai e fekafekauaga ha tautolu ki ai ke maeke ia tautolu ke lagomatai fakamitaki e “tau tagata oti kana.”​—1 Timoteo 2:3, 4.

Aumalū e hahau. Moua mai e hahau he hiki fakahaga e aumalū he matagi ke he tau tulutā he vai. Maeke fēfē he tau kupu ha Iehova ke “to hifo tuga ne hahau”? Ne vagahau a ia ke he tau tagata haana ke he puhala totonu mo e fakaalofa. Fifitaki e tautolu a ia ka fakakite e tautolu e fakalilifu ke he mena ne talitonu ki ai e falu. Fakamafana e tautolu a lautolu ke fakakakano ne lautolu ti taute ni e tau fifiliaga ha lautolu. Ka fakakite e tautolu e fiafia fakatagata pihia, to makai e tau tagata ke talia e mena ka talahau e tautolu, mo e to lauia mitaki e fekafekauaga ha tautolu.

Fakamaagiagi e hahau. To fakamaagiagi e fekafekauaga ha tautolu ke he falu ka manamanatu a tautolu ke he tau puhala kehekehe ke lagomatai a lautolu ke fakaako fakalahi e kupu mooli. Ko e matakainaga taane ne higoa ko Chris, ne foaki fakamua ki a Gavin e fakaako Tohi Tapu kua nakai fakaohooho ke talia ke fakaako. Ka e lali a ia ke kumi e tau puhala kehekehe ke fakatotoka aki a Gavin ka fakatutala ke he Tohi Tapu. Tala age a Chris ki a Gavin kua ha ha ai e fekau aoga ne fakatutala he Tohi Tapu katoa ti ko e fakaako hagaao ke he fekau nei to lagomatai ki a ia ke maama mitaki e tau feleveiaaga. Fakamaama mogoia e Chris na lagomatai he tau perofetaaga he Tohi Tapu a ia ke talitonu kua mooli e Tohi Tapu. Ko e fua, loga e fakatutalaaga ha laua ke he tau puhala ne fakamooli e tau perofetaaga. Kua fakamaagiagi he tau fakatutalaaga nei a Gavin, ti talia e ia e fakaako Tohi Tapu he mogo fakamui.

Aoga lahi e hahau ke he moui. He magahala vela mo e magomago i Isaraela, fai mahina he nakai tō e uha. He nakai aumalū e matagi ke moua e hahau, ne magomago e tau akau ti mamate. Talahau tuai e Iehova he vahā ha tautolu to tuga e vahā nakai fai uha, kakano, ko e tau tagata kua fia inu “ke he tau kupu a Iehova ke fanogonogo ki ai.” (Amosa 8:11) Mavehe e ia ko lautolu ne fakauku to “tuga e hahau mai ia Iehova” he fakamatala e lautolu e tala mitaki he Kautu ne lalago he ‘tau mamoe kehe.’ (Mika 5:7; Ioane 10:16) Ko e fekau ne fakamatala e tautolu ko e vala he tau foakiaga ha Iehova ke foaki e moui ki a lautolu ne fia inu ke he kupu mooli. Loto fakaaue nakai a tautolu ke he fekau nei?

Ko e hahau e monuina mai ia Iehova. (Teutaronome 33:13) Maeke e fekafekauaga ha tautolu ke eke mo monuina, po ke mena fakaalofa ki a lautolu ne talia. Ko e fakamonuina e fakaako Tohi Tapu ma Gavin ha kua lagomatai a ia ke moua e tau tali ke he tau hūhū oti haana. Mafiti e holo ki mua haana, papatiso, ti fiafia mogonei he fakamatala e tala mitaki he Kautu fakalataha mo e hoana haana ko Joyce.

He fakatatai e gahua fakamatala ha tautolu ke he hahau kua maeke ke lagomatai foki a tautolu ke maama ko e tau laliaga fakatagata ha tautolu he fekafekauaga kua aoga. Puhala fe? Lagomatai tote e tau tulutā takitaha he vai, ka e ka loga lahi e tau tulutā he vai kua aumalū lahi e fonua. Pihia foki, ko e tau mena ne taute e tautolu he fekafekauaga kua tuga e tote lahi ki a tautolu. Ka ko e fua he gahua fakalataha he tau fekafekau tokologa ha Iehova, kua fakamatala ai “ke he tau atu motu oti.” (Mataio 24:14) To eke nakai e fekafekauaga ha tautolu mo monuina mai ia Iehova ke he falu? Ē, to eke e fekau ha tautolu ke tuga e hahau ne aumalū, fakamaagiagi, mo e aoga lahi ke he moui!