Onoono la ke he tama taane tote he fakatino. Tuga kua matimati po ke nofo tokotaha mo e matakutaku a ia, pihia nakai? Kua fa logona pihia nakai a koe?— Pihia e logonaaga he tau tagata oti he falu magaaho. Ne tutala e Tohi Tapu ke he tau kapitiga ha Iehova ne matimati mo e matakutaku pihia foki. Taha ia lautolu ia ko Elia. O mai la ke fakaako hagaao ki a Elia.

Ne nofo a Elia i Isaraela he vahā fakamua atu, ato fanau a Iesu. Ko Ahapo ko e patuiki ha Isaraela ne nakai tapuaki a ia ki a Iehova ko e Atua mooli. Ko Ahapo mo e hoana haana ko Iesepela, ne tapuaki ke he atua fakavai ko Paala. Ti laulahi he tau tagata i Isaraela ne kamata foki ke tapuaki ki a Paala. Ne favale lahi e patuiki fifine ko Iesepela ti manako ke tamate e tau tagata ne tapuaki ki a Iehova, putoia foki a Elia! Iloa nakai e koe e mena ne taute e Elia?—

 Ne hola a Elia! Ne fano fakamamao a ia ke he tutakale ti fakamumuli he ana. Ko e ha he manatu e koe ne taute e ia e mena nei?— E, ha kua matakutaku a ia. Ka kua nakai lata a Elia ke matakutaku. Ko e ha? Ha kua iloa e ia na maeke a Iehova ke lagomatai a ia. Na fakakite age e Iehova e malolō haana ki a Elia he magaaho fakamua. He taha mogo, ne tali e Iehova e liogi ha Elia he fakafano mai e afi he lagi. Ti mooli to lagomatai foki e Iehova a Elia mogonei!

He nofo a Elia he ana, ne vagahau a Iehova ki a ia mo e hūhū: ‘Ko e eke ha a koe he mena nei?’ Ne tali e Elia: ‘Ko au ni ne toe ne tapuaki agaia ki a koe. Ko au ni tokotaha, ti matakutaku au neke tamate foki au.’ Manatu ni a Elia kua tamate e tau tagata oti ne tapuaki ki a Iehova. Ka e tala age a Iehova ki a Elia: ‘Nakai, ai mooli e mena ia. Kua toko 7,000 e tagata ne tapuaki agaia ki a au. Kia loto malolō. Kua lahi agaia e gahua haaku ke taute e koe!’ Fiafia nakai a Elia ke logona e tala ia he manatu e koe?—

Ko e heigoa haau kua fakaako mai he mena ne tupu ki a Elia?— Kua nakai lata ia koe ke logona e matimati mo e matakutaku. Kua ha ha ia koe e tau kapitiga ne fiafia ki a Iehova mo e fakaalofa ki a koe. Na mua ue atu foki e malolō ha Iehova, ti to lagomatai tumau e ia a koe! Kua fiafia nakai a koe ke iloa kua nakai nofo tokotaha a koe?—