Fiafia lahi au ke he tau mena ne tufugatia tali mai he tote. Fiafia foki e magafaoa haaku ke o atu ke he tau uhovao mo e tau namo fuluola he takatakaiaga he maaga ha mautolu ko Jyväskylä i Central Finland. Fia loto foki au ke he tau manu. He magaaho ne tote au, ne fia loto au ke totō e tau pusi mo e tau kulī oti! Magaaho ne lahi au, ne ita au ke he tau tagata ne leveki fakakelea e tau manu. Nakai leva, ti feleveia au mo e tau tagata ne fakaalofa ke he tau manu ne manako ke puipui a lautolu.

Lahi e tau mena ne taute e mautolu ke puipui e tau manu. Tufatufa e mautolu e tau tala mo e taute e foleni totoko ke he tau fale koloa ne sela e tau mena tui ne taute mai he tau kili manu, mo e tau fale kumikumi ne fakaaoga e tau manu. Fakatu e mautolu e fakatokatokaaga foou ke puipui e tau manu. Fakamalolō lahi e tau gahua ha mautolu he lali ke puipui e tau manu, ti fetoko tumau a mautolu mo e tau leoleo. Kua taofi he tau leoleo au mo e lagaloga e uta ke he hopoaga.

Nakai ni tupetupe au ke he tau manu ka e pihia ke he falu lekua he lalolagi. Fakahiku, ne putoia au ke he loga e tau fakatokatokaaga, tuga e Amnesty International mo e Greenpeace. Lalago lahi au ke he tau gahua ha lautolu ke lagomatai a lautolu ne mativa mo e tau lalo tagata.

He magaaho fakamui, ne iloa e au kua nakai maeke au ke hiki e lalolagi. Pete ni kua maeke he tau fakatokatokaaga nei ke lagomatai e tau lekua ikiiki, ka e holo agaia ki mua e kelea he tau lekua lalahi. Tuga kua fai agaaga malolō kelea ne pule ke he lalolagi katoa mo e nakai fai tagata ne fia iloa ki ai. Nakai maeke au ke taute ha mena.

Momoko au he nakai maeke au ke hiki ha mena, ti manamanatu au ke he Atua mo e Tohi Tapu. Kua fakaako Tohi Tapu au mo e Tau Fakamoli a Iehova he taha magaaho. Iloa e au ko e Tau Fakamoli ko e tau tagata mitaki mo e totonu a lautolu kia au, ka e nakai la manako au ke hiki e moui he magaaho ia. He magaaho nei, kua fai hikiaga ne taute.

Kamata au ke totou e Tohi Tapu ti moua e au e mafanatia. Loga e tau talahauaga mai he Tohi Tapu ke leveki fakamitaki e tau manu. Ma e fakatai, pehē e Tau Fakatai 12:10 “Kua fakahelehele he tagata tututonu e manu hana.” Iloa e au nakai ko e Atua ne taute e tau lekua he lalolagi. Kua holo ki mua e tau mena kelea he nakai omaoma e tau tagata ke he Atua. Fiafia au he fakaako ke he fakaalofa ha Iehova mo e haana fakauka.​—Salamo 103:8-14.

He magaaho taha ia, ne fakapuke e au e laupepa ke moua e tohi Ko e Heigoa ne Fakaako Moli he Tohi Tapu? Nakai leva ne omai e hoa mau ke he kaina haaku mo e foaki e fakaakoaga Tohi Tapu, ti talia e au. Mo e kamata au ke fano ke he tau feleveiaaga he Tau Fakamoli a Iehova he Fale he Kautu. Mogoia foki, ne kamata au ke tokaloto e tau mena ne fakaako mai he Tohi Tapu.

Lagomatai he Tohi Tapu au ke taute e tau hikiaga. Tiaki e au e ula tapaka mo e inu kava lahi. Hiki e au e tauteuteaga mo e fakaoti e vagahau kelea. Mo e fakaako foki e au ke fakalilifu e pule mo e fakatufono. (Roma 13:1) Omaoma foki au ke he talahauaga he Tohi Tapu hagaao ke he mahani fakataane mo e fifine ne nakai fai taofiaga kia au fakamua.

Uka lahi au ke toka e tau fakatokatokaaga ne leveki e tau tagata mo e tau manu. Fai magaaho to hiki. He magaaho fakamua, ne manatu au kua fakavaia e au e tau fakatokatokaaga nei ka toka e au a lautolu. Ka e maama e au ko e Kautu he Atua ni ka utakehe e tau lekua he lalolagi. Ne fifili e au ke fakaaoga e malolō haaku ke lalago e Kautu nei mo e lagomatai e falu ke fakaako mo e iloa e Kautu nei foki.​—Mataio 6:33.

Mogo fakamua ne totoko au, ne vevehe ua e tau tagata mitaki po ke kelea, mo e nakai manako au kia lautolu ne kelea. Ka e fakaaue ke he Tohi Tapu, kua nakai vihiatia e au e tau tagata. Ka e lali au ke feaki e fakaalofa Kerisiano ke he tau tagata oti. (Mataio 5:44) Fakakite e au e fakaalofa nei he fakamatala e tala mitaki ke he Kautu he Atua. Kitia e au e puhala he gahua nei ne fakalaulahi e mafola, fiafia mo e foaki ke he tau tagata e amaamanakiaga mooli.

Moua e au e mafola he loto he falanaki ki a Iehova to utakehe e ia e tau lekua oti. Talitonu au ko e Tufuga ka nakai fakaata e tau manu mo e tau tagata ke ekefakakelea tukulagi, mo e fakaata ke moumou e lalolagi fuluola ha tautolu. Ko e Kautu haana ka liu fakafoou e tau mena kua moumou he mogonei. (Isaia 11:1-9) Fiafia lahi au he iloa e kupu mooli mo e lagomatai e falu ke moua e tua ke he kupu mooli. Nakai liu au ke logona hifo kua lata au ke hiki e lalolagi.