KO E tau nei ko e tau ke 100 aki tali mai he fakakite fakamua e “Photo-Drama of Creation,” ko e kifaga ofoofogia ne talaga ke atihake e tua ke he Tohi Tapu ko e Kupu he Atua. He magahala ne tupu lahi e talitonu ke he tupumainoa, ko e tau tala ekefakakelea he tau tagata talahaua, mo e tau fakauaua lalahi ati moumou e tua he tokologa, ka kua omoi fakalahi he “Photo-Drama” hagaao ki a Iehova ko e Tufuga.

Ko Charles T. Russell ne takitaki e Tau Tagata Fakaako Tohi Tapu, ne fakatumau ke kumikumi ke he tau puhala lauia mitaki mo e mafiti ke folafola aki e kupu mooli he Tohi Tapu. Ne fitā e molea e tolugofulu e tau he Tau Tagata Fakaako Tohi Tapu he fakaaoga e malolō he tau tohi kua lolomi. Ka kua moua e lautolu e puhala foou mogonei​—ko e kifaga.

He tau atu tau 1890 ne kamata fakakite e kifaga ne nakai fai leo ke he tau tagata. Ne fitā he 1903 e taha e lotu ne fakakite e ata fakalotu i loto he fale tapu i New York City. Ne foou lahi agaia e tau kifaga he 1912 he mogo ne loto malolō a Russell ke kamata ke fakatokatoka e “Photo-Drama.” Ne mailoga e ia ko e puhala matutaki nei to liga folafola atu e kupu mooli he Tohi Tapu ke he taha puhala foki ne nakai maeke ke taute hokoia ni he tau tohi ne lolomi.

Ko e “Photo-Drama” ne valu e tulā he katoa, ne fakakite ai ke he fā e vala, ne 96 e lauga Tohi Tapu ne tapaki ne taute he tagata lauga talahaua he magahala ia. Ne fai leo kofe tuai ne fakatagi fakatatau ke he loga e tau fakatino. Ko e tau matakainaga iloilo ne fakaaoga e tau leo mo e tau leo kofe ne tapaki ke he lapa kofe, ke fakatagi fakatatau mo e tau ata lanu mo e tau kifaga he tau tala talahaua he Tohi Tapu.

Laulahi he tau fakatino ma e kifaga mo e tau ata he lapa hio ne moua mai he tau fale lalahi ne taute e tau kifaga. Ko e tau pulotu ta fakatino i Philadelphia, New York, Paris, mo London ne vali takitaha e tau fakatino ke he tau lapa hio mo e tau lipine kifaga. Ko e tau matakau gahua he Faahi Ta Fakatino he Peteli ne vali e laulahi he tau fakatino, mo e fa  taute foki falu fakatino ke hukui aki e tau ata ne malona. Lalafi ke he tau fakatino ne fakatau, ne poki foki e tau tagata he magafaoa Peteli he matakavi tata mai i Yonkers, New York, he fakataitai e lautolu e tau vala ha Aperahamo, Isaako, mo e agelu ne taofi mai a Aperahamo he poa e tama haana.​—Kene. 22:9-12.

Taha mai he matakau he Matakainaga Russell ne tala age ke he tagata fakapuloa tala ko e puhala matutaki nei to “tokologa ka fiafia ke he Tohi Tapu, ke mua atu ke he ha mena ne taute tali mai ke omoomoi aki e lotu.” To nava nakai e tau takitaki lotu ke he puhala foou nei ke hokotia ke he tau tagata tokologa ne hoge fakaagaaga? Nakai, ne tokologa e tau akoako ha Kerisitenitome ne totoko e “Photo-Drama,” ne hokotia e falu ke fakaaoga e tau lagatau kelea mo e fakagalogalo ke ua kitia he tau tagata e kifaga nei. He taha toloaga, ne tamate he tau akoako e malolō hila.

Pete ia, ne pukenamo e tau fale kifaga ke kitekite e “Photo-Drama” mo e nakai fai totogi. He Tau Faahi Kaufakalataha, ne hokotia ke 80 e taone ne fakakite ai e “Photo-Drama.” Tokologa he tau tagata kitekite ne kitia fakamua laia he ‘kifaga tutala.’ Ko e tau ata ne fakakite fakamafiti, ne maeke e tau tagata ke kitekite ke he punua moa ne tuotuo e gati he fakapā mo e fiti fulufuluola ne matala fakatekiteki. Ko e tau vala tala fakasaiene he magahala ia ne fakamaama e pulotu ofoofogia ha Iehova. Tuga ne talahau he kamataaga, he kitia e Matakainaga Russell ne fakailoa he kamataaga he kifaga “Photo-Drama,” taha e tagata kitekite ne manatu ko e tagata lauga kua tuga e “Matakainaga Russell mooli a ia ti mua hake ki a Matakainaga Russell mogonei!”

Ko e tagata tohia mo e fakamau tala tuai ke he tau kifaga ko Tim Dirks ne fakamaama e “Photo-Drama” ko e “kifaga lahi fakamua laia ne fakakite fakatatau ke he leo (tau leo ne tapaki), ne holo, mo e tau ata lanu kehekehe.” Ko e tau kifaga ne taute he mole e “Photo-Drama” ne fakaaoga falu he tau puhala nei ka e nakai fakaaoga oti i loto he taha e kifaga, mua atu ke he tau kifaga ne fakavē ke he Tohi Tapu. Ti nakai fai kifaga ne mua atu e tokologa ne kitekite ki ai​—kavi ke he hiva e miliona i Amerika Tokelau, Europa, Ausetalia, mo Niu Silani he tau fakamua ne fakakite ai!

Ne fakakite fakamua e “Photo-Drama” ia Ianuari 11, 1914, i New York City. Fitu e mahina he mole ne hoko e matematekelea tōkaimaka ne fakahigoa ai ko e Felakutaki I he Lalolagi. Ka kua matutaki e tau tagata tokologa he lalolagi katoa ke fakapotopoto ke kitekite e “Photo-Drama,” ke moua e mafanatia mai he tau fakatino fulufuluola he tau monuina he Kautu ka hoko mai. Kua nakai fai mena ke fakatatai aki e tau 1914, ko e “Photo-Drama” ko e kifaga ofoofogia mooli.