Ne fanau au i Ciudad Mante, ko e matakavi fulufuluola he maaga motu ha Tamaulipas, i Mesikō. Laulahi he tau tagata he taone ia ne fakamokoi mo e totonu. Ka e momoko ai kua hagahagakelea lahi mahaki e matakavi ia ha ko e tau matahavala taute pauaki.

Ko e tama ke uaaki au he fanau taane tokofā. Ne papatiso he tau matua haaku au he Lotu Katolika ti fai magaaho he mole ne hū au he matakau lologo he tapu. Manako au ke fakafiafia e Atua he matakutaku neke fakafili e ia au ti vela tukulagi he afi tote.

He lima e tau haaku he moui ne tiaki he matua taane a mautolu. Ti momoko lahi au mo e fakaatukehe e loto. Nakai maama e au e kakano ne tiaki e ia a mautolu ha kua fakaalofa hofihofi a mautolu ki a ia. Ne gahua loa e matua fifine ha mautolu i fafo he kaina ke leveki aki a mautolu tokofā.

Ne fakaaoga e au e tuaga ia ke nakai fano he aoga ti lafi mo e tau fanau lalahi. Fakaako e lautolu au ke kupu pilo, ula, kaihā, mo e tau moto. Ha kua fiafia au ke pule ke he falu, ne fakaako au ke hūmomi, taufagatua, mo e tau karate, mo e fakaaoga foki he tau kanavaakau. Ne eke au mo fuata mui mahani vale. Fa putoia au he taufana, ti lagaloga e pakia haaku mo e toto lahi ti tiaki ke mate he puhalatū. Ko e fakamomoko ha ia ke he matua fifine haaku he kitia pihia au, mo e ke lagaki au ti uta fakaave ke he fale gagao!

He 16 e tau moui haaku, ne ahiahi mai e kapitiga haaku he vahā tote ko Jorge ke he kaina ha mautolu. Ne tala mai a ia ko e taha he Tau Fakamoli a Iehova a ia ti manako ke tala mai e fekau aoga lahi ki a mautolu. Kamata a ia ke fakamaama e tau taofiaga haana he fakaaoga e Tohi Tapu ke fakamaama aki. Nakaila totou ia au he Tohi Tapu, ti fiafia lahi au ke fakaako hagaao ke he higoa he Atua mo e haana finagalo. Ne pehē a Jorge ke fakaako e ia e Tohi Tapu mo mautolu. Ti talia e mautolu.

Ne fakatotoka lahi au he iloa e tala mooli hagaao ke he afi tote​—nakai ko e fakaakoaga Tohi Tapu a ia. (Salamo 146:4; Fakamatalaaga 9:5) He iloa e au e mena ia, ne nakai liu au matakutaku teao ke he Atua. Ka e kamata au ke kitia ko e Matua fakaalofa a ia ne manako ke moua he tau fanau haana e mitaki.

 He holo ki mua e fakaako Tohi Tapu haaku, ne kitia e au e lata ke hikihiki e mahani haaku. Lata au ke feaki e mahani fakatokolalo mo e fakaoti e mahani favale. Ko e fakatonuaga ne moua he 1 Korinito 15:33, ne lagomatai au. Pehē mai: “Ko e feoaki mo lautolu kua mahani kelea kua kelea ai e tau mahani mitaki,” po ke tuga ne talahau he matahui tala, “fakakelea e tau mahani mitaki.” Ne mailoga e au ka manako au ke hiki e mahani haaku, kua lata au ke fakaoti e lafi mo e tau tagata ne fakaohooho kelea au. Ti hukui e au e tau kapitiga tuai haaku aki e tau kapitiga foou he fakapotopotoaga Kerisiano mooli​—tau tagata ne fakamafola e tau fekehekeheaki ha lautolu he fakagahua e tau matapatu fakaakoaga he Tohi Tapu ka e nakai latau po ke mahani vale.

Taha kupu Tohi Tapu foki ne lauia lahi au ko e Roma 12:17-19. Pehē mai: “Aua neke taui atu e kelea ke he kelea he taha; . . . Kaeke kua maeke ia mutolu, kia nonofo fakamitaki mo e tau tagata oti kana. . . . aua neke taui atu e mutolu, . . . ha kua tohi mai, Kua pehe mai e Iki [Iehova], Ha ha ia au ke taui atu, to taui atu e au ni.” Ne talia e au to fakamafola e Iehova e nakai fakafili tonu he puhala mo e magaaho ni haana. Fano ni fakatekiteki ti kautū au mai he moui mahani vale haaku.

To nakai nimo ia au e taha mena ne tupu he liu au ki kaina he taha afiafi. Ko e matakau he tau fuata mai he kege ne matafī fakamua, ne keli au ti tā he takitaki ha lautolu e tua haaku ti hea, “Puipui a koe!” He magaaho tonu ia ne talahau e au e liogi fakakū ki a Iehova he ole ki a ia ke lagomatai au ke fakauka ke he lekua nei. Pete he logona e au e manako malolō ke taui atu ne maeke au ke fano kehe. He aho hake ne feleveia au mo e takitaki he kege ia. Ne ita lahi au ti manako lahi ke taui atu, ka e liu foki au liogi fakaeneene ki a Iehova ke lagomatai au ke fakatotoka. Ofo lahi au, ha kua hau e tama fuata ki a au ti pehē: “Fakamagalo mai au ke he mena ne tupu ne pō. Ko e tala mooli, kua fia loto au ke tuga a koe. Manako au ke fakaako e Tohi Tapu.” Ko e fiafia ha ia haaku he maeke au ke fakatotoka mo e nakai ita! Fakaaue ai, kua kamata a maua ke fakaako tokoua e Tohi Tapu.

Ka e momoko ai ha kua nakai matutaki e magafaoa haaku ke fakaako e Tohi Tapu he magahala ia. Pete ia ne fifili mauokafua au ke matutaki ke fakaako mo e nakai fakaatā ha tagata po ke ha mena ke taofi au. Iloa e au ko e lafi tumau mo e tau tagata he Atua ka fakamaulu e tau logonaaga mamahi haaku mo e foaki mai e magafaoa ne loto au ki ai. Ne matutaki au ke holo ki mua ti hoko ke he 1991, ne papatiso au ko e taha he Tau Fakamoli a Iehova.

Ne fa loto ita, pule malolō, mo e mahani vale au. Ka kua hiki katoatoa he Kupu he Atua e moui haaku. Mogonei kua tala age e au e fekau mafola he Tohi Tapu ke he ha tagata kua manako ke fanogonogo. Ne moua e au e lilifu ke fekafekau mau ke he 23 e tau kua mole.

Fai magaaho ne gahua au he la ofisa he Tau Fakamoli a Iehova i Mesikō. I ai, ne feleveia au mo Claudia ko e matakainaga fifine fuata Kerisiano ne makaukau, ti mau a maua he 1999. Fiafia lahi au ki a Iehova he fakamonuina au aki e hoa mahani fakamooli nei!

Ne fekafekau tokoua a maua he fakapotopotoaga Mexican Sign Language, ke lagomatai e tau tagata teligatuli ke fakaako hagaao ki a Iehova. Fai magaaho he mole ti uiina a maua ke ō ki Belize ke fakaako e Tohi Tapu ke he tau tagata he motu ia. Pete kua mukamuka lahi e moui ha maua hinei, kua moua e maua e tau mena oti kua lata ke fiafia. To nakai tautui e maua aki ha mena taha.

Fai magaaho ti liu e matua fifine haaku matutaki ke fakaako e Tohi Tapu ti papatiso. Pihia foki e taokete haaku, hoana haana, mo e tau fanau ha laua ko e Tau Fakamoli a Iehova he mogonei. Falu kapitiga haaku fakamua ne tala age e au e fekau he Kautu, kua fekafekau foki mogonei ki a Iehova.

Momoko ai ha kua mamate e falu he magafaoa haaku ha kua nakai hiki e mahani vale ha lautolu. Ane mai matutaki foki au ke he puhala taha ia, liga to pihia foki au. Fakaaue lahi au ha kua futia e Iehova a au ki a ia mo e tau tagata tapuaki haana, ne fakauka mo e totonu he fakaako au ke fakagahua e tau matapatu fakaakoaga he Tohi Tapu ke he moui haaku.