Liga manatu e koe a Gail, ne totoku he kamataaga he tau vala tala nei, ne nakai talitonu to matutū hifo e momoko haana he mate e taane, ko Rob. Ka kua amaamanaki mooli a ia ke liu kitia foki a Rob he lalolagi foou ne mavehe mai he Atua. “Ko e kupu tohi tapu mahuiga haaku,” he talahau e ia, “ko e Fakakiteaga 21:3, 4.” Pehe mai: “Ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”

Pehē a Gail: “Kua talahau oti i loto he maveheaga nei. Fakaalofa mooli au ki a lautolu ne mamate e tau fakahele ka e nakai iloa e amaamanakiaga nei, to maeke ke liu kitia e tau fakahele ha lautolu.” Kua gahua fakatatau a Gail mo e tau taofiaga haana he foaki noa e tau magaaho ko e tagata fakamatala tumau, he tutala ke he tau katofia haana hagaao ke he maveheaga he Atua ma e vahā i mua ka “nakai tuai fai mate.”

Liga pehē a koe, ‘Ofoofogia ha ia!’ Ka e manamanatu la ke he fakafifitakiaga ha Iopu. Ne moua a ia he gagao mamahi lahi. (Iopu 2:7) Pete ni he manako a Iopu ke mate, ne tumau e tua haana ke he malolō he Atua ke fakaliu tū mai a ia ke moui he lalolagi. Ne talahau e ia mo e mauokafua: “Ane fufu e koe au i Seoli, mo e fakagalo ai e koe au . . . Kia ui mai a koe, ti tali atu au kia koe; kia finagalo fakaalofa a koe ke he gahua he hau a tau lima.” (Iopu 14:13, 15) Mauokafua a Iopu to manatu he Atua haana a ia mo e manako lahi ke liu fakamoui a ia.

Nakai leva, to taute pihia he Atua​—ma Iopu mo e tokologa atu foki​—ka hokotia e lalolagi nei ke parataiso. (Luka 23:42, 43) “[To] liu foki tutu mai a lautolu kua mamate,” he talahau mai he Tohi Tapu ia Gahua 24:15. “Aua neke ofo a mutolu he mena ia,” he fakamafana mai e Iesu, “ha ko e mena hoko ke he aho ke logona ai ke he hana leo a lautolu katoa ha he tau tukuaga, mo e o mai ai.” (Ioane 5:28, 29) To kitia e Iopu e maveheaga ia ka fakamooli. Ti moua e ia e amaamanakiaga ke liu ke he “hana vaha fuata” mo e tino mitaki tukulagi a ia “ke homo atu ke he tino he tama tote.” (Iopu 33:24, 25) To pihia foki e mena ka tupu ke he tau tagata oti kua talia fiafia e foakiaga fakaalofa noa he Atua ko e liu tū mai ke moui he lalolagi.

Kaeke kua momoko a koe he mate e fakahele haau, ko e tau vala tala nei ne fakatutala a tautolu ki ai, to liga nakai utakehe katoatoa e loto momoko haau. Ka e he manamanatu fakahokulo ke he tau maveheaga he Atua ne fakakite mai he Tohi Tapu, to moua e koe e amaamanakiaga mooli mo e malolō ke fakatumau.​—1 Tesalonia 4:13.

Manako nakai a koe ke fakaako atu foki ke he puhala ke fahia mai he maanu? Po ke fai hūhū a koe, tuga e “Ko e ha ne fakaatā he Atua e kelea muitui mo e matematekelea?” Fakamolemole fakakia e ha mautolu a faahi kupega hila, jw.org, ke kitia e puhala kua foaki he Tohi Tapu e tau tali mafanatia mo e aoga.