Ko María Isabel ko e fuata fakailoa fakamakai he taone ko San Bernardo i Amerika Toga he motu ko Chile. Ko ia mo e magafaoa haana ko e tau tagata he motu ko Mapuche. Ko e magafaoa katoa ne fakamakai lahi ke fakatū e fakapotopotoaga foou he vagahau Mapuche, ne fakahigoa foki ko e Mapudungun.

Ko e mogo ne fakailoa ai to taute e Fakamanatuaga he mate he Keriso he vagahau Mapudungun mo e 2,000 e uiina ke he Fakamanatuaga he vagahau ia kua lolomi ke tufatufa, ne fakalagalaga ai a María Isabel ke manamanatu. Ko e heigoa haana ka taute ke lagomatai? Kua liu a ia manatu e tau mena tutupu ke he falu he tau fuata Fakamoli ne kua fiafia he kautū he fakamatala ke he tau kapitiga he vahega mo e tau faiaoga. Kua tutala a ia mo e haana tau mamatua ke he mena nei, ti talia oti e lautolu kua lata ke lali a María Isabel ke manamanatu ke he taha puhala ke tufatufa aki e tau uiina he fonua aoga. Ko e heigoa e palana ne taute e ia?

Fakamua, ne ole a María Isabel ke he tau pule aoga ma e fakaatāaga ke pili hake taha uiina i mua he hala lahi ne hū atu ke he fonua aoga. Ne talia e lautolu haana ole ti nava ki a ia ha ko e haana makai. Taha aho he mogo ne fakapotopoto ai ke hea e tau higoa, ne fakailoa foki he ulu faiaoga e uiina nei ki luga he leo taogo he aoga!

Ti ole a María Isabel ke ahiahi e tau poko aoga oti. Mole he moua e fakaatāaga mai he tau faiaoga, ne hūhū a ia ke he tau tama aoga he tau vahega takitaha po ke fai nakai ia lautolu ne ō mai i Mapuche. “Manatu au to liga 10 po ke 15 e tama aoga mai he tau magafaoa Mapuche he aoga katoa,” he talahau e ia, “ka kua tokologa atu foki​—he mogo fakamui ne tufa age e au 150 e uiina!”

Taha e fifine ne kitia e uiina ne pili he hala lahi ke he fonua aoga ne manako ke iloa ko hai kua lata a ia ke tutala ki ai hagaao ke he fakaholoaga nei. Manamanatu ke he ofogia haana he mogo ne takitaki atu a ia ke he tama fifine ne hogofulu e tau! “Kua amanaki a ia ke he taha tagata motua,” he talahau e María Isabel mo e mamali. Mole e foaki he uiina mo e fakamaamaaga kū, ne ole a María Isabel ke he matahigoa he kaina he fifine ke maeke a ia mo e haana tau mamatua ke ō atu ke fakailoa fakalaulahi atu ki a ia hagaao ke he Kautu he Atua. Ko e fiafia ha ia he tau tagata fakailoa toko 20 ne fekafekau ke he fonua vagahau Mapudungun ke kitia e fifine ia fakalataha mo e toko 26 e tagata Mapuche ne fiafia foki he fakalataha ke he Fakamanatuaga. Ko e matakau ia mogonei ko e fakapotopotoaga kua tupu lahi!

Pete e tau tau moui haau, maeke nakai ia koe ke taute e tau lakaaga pihia ke uiina e tau kapitiga aoga po ke tau kapitiga gahua ke he Fakamanatuaga, lauga ke he tau tagata, po ke fonoaga he faahimotu? Ko e ha he nakai taute e kumikumiaga ke he tau tohi ha tautolu ke iloa e tau mena ne tutupu ke moua e koe e falu puhala ke taute taha matagahua pihia mo e kautu? Ti liogi foki ma e agaaga tapu ha Iehova ke lagomatai a koe ke moua e malolō ke vagahau hagaao ki a ia. (Luka 11:13) Ka taute pihia e koe to liga ofo a koe he fiafia mo e lahi he atihake, ha ko e tau fua he haau a gahua ka fakatokatoka fakamitaki.