Iloa Nakai e Koe?

Tatanaki mooli kia he tau lo e tau mena kai ha lautolu he vahā mafana mo e fakaputu e tau mena ne helehele e lautolu?

▪ Pehē e Tau Fakatai 6:6-8: “Ko e tagata teva na e, kia fano a koe ke he lo, kia kitekite ā koe ke he hana mahani ke iloilo ai a koe; nakai fai takitaki a ia, po ke leoleo, po ke pule, Kua taute ai e ia hana tau mena kai ke he tau mafana, mo e tanaki ai e ia hana tau mena kai ke he vaha ne helehele ai e tau saito.”

Loga e faga kehekehe he tau lo ne tatanaki mooli e tau mena kai. Liga ko e faga lo ne hagaao a Solomona ki ai—mo e kitia lahi i Isaraela mogonei—ko e lo helehele (Messor semirufus).

Hagaao ke he taha tohi, “ne toka he tau lo helehele e tau fata ha lautolu he magahala afua ke kumi mena kai . . . [ti] fakaputu e tau tega akau he tau atu mahina mafana he tau.” Liga tau e lautolu e tau tega akau po ke oko he kelekele. Ne ta e lautolu e tau fata he tau lalolalo ne tata ke he tau fonua, tau fale tanaki, po ke tau mena ne haha ai e tau saito, ke maeke ai ke moua e tau saito.

Ki loto he fata, ne fakaputu he tau lo e tau tanakiaga mena kai he tau kaava takitaha he tau lapalapa ne tututaki ke he tau la hala. Ko e tanakiaga mena kai ha lautolu ne liga fuafua ke he 12 e senetimita he laulahi mo e taha e senetimita he tokoluga. He puke e tau faga lo he tau lo helehele ati talahau ai na maeke ke momoui ke “molea e 4 e mahina mo e nakai moua mai e tau mena kai po ke vai i fafo.”

Ko e heigoa ne putoia he eke mo tagata taute uaina he patuiki?

▪ Ko Nehemia ko e tagata taute uaina he patuiki Peresia ko Aretaseta. (Nehemia 1:11) He tau lotopā he fale patuiki he Faahi Uta i tuai, ko e tagata taute uaina he patuiki ne nakai ko e fekafekau fakateaga. Ka ko ia ko e tagata gahua tu tokoluga. Ko e tau tohi fakamaama mo e tau fakatino ne loga lahi mahaki i tuai he tau tagata taute uaina kua fakaatā a tautolu ke iloa falu talahauaga hagaao ke he matagahua ha Nehemia he lotopā i Peresia.

To kamata he tagata taute uaina e uaina he patuiki neke fakakona aki a ia. Kua mauokafua katoatoa e patuiki ke he tagata taute uaina. “Ne lata lahi ke moua e tau fekafekau falanaki fakamooli he lotopā ha ko e tau lagatau ne tupu lahi ke he lotopā Achaemenid [tagata Peresia],” he talahau he pulotu ko Edwin M. Yamauchi. Ko e tagata taute uaina he patuiki ne liga fiafia lahi ki ai ne fakaohooho malolō ke he patuiki. Ko e gahua tata lahi haana mo e magafaoa patuiki he tau aho takitaha ati liga maeke ia ia ke fifili ko hai ka o atu ke he patuiki.

Liga ko e tuaga pihia ati talia he patuiki e ole ha Nehemia ke fakaatā a ia ke liu ki Ierusalema ke atihake e tau kaupā i ai. Liga kua uho lahi mahaki a Nehemia ke he patuiki. Ne talahau he Tohi Tapu: “Ti pehe mai e patuiki . . . to liu mai a fe foki a koe?”—Nehemia 2:1-6.

[Diagram/Fakatino he lau 18]

Ata mai he fale patuiki Peresia ha Persepolis

[Diagram]

(Ma e puhala katoa ne tohi aki, kikite e tohi)

Tagata taute uaina

Foufou e Tama Patuiki ko Xerxes

Tariu ne Mua

[Credit Line]

© The Bridgeman Art Library International