1, 2. (a) Ko e heigoa kua putoia he mena kua “foaki noa nakai maeke ke fakamatala” he Atua? (e) Ko e heigoa e tau hūhū ka fakatutala a tautolu he vala tala nei?

KUA foaki e Iehova ki a tautolu e mena foaki noa po ke, mena fakaalofa ne mua ue atu he fakafano mai e Ia haana Tama fuataha ko Iesu ke he lalolagi! (Ioane 3:16; 1 Ioane 4:9, 10) Ne fakahigoa he aposetolo ko Paulo e mena fakaalofa nei ko e “mena kua foaki noa nakai maeke ke fakamatala.” (2 Korinito 9:15) Ko e ha ne fakaaoga e Paulo e talahauaga ia?

² Iloa e Paulo ko e poa ha Iesu ko e fakamooliaga to fakahoko oti e tau maveheaga homo ue atu he Atua. (Totou 2 Korinito 1:20.) Kakano e mena nei ko e “mena kua foaki noa nakai maeke ke fakamatala” he Atua kua putoia e poa ha Iesu mo e tau mena mitaki lahi oti mo e fakaalofa fakamooli kua fakakite e Iehova ki a tautolu. Ko e mena fakaalofa uho pihia kua nakai maeke ke fakamaama he ha puhala ka maama katoatoa e tautolu. Kua lata ke fēfē e logonaaga ha tautolu ha ko e mena fakaalofa uho nei? Fakalagalaga fēfē he mena fakaalofa nei a tautolu ke tauteute ma e Fakamanatuaga he mate he Keriso he Aho Lotu, Mati 23, 2016?

3, 4. (a) Fēfē e logonaaga haau ka atu he taha tagata e mena fakaalofa? (e) Liga hiki fēfē he mena fakaalofa uho e moui haau?

³ Fiafia a tautolu ka foaki mai he taha tagata e mena fakaalofa ki a tautolu. Ka e falu mena fakaalofa kua kakano lahi po ke uho ti maeke ke hiki e tau momoui ha tautolu. Ma e fakatai, manamanatu la kua putoia a koe he matahavala. Ko e fakahala he matahavala ko e mate. Ka e amanaki ni ti fai tagata ne nakai iloa e koe ne foaki ke moua e fakahala ka e nakai ko koe. Kua makai a ia ke mate ma haau! To taute fēfē he mena fakaalofa uho ia a koe ke logona hifo?

⁴ Ko e mena fakaalofa totonu mo e uho pihia ka fakatupu a koe ke taute e tau hikiaga he moui haau. Liga to fakalagalaga foki e logonaaga haau ke lahi e mahani fakamokoi mo e totonu ke he falu mo e fakamagalo e ha tagata kua nakai totonu ki a koe. He moui katoa haau, to manako a koe ke fakakite e loto fakaaue haau ke he foakiaga ne kua taute.

5. Mua atu fēfē e mena fakaalofa he Atua he lukutoto ke he ha mena fakaalofa foki?

⁵ Ko e mena fakaalofa he Atua he lukutoto kua mua atu ke he mena fakaalofa he fakataiaga. (1 Peteru 3:18) Manamanatu ke he mena nei: Kua moua e tautolu oti e agahala mai ia Atamu, ti ko e fakahala he agahala ko e mate. (Roma 5:12) Kua fakalagalaga he fakaalofa a Iehova ke fakafano mai a Iesu ke he lalolagi ke mate ma e tau tagata oti kana, ke “hoko kia ia e mate ha ko e tau tagata oti kana.” (Heperu 2:9) Ka e lahi atu foki e mena ka taute he poa ha Iesu! To utakehe tukulagi ai e mate. (Isaia 25:7, 8; 1 Korinito 15:22, 26) Ko lautolu oti kua fakakite e tua ki a Iesu to momoui mafola mo e fiafia tukulagi, he eke mo tau patuiki mo Keriso he lagi po ke tau tagata he Kautu he Atua he lalolagi. (Roma 6:23; Fakakiteaga 5:9, 10) Ko e heigoa falu monuina kua putoia he mena fakaalofa ha Iehova?

6. (a) Ko e heigoa e tau monuina he mena fakaalofa ha Iehova kua amaamanaki atu a koe ki ai? (e) Talahau tolu e mena ka fakalagalaga he mena fakaalofa he Atua a tautolu ke taute.

⁶ He eke mo vala he mena fakaalofa he Atua, to eke e lalolagi mo parataiso, to fakamaulu a lautolu ne gagao, mo e to fakaliu tu mai a lautolu ne mamate. (Isaia 33:24; 35:5, 6; Ioane 5:28, 29) Fakaalofa a tautolu ki a Iehova mo e haana a Tama fakahele ha kua tuku mai ki a tautolu e “mena kua foaki noa nakai maeke ke fakamatala.” Ko e heigoa kua fakalagalaga he mena fakaalofa nei a tautolu ke taute? To fakalagalaga a tautolu (1) ke fifitaki fakatata lahi a Keriso Iesu, (2) ke fakaalofa ke he tau matakainaga ha tautolu, mo e (3) ke fakamagalo e falu mai he tau loto.

7, 8. Fēfē e logonaaga ha tautolu ke he fakaalofa he Keriso, ti ko e heigoa kua lata ke fakalagalaga a tautolu ke taute?

⁷ Fakamua, kua lata ia tautolu ke fakalagalaga e logonaaga ke fakaaoga e tau momoui ha tautolu ke fakaheke a Iesu. Talahau he aposetolo ko Paulo: “Kua omoomoi a mautolu he fakaalofa a Keriso.” (Totou 2 Korinito 5:14, 15.) Iloa e Paulo kaeke ke talia e tautolu e fakaalofa lahi ha Iesu to omoomoi ai a tautolu, po ke fakalagalaga a tautolu ke fakaalofa mo e fakaheke a Iesu. Ē, ka maama katoatoa e tautolu e mena ne taute e Iehova ma tautolu, to fakalagalaga he fakaalofa haana a tautolu ke momoui he puhala kua fakalilifu e tautolu a Iesu. Taute fēfē e tautolu e mena ia?

⁸ Ko e fakaalofa ki a Iehova kua fakalagalaga a tautolu ke fifitaki ke he fakataiaga ha Iesu he muitua fakatata ke he tau tuagahui haana. (1 Peteru 2:21; 1 Ioane 2:6) Ka omaoma a tautolu ke he Atua mo e Keriso, to fakamooli e fakaalofa ha tautolu ma laua. Pehē a Iesu: “Ko ia ha i ai haku a tau poaki, mo e omaoma ki ai,  ko ia haia ke fakaalofa kia au; ko ia foki ke fakaalofa kia au, to ofania a ia he haku a Matua; to fakaalofa foki au kia ia, mo e fakakite atu au kia ia.”—Ioane 14:21; 1 Ioane 5:3.

9. Ko e heigoa e tau peehiaga kua moua e tautolu?

⁹ He magahala he Fakamanatuaga nei, kua mitaki ke manamanatu fakahokulo ke he fakaaogaaga he tau momoui ha tautolu. Ti hūhū hifo: ‘He tau faahi fe kua fitā e muitua e au a Iesu? He tau faahi fe haaku kua lata ke holo ki mua?’ Kua aoga ke hūhū hifo e tau hūhū nei ha kua manako e lalolagi ke momoui a tautolu he puhala ne momoui a lautolu. (Roma 12:2) Ka nakai fakaeneene a tautolu, maeke ia tautolu ke logona hifo e peehiaga ke kamata fifitaki e tau faiaoga, tau tagata talahaua, mo e tau tagata mahuiga he feua sipote he lalolagi. (Kolose 2:8; 1 Ioane 2:15-17) Maeke fēfē a tautolu ke totoko e peehiaga ia?

10. Ko e heigoa e tau hūhū ka hūhū hifo e tautolu he magahala Fakamanatuaga nei, ti ko e heigoa e tau tali kua liga fakalagalaga a tautolu ke taute? (Kikite fakatino he kamataaga.)

¹⁰ Kua mitaki ke fakatoka e magaaho he magahala Fakamanatuaga ke matakite ke he tau mena tui, tau kifaga, mo e leo lologo ha tautolu ti pihia mo e tau mena he ha tautolu a komopiuta, selafoni, po ke tepelete (tablet). Hūhū hifo: ‘Kaeke ko Iesu hinei ti kitia e mena ne tui e au, to mā nakai au?’ (Totou 1 Timoteo 2:9, 10.) ‘To fakakite nakai he tau mena tui haaku ko au ko e tutaki he Keriso? To manako nakai a Iesu ke kitekite e tau kifaga haaku? To fanogonogo nakai a ia ke he tau leo lologo haaku? Ka fakaaoga e Iesu e selafoni po ke tepelete haaku to mā nakai au he mena ka kitia e ia? To uka nakai ke fakamaama ki a Iesu e kakano ne fiafia au ke he tau pelē vitiō nei?’ Ko e fakaalofa ha tautolu ki a Iehova kua lata ke fakalagalaga a tautolu ke tuku kehe ha mena kua nakai latatonu ma e Kerisiano, pete ne tauuka e tau mena ia. (Gahua 19:19, 20) He tukulele e tautolu e tau momoui ha tautolu ki a Iehova, ne mavehe a tautolu ke fakaaoga e tau momoui ha tautolu ke fakaheke e Keriso. Ti kua nakai lata ia tautolu ke toka ha mena ne fakauka aki a tautolu ke fifitaki a Iesu.—Mataio 5:29, 30; Filipi 4:8.

11. (a) Fakalagalaga fēfē he fakaalofa ha tautolu ki a Iehova mo Iesu a tautolu ke he gahua fakamatala? (e) Maeke fēfē he fakaalofa ha tautolu ke fakalagalaga a tautolu ke lagomatai e falu he fakapotopotoaga?

¹¹ Ko e fakaalofa ha tautolu ki a Iesu kua fakalagalaga a tautolu ke fakamatala mo e fakaako fakamakutu. (Mataio 28:19, 20; Luka 4:43) He magahala Fakamanatuaga, maeke nakai a koe ke fakatokatoka e moui haau he tau aho takitaha ke maeke a koe ke paionia fakakū mo e fakaaoga 30 po ke 50 e tulā ke he gahua fakamatala? Taha e takape ne 84 e tau he moui ne manatu kua nakai maeke a ia ke paionia ha kua motua tuai a ia mo e nakai malolō e tino. Ka e manako e tau paionia he matakavi haana ke lagomatai a ia. Ne foaki e lautolu e puhala fano fenoga ma haana ti fifili e matakavi kua hagahaga mitaki ke gahua ai a ia. Ti ko e fua, ne hokotia e foliaga he matakainaga ke he 30 e tulā haana. Maeke nakai a koe ke lagomatai e taha tagata he fakapotopotoaga haau ke paionia fakakū ia Mati po ke Aperila? Mooli kua nakai maeke e tau tagata oti ke paionia, ka e maeke a tautolu ke fakaaoga e tau magaaho mo e tau malolō ha tautolu ke fakaholo ki mua e fekafekauaga ha tautolu ki a Iehova. Ka taute e tautolu tuga a Paulo, to fakakite e tautolu kua fakalagalaga a tautolu he fakaalofa ha Iesu. Ko e heigoa foki ka omoomoi he fakaalofa he Atua ki a tautolu ke taute?

12. Fakalagalaga he fakaalofa he Atua a tautolu ke taute e heigoa?

¹² Uaaki, kua lata he fakaalofa he Atua ke fakalagalaga a tautolu ke fakaalofa ke he tau matakainaga ha tautolu. Ne tohi he aposetolo ko Ioane: “Ko e tau tagata fakahelehele na e,  kaeke kua pihia e fakaalofa mai e Atua kia tautolu, lata ni ke feofanaki a tautolu.” (1 Ioane 4:7-11) Ti ka talia e tautolu e fakaalofa he Atua, kua lata ia tautolu ke fakaalofa ke he tau matakainaga ha tautolu. (1 Ioane 3:16) Maeke fēfē a tautolu ke fakakite e fakaalofa ki a lautolu?

13. Ko e heigoa e fakafifitakiaga ne fakatoka e Iesu he fakaalofa ke he falu?

¹³ Fakakite he fakafifitakiaga ha Iesu ki a tautolu e puhala ka fakaalofa a tautolu ke he falu. He ha ha a ia he lalolagi, ne lagomatai e ia e tau tagata, mua atu ki a lautolu ne loto holoilalo. Ne fakamaulu e ia a lautolu ne gagao, kulikuli, matapouli, teligatuli, mo e kuhukuhu. (Mataio 11:4, 5) Nakai tuga e tau takitaki lotu, ne fiafia a Iesu he fakaako e tau tagata ne manako ke iloa e Atua. (Ioane 7:49) Ne ofania e ia a lautolu ne loto holoilalo mo e eketaha ke lagomatai a lautolu.—Mataio 20:28.

14. Ko e heigoa ka taute e koe ke fakakite kua fakaalofa a koe ke he tau matakainaga haau?

¹⁴ Ko e magahala Fakamanatuaga ko e magaaho mitaki foki ke manamanatu ke he puhala ka lagomatai e koe e tau matakainaga he fakapotopotoaga haau, mua atu ki a lautolu ne momotua. Maeke nakai a koe ke ahiahi atu ke he tau fakahele nei? Maeke nakai a koe ke tamai e mena kai ma lautolu, lagomatai e tau gahua kaina ha lautolu, ke uta foki a lautolu ke he feleveiaaga, po ke uiina a lautolu ke gahua mo koe he fonua? (Totou Luka 14:12-14.) Kia fakalagalaga he fakaalofa he Atua a koe ke fakakite e fakaalofa ke he tau matakainaga haau!

15. Ko e heigoa kua lata ia tautolu ke mailoga?

¹⁵ Toluaki, fakalagalaga he fakaalofa ha Iehova a tautolu ke fakamagalo e tau matakainaga ha tautolu. Lauia oti a tautolu he agahala mo e mate mai ia Atamu, ti nakai pehē taha, “Nakai lata au mo e lukutoto.” Lata foki e fekafekau mahani fakamooli he Atua mo e mena fakaalofa ko e lukutoto. Igatia a tautolu mo e fakamagalo e kaitalofa lahi mahaki! Ko e ha kua aoga ke mailoga e mena ia? Moua e tautolu e tali he taha he tau fakataiaga ha Iesu.

16, 17. (a) Ko e heigoa kua lata ke fakaako e tautolu mai he fakataiaga ha Iesu ke he patuiki mo e tau fekafekau? (e) He manamanatu fakahokulo ke he fakataiaga ha Iesu, ko e heigoa haau kua eketaha ke taute?

¹⁶ Ne talahau e Iesu e fakataiaga hagaao ke he patuiki ne fakamagalo e kaitalofa lahi mahaki he fekafekau haana ko e 60,000,000 e tenari. Ka ko e mogo fakamui, ne nakai fakamagalo he fekafekau ia e matakainaga haana ne tote e kaitalofa ko e 100 ni e tenari. Kua lata he fakaalofa noa he patuiki ke fakalagalaga e fekafekau haana ke fakamagalo e matakainaga. Ne ita lahi mahaki e patuiki he logona e ia kua nakai fakamagalo he fekafekau haana e kaitalofa tote pihia. Pehē a ia: “Ko e fekafekau mahani kelea na e, ne fekau atu e au haku a tau mena oti ia ne toka ia koe, he olelalo mai a koe kia au; Ka e nakai kia lata he fakaalofa age a koe ke he hau a matakainaga a fekafekau, ke tuga foki au ne fakaalofa atu kia koe?” (Mataio 18:23-35) Tuga e patuiki, ne fakamagalo e Iehova e kaitalofa lahi mahaki ha tautolu. Ko e heigoa kua lata he  fakaalofa mo e fakaalofa noa ha Iehova ke fakalagalaga a tautolu ke taute?

¹⁷ He tauteute a tautolu ke lata mo e Fakamanatuaga, liga maeke ia tautolu ke hūhū hifo: ‘Kua fakamamahi kia he matakainaga e loto haaku? Uka kia ia au ke fakamagalo a ia?’ Ka pihia, ko e magaaho mitaki anei ke fifitaki a Iehova, ko ia kua mautali ke “fakamagalo e tau hala.” (Nehemia 9:17; Salamo 86:5) Ka loto fakaaue a tautolu ke he fakaalofa noa ha Iehova, to fakakite e tautolu e fakaalofa noa ke he falu ti fakamagalo a lautolu mai he tau loto. Ka nakai fakaalofa mo e fakamagalo e tautolu e tau matakainaga ha tautolu, nakai amanaki a tautolu ki a Iehova ke fakaalofa mo e fakamagalo a tautolu. (Mataio 6:14, 15) Ka fakamagalo e tautolu e falu, pete ne fakamamahi e lautolu a tautolu, to lagomatai ai a tautolu ke moua e vahā anoiha ne fiafia lahi.

18. Lagomatai fēfē he fakaalofa he Atua taha matakainaga fifine ke fakamanavalahi ke he tau kukū he taha matakainaga fifine?

¹⁸ Maeke ke uka ke fakamanavalahi ke he tau kukū he tau matakainaga ha tautolu. (Totou Efeso 4:32; Kolose 3:13, 14.) Taha e matakainaga fifine ne taute pihia ko Lily. ^[1] (Kikite tala he matahiku.) Ne lagomatai e ia e takape ne higoa ko Carol. Ma e fakatai, ne fakaholo e ia a Carol ke he tau mena ne manako a ia ke fano ki ai, lagomatai a ia mo e tau fakatau haana, mo e taute foki e tau mena loga ma haana. Pete ne tau mena oti ne taute e Lily, ne tuhituhi tumau a Carol, ti falu mogo ne nakai mukamuka ke lagomatai a ia. Ka e hagaaki a Lily ke he tau mahani mitaki ha Carol ti lagomatai a ia ke he falu tau ato gagao lahi mahaki a Carol ti mate. Pete ne uka ki a Lily ke lagomatai a Carol, pehē a ia: “Amanaki atu au ke kitia a Carol he liu tu mai. Manako au ke iloa a ia he mogo kua mitaki katoatoa a ia.” Maaliali ai, maeke he fakaalofa he Atua ke fakalagalaga a tautolu ke fakamanavalahi ke he tau matakainaga ha tautolu mo e amanaki atu ke he magaaho ka galo tukulagi e nakai mitaki katoatoa he tagata.

19. To fakalagalaga fēfē he “mena kua foaki noa nakai maeke ke fakamatala” he Atua a koe?

¹⁹ Foaki mooli e Iehova ki a tautolu e “mena kua foaki noa nakai maeke ke fakamatala.” Kia loto fakaaue tumau a tautolu ki ai! Ko e magahala Fakamanatuaga ko e magaaho mitaki lahi mahaki ke manamanatu fakahokulo ke he tau mena oti ne taute e Iehova mo Iesu ma tautolu. Kia fakalagalaga he fakaalofa ha laua a tautolu ke fifitaki fakatata a Iesu, ke fakakite e fakaalofa ke he tau matakainaga ha tautolu, mo e fakamagalo e tau matakainaga ha tautolu mai he tau loto.