1. Uho lahi fēfē e gahua fakamatala ki a Iesu? Fakamaama.

KUA fiafia a Iesu ke tutala hagaao ke he Kautu he Atua. He magaaho ne nofo a Iesu he lalolagi, ne lahi e tutala haana hagaao ke he Kautu ke he falu matakupu foki. Ne molea e laga 100 he totoku e ia e Kautu he gahua fakamatala haana. Kua uho lahi e Kautu ki a Iesu.​—Totou Mataio 12:34.

2. Tokofiha a lautolu i ai kua logona e poakiaga ne fakamau ia Mataio 28:19, 20, ti ko e ha ne talahau pihia e tautolu?

² Nakai leva he mole e liu tu mai ha Iesu, ne feleveia a ia mo e 500 tumā ha lautolu ne eke mo tau tutaki. (1 Korinito 15:6) Liga ko e mogonei ne tala age e Iesu e poakiaga ke fakamatala ke he “tau motu oti kana.” To nakai mukamuka e gahua nei. * (Kikite matahui tala.) Ne tala age a ia ki a lautolu to matutaki e gahua  fakamatala ke leva ai, ato hoko e “fakaotiaga he lalolagi.” Ka fakamatala e koe e tala mitaki he vahā nei, kua lagomatai a koe ke fakamooli e perofetaaga ia.​—Mataio 28:19, 20.

3. Ko e heigoa e tau mena tolu ne kua lagomatai a tautolu ke fakamatala e tala mitaki?

³ He mole e talahau e Iesu e poakiaga ia ke fakamatala, ne pehē a ia: “To fakalataha au mo mutolu.” (Mataio 28:20) Mavehe a Iesu ke he tau tutaki haana to takitaki e ia e gahua fakamatala mo e to lagomatai e ia a lautolu ke fakamatala ke he lalolagi katoa. Fakalataha foki a Iehova mo tautolu. Kua tuku mai e ia ki a tautolu e “tau gahua mitaki oti kana” ke lagomatai a tautolu ke fakamatala. (Heperu 13:20, 21) He vala tala nei, to fakatutala a tautolu ke he tolu e mena mitaki nei: (1) ko e tau puhala kua foaki mai ki a tautolu, (2) tau puhala ne kua fakaaoga e tautolu, mo e (3) fakamahaniaga kua foaki mai ki a tautolu. Fakamua, kia fakatutala a tautolu ke he falu he tau puhala ne kua fakaaoga e tautolu he 100 tau kua mole.

4. Lagomatai fēfē he tau puhala loga kehekehe a tautolu he gahua fakamatala ha tautolu?

⁴ Fakatatai e Iesu e fekau he Kautu ke he tega akau ne tō he tau kelekele kehekehe. (Mataio 13:18, 19) Ke tauteute e kelekele, kua fakaaoga he tagata gahua fonua e loga he tau puhala kehekehe. He puhala pihia, kua tuku mai he Patuiki ha tautolu e tau puhala ki a tautolu ke fakaaoga ai ke lagomatai e tau tagata ke talia e fekau ha tautolu. Falu puhala ne aoga kū ai, ka e falu kua fakaaoga agaia he magaaho nei. Ka kua lagomatai he tau puhala oti a tautolu ke fakaholo ki mua e tau lotomatala ha tautolu ke fakamatala.

5. Ko e heigoa e laupepa fakamooli, ti fakaaoga fēfē ai?

⁵ He 1933, ne kamata e tau tagata fakailoa ke fakaaoga e laupepa fakamooli, ko e puhala ne lagomatai e tokologa ke kamata e fakamatala. Ko e laupepa tote ne ha ha i ai e fekau kū mo e mukamuka he Tohi Tapu. Falu mogo ko e laupepa foou ne tohi ai e fekau foou. Ko e Matakainaga ko Erlenmeyer ne kavi ke he hogofulu e tau he moui he mogo ne fakaaoga fakamua e ia e laupepa fakamooli. Ne fakamaama e ia: “Ko e hafagiaga mahani mau ko e, ‘Fakamolemole maeke nakai a koe ke totou e laupepa nei?’ Ka oti e totou he tagata he kaina e laupepa, to foaki e mautolu e tohi ti ō a mautolu.”

6. Lagomatai lahi fēfē e laupepa fakamooli?

⁶ Lagomatai he laupepa fakamooli e tau tagata fakailoa ke he tau puhala kehekehe. Ma e fakatai, falu tagata fakailoa ne mā, ti pete ni kua manako mooli a lautolu ke fakamatala, nakai iloa e lautolu e mena ke talahau. Falu tagata fakailoa ne loto malolō lahi. Ne tala age e lautolu e tau mena oti ne iloa e lautolu ke he tagata he kaina he tau minuti gahoa, ka ko e tau mena ne talahau e lautolu kua nakai fakailoilo tumau. Lagomatai he laupepa fakamooli e tau tagata fakailoa oti ke foaki e fekau mukamuka mo e maaliali.

7. Ko e heigoa falu paleko he fakaaoga e laupepa?

⁷ Ha ha i ai foki e tau paleko. Ko e Matakainaga Fifine ko Grace Estep ne ui: “He falu mogo, to hūhū ki a mautolu, ‘Ko e heigoa ne  talahau i ai? Ai ka maeke a mutolu ke tala mai ai ki a au?’” Nakai maeke foki he falu tagata fakailoa ke totou e mena ne tū he laupepa. Falu ne uta e laupepa ti pā e gutuhala. Falu tagata ne nakai fiafia ke he fekau ha mautolu, ti hēhē fakavalavala e lautolu e laupepa. Ka e pete ne tau paleko, ne lagomatai he laupepa fakamooli e tau tagata fakailoa ke fakamatala ke he tau katofia ha lautolu mo e fakakite ai ko e tau tagata fakamatala he Kautu.

8. Fakaaoga fēfē e lapakofe fakatagi utafano? (Kikite fakatino he kamataaga.)

⁸ Ko e taha puhala foki ne fakaaoga he mole e 1930 ko e lapakofe fakatagi utafano. Falu he Tau Fakamoli ne ui ai ko Aaron ha kua vagahau e matini ka e nakai vagahau a lautolu. (Totou Esoto 4:14-16.) Ka talia he tagata he kaina ke fanogonogo, to tā he tagata fakailoa e lauga kū he Tohi Tapu ti foaki falu tohi. Falu mogo ne fakapotopoto e magafaoa katoa ke fanogonogo ke he lauga! He 1934, ko e Watch Tower Society ne kamata ke talaga e tau lapakofe fakatagi utafano ne taute pauaki ma e gahua fakamatala. Fakahiku ai, ne tapaki he tau matakainaga taane 92 e lauga kehekehe.

9. Lauia mitaki fēfē e lapakofe fakatagi utafano?

⁹ He magaaho ne logona e Hillary Goslin e taha he tau lauga ia, ne uta fakakū e ia e lapakofe fakatagi utafano ke taha e faahi tapu ke tā e fekau he Tohi Tapu ke he tau katofia haana. Ti ko e fua, tokologa e tagata ne fiafia ke he kupu mooli ti papatiso. Tokoua he tau tama fifine he Matakainaga ko Goslin he magaaho fakamui ne ō he Aoga Kiliata ti eke mo tau misionare. Tuga e laupepa fakamooli, ko e lapakofe fakatagi utafano ne lagomatai e tau tagata fakailoa tokologa ke kamata e fakamatala. Fakamui, he Aoga Fekafekau Fakateokarasi, to fakamahani he Patuiki e tau tagata haana ke eke mo tau faiaoga lauia mitaki.

10, 11. Fakaaoga fēfē e tau nusipepa mo e letiō ke fakamatala e tala mitaki, ti ko e ha kua lauia mitaki e tau puhala ia?

¹⁰ I lalo he takitakiaga he ha tautolu a Patuiki, kua fakaaoga he tau tagata he Atua e tau puhala kehekehe ke maeke ke hokotia ke he tau tagata tokologa he gahua fakamatala. Ko e tau puhala ne mua atu e aoga ka tokogahoa ni a tautolu ko e tau tagata gahua. (Totou Mataio 9:37.) Ma e fakatai, loga e tau kua mole ne fakaaoga e tau nusipepa ke fakamatala e tala mitaki. He tau faahi tapu takitaha ne fakafano he Matakainaga ko Russell e lauga Tohi Tapu ke he matakau fakapuloa tala. Ti fakafano e lautolu e lauga haana ke he tau nusipepa i Kanatā, Europa, mo Amerika. He 1913, ne lomi e tau lauga he Matakainaga ko Russell ke he 2,000 nusipepa ti totou ai kavi ke he 15,000,000 tagata!

¹¹ Ne lauia mitaki foki e fakaaoga he letiō ke fakamatala e tala mitaki. Ia Aperila, 16, 1922, ne taute he Matakainaga ko Rutherford taha he tau lauga fakamua haana he letiō, ti kavi ke he 50,000 e tagata ne  fanogonogo. Nakai leva ti kamata a tautolu ke fakaaoga e fale letiō ni ha tautolu ne fakahigoa WBBR, ti ko e polokalama fakamua ne logona ia Fepuari 24, 1924. Ko e Watch Tower ia Tesemo 1, 1924, ne pehē: “Talitonu a mautolu ko e letiō ko e puhala nakai tauuka mo e lauia mitaki he fakaholofa e fekau he kupu mooli ne kua fakaaoga ai.” Tuga e tau nusipepa, ne lagomatai he letiō a tautolu ke hokotia ke he tau tagata tokologa he tau matakavi ne tokogahoa ni e tagata fakailoa.

12. (a) Ko e heigoa e tau vahega fakamatala ke he toloaga kua fiafia lahi a koe ki ai? (e) Ko e heigoa ka lagomatai a tautolu ke fahia he ha hopoate kua liga moua e tautolu he fakamatala ke he toloaga?

¹² Ko e puhala lauia mitaki e fakamatala he toloaga kua fakaaoga ke hokotia ke he tau tagata mogonei. Lahi e gahua ke fakamatala ke he tau tagata he leoaga pasi, tuaga tuleni, tau paakaaga, ti pihia ke he tau malē mo e tau makete. Fakahopoate kia he fakamatala he toloaga a koe? Ka pihia, liogi ma e lagomatai mo e manamanatu ke he talahauaga he Matakainaga ko Manera ko e leveki faifano, ne pehē: “Onoono a mautolu ke he tau puhala foou he gahua ko e taha puhala ke fekafekau ki a Iehova, ko e taha puhala ke fakakite e fakamooli ha mautolu ki a ia, ko e taha kamatamata ke he ha mautolu a mahani hakohako, ti kua makai a mautolu ke fakamooli na mautali a mautolu ke fekafekau ki a ia he ha puhala ne ole mai a ia.” Ka fahia a tautolu mai he tau hopoate ha tautolu mo e fakaaoga e tau puhala foou ke fakamatala,  kua fakamalolō e tautolu e falanaki ha tautolu ki a Iehova ti eke mo tau tagata fakamatala mitaki.​—Totou 2 Korinito 12:9, 10.

13. Ko e ha e fakaaoga he ha tautolu a faahi kupega hila he gahua he fonua ko e puhala fakamatala lauia mitaki, ti ko e heigoa e tau iloaaga kua moua e koe he fakaaoga ai?

¹³ Tokologa e tagata fakailoa ne fiafia he tala age ke he tau tagata hagaao ke he ha tautolu a faahi kupega hila he jw.org, ne kua maeke ia lautolu ke totou mo e moua mai e tau tohi faka-Tohi Tapu ke molea e 700 vagahau. He tau aho takitaha, molea 1.6 e miliona tagata ne ahiahi atu ke he ha tautolu a faahi kupega hila. He vahā kua mole, ne hokotia e tala mitaki he letiō ke he tau tagata ne nonofo mamao. Mogonei, kua pihia foki e ha tautolu a faahi kupega hila.

14. Ko e heigoa e fakamahaniaga kua lata mo e tau tagata fakailoa, ti ko e heigoa e aoga ne lagomatai a lautolu ke eke mo tau faiaoga lauia mitaki?

¹⁴ Ko e tau puhala ne fakatutala a tautolu ki ai ne kua lauia mitaki lahi ai. Ka kua lata e tau tagata fakailoa he tau tau fakamua atu ia ke fakamahani ke eke mo tau fekafekau. Ma e fakatai, nakai talia he tagata he kaina he falu mogo e mena ne logona e ia he lapakofe fakatagi utafano. Falu mogo kua fiafia e tagata he kaina ti manako ke fakaako atu foki. Lata he tau tagata fakailoa ke iloa e puhala ke fahia fakailoilo mai he tau totokoaga ti eke mo tau faiaoga mitaki. Nakai fakauaua ai ko e lagomatai he agaaga tapu he Atua, ne kitia he Matakainaga ko Knorr kua aoga lahi ma e tau tagata fakailoa ke fakaako e puhala ke vagahau he gahua he fonua. Kamataaga he 1943, ne kamata e tau fakapotopotoaga ke fakatokatoka e Aoga Fekafekau Fakateokarasi. Lagomatai he aoga nei e tau tagata oti ke eke mo tau faiaoga lauia mitaki.

15. (a) Ko e heigoa ne iloa he falu he taute e lautolu e lauga he Aoga Fekafekau Fakateokarasi? (e) Aoga mooli fēfē e maveheaga ha Iehova ne fakamau ia Salamo 32:8 he tuaga haau?

¹⁵ Tokologa e matakainaga taane ne nakai mahani ke vagahau i mua he toloaga. Manatu he Matakainaga ko Ramu e lauga fakamua haana he 1944. Hagaao e lauga ke he tagata he Tohi Tapu ko Toeke. Pehē a ia: “Fepāaki e tau tuli, vivivivi e tau lima, ti gatata e tau nifo haaku.” Lafi e ia: “Ko e iloaaga fakamua ia haaku he vagahau mai i mua, ka e nakai mahala au.” Pete he nakai mukamuka, ne taute lauga foki e tau fanau he aoga. Manatu he Matakainaga ko Manera e mena ne tupu he taute he taha tama taane e lauga fakamua haana: “Kua hopoate lahi a ia ti ko e magaaho ne kamata e lauga haana, ne tagi agataha a ia. Ka e he eketaha ke taute ai, ne tagi a ia he lauga katoa haana.” Liga nakai tali a koe he tau feleveiaaga po ke fai vala i ai, ha kua mā a koe po ke logona hifo e koe kua nakai maeke a koe ke taute ai. Ka pihia,  ole ki a Iehova ke lagomatai a koe ke fahia mai he tau hopoate haau. To lagomatai e ia a koe tuga he lagomatai e ia a lautolu he tau tagata fakaako fakamua he Aoga Fekafekau Fakateokarasi.​—Totou Salamo 32:8.

16. Ko e heigoa e foliaga he Aoga Kiliata (a) he vahā kua mole mo e (e) tali mai he 2011?

¹⁶ Kua foaki foki he fakatokatokaaga he Atua e fakamahaniaga he Aoga Kiliata. Taha foliaga he aoga ko e lagomatai e tau tagata fakaako ke fakamalolō e manako ha lautolu ke fakamatala e tala mitaki. Kamata e Aoga Kiliata he 1943, ti tali mai mogoia ne 8,500 e tagata fakaako ne fakamahani ti fakafano ke he 170 e motu. Tali mai he 2011, ko lautolu ne uiina ke he aoga nei ko e tau paionia pauaki, tau leveki faifano, tau matakainaga he Peteli, po ke tau misionare he fonua ne nakaila o atu ki Kiliata.

17. Lauia mitaki fēfē e fakamahaniaga i Kiliata?

¹⁷ Kua lauia mitaki nakai e Aoga Kiliata? Ē. Manamanatu ke he mena ne tupu i Sapanī. Ia Aokuso 1949, gahoa ai ke nakai tokohogofulu e tagata fakailoa he motu ia. Ka e he matahiku he tau ia, 13 e misionare ne fakamatala mo e tau tagata fakailoa he matakavi. Mogonei, kavi ke he 216,000 he tau tagata fakailoa i Sapanī, ti teitei hafa ia lautolu ko e tau paionia!

18. Ko e heigoa falu aoga ne moua e tautolu?

¹⁸ Loga foki e tau aoga ha tautolu, tuga e Aoga Fekafekau he Kautu, Aoga Fekafekau Paionia, Aoga ma e Tau Tagata Fakamatala, Aoga ma e Tau Leveki he Takaiaga mo e ha Lautolu a Tau Hoana, mo e Aoga ma e Tau Tagata he La Komiti mo e ha Lautolu a Tau Hoana. Ko e tau aoga nei nukua kautū he fakamahani e tau matakainaga mo e kua fakamalolō e tua ha lautolu. Maaliali ai kua matutaki a Iesu ke fakamahani e tau tagata tokologa.

19. Ko e heigoa ne talahau he Matakainaga ko Russell hagaao ke he gahua fakamatala, ti kua fakamooli fēfē e mena nei?

¹⁹ Kua pule e Kautu he Atua ke molea 100 e tau. He magaaho ia, ko e ha tautolu a Patuiki ko Iesu Keriso ha ne takitaki e gahua fakamatala. He 1916, he talitonu e Matakainaga ko Russell ko e fakamatala he tala mitaki to fakalaulahi ke he lalolagi katoa. Pehē a ia: “Kua tupu mafiti e gahua, mo e to matutaki ke holo ki mua, ha kua ha ha i ai e gahua he lalolagi katoa ke taute he fakamatala e ‘evagelia he kautu.’” (Faith on the March, mai ia A. H. Macmillan, lau 69) Kua taute e gahua ia mogonei! Fakaaue a tautolu ki a Iehova ko e Atua he monuina po ke, mafola ha kua foaki e ia ki a tautolu e tau mena oti kua lata ke taute e tautolu e finagalo haana!