He fakaaoga he Tohi Tapu, ko e “tua” ne putoia e taofiaga mauokafua ne fakavē ke he fakamooliaga malolō. Ko e tagata kua tua ke he Atua kua mauokafua to fakamooli e Ia e tau maveheaga oti Haana.

Ne fakamatapatu e Mose e moui haana ke he tau maveheaga he Atua. (Kenese 22:15-18) Na moua e ia e tuaga ke moui hagahaga mitaki ke he tau monuina ha Aikupito, ka e tiaki e ia e tau tuaga ia, he “fifili e ia e matematekelea fakalataha mo e tau tagata he Atua, ka e nakai ko e fiafia ke he hala kua mole vave.” (Heperu 11:25) Ko e fifiliaga kia ne taute e ia mogoia ni, ko e fifiliaga ka tokihala ai he mogo fakamui? Nakai, ha kua talahau e Tohi Tapu ko Mose ne “fakauka a ia tuga ne mena kua kitia e ia a ia nakai kitia.” (Heperu 11:27) Ne nakai tokihala a Mose ke he tau fifiliaga ne taute e ia ha ko e tua.

Ne eketaha a Mose ke fakamalolō e tua he falu. Ma e fakatai, manamanatu ke he mena ne tupu he mogo ne tuga kua apitia e tau Isaraela he vahāloto he tau kautau ha Farao mo e Tahi Kula. He matakutaku ke he mena ne tuga ko e malaia kua tata lahi mai, ne tagi atu e tau Isaraela ki a Iehova mo Mose. To tali atu fēfē a Mose?

Ne tote e maama ha Mose kua amanaki e Atua ke veveheua e Tahi Kula, he hafagi e puhala ke fakahao e tau Isaraela. Ka e mauokafua a Mose to taute he Atua e taha mena ke puipui e tau tagata Haana. Ti manako a Mose ke he tau matakainaga Isaraela haana ke mauokafua pihia foki. Totou e tautolu: “Ti pehe mai a Mose ke he motu, Ua matakutaku a mutolu, ka e tutu a mutolu mo e kitekite ke he fakamouiaga mai ia Iehova, ko e eke ne fai e ia ma mutolu ke he aho nai.” (Esoto 14:13) Kautū nakai a Mose he fakamalolō e tua he tau matakainaga Isaraela haana? E, ha kua pehē e Tohi Tapu hagaao ki a Mose mo e tau Isaraela oti: “Ko e tua ne o hifo ai a lautolu ke he tahi Kula tuga e kelekele momo.” (Heperu 11:29) Ne aoga e tua a Mose ki a ia ti pihia mo e tau tagata oti ne fakaako mai i ai.

Maeke ia tautolu ke fifitaki a Mose he fakamatapatu e tau momoui ha tautolu ke he tau maveheaga he Atua. Ma e fakatai, ne mavehe he Atua ke leveki e tau manako fakatino ha tautolu kaeke ke tuku fakamua e tautolu e tapuakiaga haana he tau momoui ha tautolu. (Mataio 6:33) Mooli, liga paleko ki a tautolu ke totoko e peehiaga ke he tau koloa fakatino ne holofa lahi he vahā nei. Ka e maeke ia tautolu ke talitonu ka fakamakamaka a tautolu ke fakamukamuka tumau e tau momoui ha tautolu mo e hagaaki ke he tapuakiaga ha tautolu, to foaki e Iehova e tau mena oti kua lata mo tautolu. Ne mavehe e ia: “Nakai tuai toka ni e au a koe, nakai tuai tiaki ni e au a koe.”​​—Heperu 13:5.

Eketaha foki a tautolu ke lagomatai e falu ke tupu e tua. Tuga anei, ko e tau mamatua pulotu ne mailoga e tuaga lahi mahaki ke atihake e tua he tau tama ha lautolu. He lalahi hake a lautolu, kua lata e tau tama ke moua e iloilo aoga kua moui e Atua ti foaki e ia ki a tautolu e tau poakiaga ke he tau mena kua hako mo e hepe. Lafi ki ai, kua lata a lautolu ke talitonu ko e mumui ke he tau poakiaga haana ko e puhala mitaki lahi mahaki mooli he moui. (Isaia 48:17, 18) Ko e tau matua ne foaki ke he tau tama ha lautolu e mena fakaalofa uho ka lagomatai e lautolu e tau tama ha lautolu ke moua e tua ko e Atua “kua moui a ia, ko ia foki kua taui mai a lautolu kua kumi fakamakutu kia ia.”​​—Heperu 11:6.