He tau tau fakamua he moui haaku, ne nonofo e magafaoa haaku tata ki Leipzig, Faahi Uta ha Sihamani, ai mamao mo e katofia ha Czech mo Polani. He ono e tau haaku, ne fano e matua taane haaku ke gahua he taha motu ti ō auloa a mautolu​​—ō mua ki Parasili ti ō ki Ekuatoa.

He 14 e tau haaku, ne fakafano au ke he aoga i Sihamani. Ha kua mamao lahi e tau matua haaku i Amerika Toga, ne leveki ne au a au. Ne tū tokotaha lahi au. Ti ai manamanatu lahi au ke he lauiaaga he falu ha ko e tau gahua haaku.

He 17 e tau haaku, ne liliu mai e tau matua haaku ki Sihamani. Mogo fakamua, ne nofo au he kaina ha laua. Ka ko e aga tū tokotaha haaku ati uka lahi au ke liu nofo mo e tau matua haaku. He 18 e tau haaku, ne fano kehe au he kaina.

Ne lahi fakahaga e fia iloa haaku mo e kumi he kakano he moui. Mole e kitekite ke he tau puhala moui mo e tau matakau kehekehe, ne mauokafua au ko e mena kua mua e mitaki ke taute e au he moui haaku ko e kumikumi ke he palaneta fulufuluola nei ato moumou he tau tagata.

Ne toka e au a Sihamani, fakatau e pasikala afi ti fano ki Aferika. Ka e nakai leva ti lata au ke liu ki Europa ke taute he pasikala afi haaku ha kua malona. Ai leva, ti haia au he mataafaga i Portugal. Ne fifili au ke toka hifo e pasikala afi haaku mo e heke he toga.

Ne fano au mo e matakau fuata ne tauteute ke o atu he toga ke he taha faahi he Atlantic Ocean. Feleveia au mo e taha ia lautolu, ko Laurie, ne eke mo hoana haaku he mogo fakamui. Fakamua, ne o atu a maua ke he tau aelani Caribbean. Ti nakai leva e nonofo i Puerto Rico, ne liliu a maua ki Europa. Amanaki a maua ke kumi taha toga ke taute mo heke he ō fenoga. Ka e tolu ni e mahina he kumi ai, ne oti noa e matagahua ia. Ne poaki au ke fano he kautau Sihamani.

Ne 15 e mahina ne fano au he kautau ō toga ha Sihamani. He magahala ia, ne mau a maua mo Laurie ti tauteute ke matutaki e moui ō fenoga ha maua. Ato fano au he kautau, ne fakatau e maua e gati poti. He haia au he kautau, ne talaga  fakahaga ai e maua ti eke mo toga tote. Amanaki a maua ke nonofo i ai mo e matutaki ke kumikumi ke he palaneta fulufuluola nei. Ko e magaaho nei​​—he oti e kautau haaku mo e ato mau e toga​​—ne feleveia a maua mo e Tau Fakamoli a Iehova ti kamata ke fakaako e Tohi Tapu.

He mogo fakamua, ne nakai kitia e au e lata ke hiki lahi e moui haaku. Kua mau e au e fifine ne nofo mo au, ti kua fitā e oti e ula haaku. (Efeso 5:5) Ma e tau amanakiaga ha maua ke evaeva he lalolagi, ne manatu au ko e hagaaki e tau momoui ha maua ke kitekite ke he tau tufugatia homo ue atu he Atua kua latatonu pauaki.

Ka e mooli, kua latatonu au ke taute e tau hikiaga​​—mua atu ke he mahani haaku. Ha kua lahi e mahani fakatokoluga mo e aga tū tokotaha, ne falanaki katoatoa ni au ke he tau lotomatala mo e tau mena haaku ne moua. Manamanatu ni au ki a au.

He taha aho, ne totou e au e lauga talahaua ha Iesu he mouga. (Mataio, veveheaga 5-7) Fakamua, ne fakagogoa au he tau fiafia po ke tau uhoaki ne tutala a Iesu ki ai. Ma e fakatai, ne pehē a ia kua fiafia a lautolu ne fia kai mo e fia inu. (Mataio 5:6) Ne manamanatu au ko e maeke fēfē e nofogati ke fakafiafia e tagata. He matutaki au ke fakaako, ne mailoga e au kua nofogati fakaagaaga a tautolu oti ka e lata ia tautolu ke talia fakatokolalo e manako ia ato maeke ai ke fakamakona. Tuga ne talahau e Iesu: “Fiafia a lautolu ne manamanatu ke he tau mena fakaagaaga kua lata ma lautolu.”​​—Mataio 5:3, NW.

He mole e kamata e fakaako Tohi Tapu ha maua i Sihamani, ne hiki a maua mo Laurie ki Falani, mo e ki Italia he mogo fakamui. Ko e tau matakavi oti ne ō a maua ki ai, ne feleveia a maua mo e Tau Fakamoli a Iehova. Ne nava lahi au he fakaalofa mooli ha lautolu ko e taha ke he taha mo e kaufakalataha ha lautolu. Kitia e au ko e Tau Fakamoli ko e tau matakainaga mooli he lalolagi katoa. (Ioane 13:34, 35) Fai magaaho he mole, ne papatiso a maua mo Laurie ko e Tau Fakamoli a Iehova.

He mole e papatiso, ne matutaki au ke taute e tau hikiaga ke he mahani haaku. Ne fifili a maua mo Laurie ke o hifo he toga he kautahi ha Aferika ti ō mogoia ke he taha faahi he Atlantic Ocean ki Amerika. Magaaho ia he haia he moana​​—ko maua ni tokoua he toga tote ne takai viko he tahi makimaki​​—ne mailoga e au e fakateaga haaku ka fakatatai ke he ha tautolu a Tufuga mua ue atu. Ha kua lahi e magaaho haaku, (nakai loga e gahua ke taute he moana), ne hagaaki au ke totou e Tohi Tapu. Ne omoomoi lahi au ke he tau tala he moui ha Iesu he lalolagi. Ko e tagata mitaki katoatoa a ia ne mua atu e lotomatala, ka e nakai fakahakehake ne ia a ia. Nakai hagaao e moui haana ki a ia ni ka e hagaao ke he haana Matua he lagi.

He manamanatu fakahokulo au ke he fakafifitakiaga ha Iesu, ne kitia e au e lata ke tuku fakamua e Kautu he Atua ke he moui haaku ka e nakai fakahaohao ai he tau mena kehekehe ne manako au ke taute. (Mataio 6:33) He hohoko a maua mo Laurie ki Amerika, ne fifili a maua ke nonofo i ai mo e hagaaki ke he tapuakiaga ha maua.

Ko e puhala moui fakamua haaku he falanaki ni ki a au, ne tamai e fakauaua lahi. Ka ko e mogonei, kua moua e au e punaaga he pulotu mauokafua ke takitaki au. (Isaia 48:17, 18) Moua foki e au e kakano he moui ne nakai ha ha ia au fakamua​​—ko e tapuaki ke he Atua mo e lagomatai e falu ke iloa a ia.

He fakagahua e tau matapatu fakaakoaga he Tohi Tapu, kua fakamalolō lahi e fakamauaga ha maua mo Laurie. Ti monuina foki a maua he taha e tama fifine fulufuluola, kua tupu hake a ia ke iloa mo e fakaalofa ki a Iehova.

Nakai pehē kua holo mitaki tumau e moui ha mautolu. Mo e lagomataiaga ha Iehova, kua eketaha a mautolu ke nakai fakateaga po ke oti e tua ki a ia.​​—Tau Fakatai 3:5, 6.