O mai la ke fakaako hagaao ke he fuata taane ne fakahao e agikolo haana. Ko e agikolo he fuata taane ko e aposetolo ko Paulo. Nakai iloa e tautolu e higoa he fuata taane, ka e iloa e tautolu ne taute e ia taha mena loto malolō lahi. Manako nakai a koe ke iloa e mena ne taute e ia?—

Ko Paulo i loto he fale puipui i Ierusalema. Ne kua tapaki a ia ha kua fakamatala hagaao ki a Iesu. Ne fakavihia e falu tagata kelea ki a Paulo, ti taute e lautolu e pulega kelea muitui. Ne pehē a lautolu: ‘Kia ole ke he takitaki kau ke poaki e tau kautau haana ke ta mai a Paulo ke he hopoaga. To fakamumuli a mautolu he kaukau hala, ti ka fina atu a Paulo, to keli e mautolu a ia!

Ne logona he nefiu ha Paulo e pulega nei. Ko e heigoa haana ka taute? Ne fina atu a ia ke he fale puipui ti tala age ki a Paulo. He mogoia ni, ne fekau e Paulo a ia ke fano ke tala age ke he takitaki kau hagaao ke he pulega kelea muitui nei. Fēfē e manatu haau, to mukamuka nakai e nefiu ha Paulo ke vagahau ke he takitaki kau?— Nakai, ha ko e takitaki kau ko e tagata tu tokoluga. Ka kua loto malolō e nefiu ha Paulo ti vagahau atu ke he takitaki kau.

Ne iloa mitaki he takitaki kau e mena ke taute. Ne fakatokatoka e ia teitei 500 e kautau ke puipui a Paulo! Ne tala age a ia ki a lautolu ke uta a Paulo ki Kaisaria he pō ia ni. Ne fakahao kia e moui ha Paulo?— E, ne nakai maeke e tau tagata kelea ke keli a ia! Ne nakai gahuahua e pulega kelea ha lautolu.

Ko e heigoa haau ka fakaako mai he tala nei?— Na maeke foki a koe ke loto malolō tuga e nefiu ha Paulo. Kua lata ia tautolu ke loto malolō ka tutala ke he falu hagaao ki a Iehova. To loto malolō nakai a koe mo e fakatumau ke tutala hagaao ki a Iehova?— Ka taute pihia e koe, to liga fakahao e koe e moui he taha tagata.