Isaia 36:1-22
36 KO e tau hogofulu ma fa ne pule ai e patuiki ko Hesekia, ne hake ai e patuiki a Asuria ko Sanerivi mo e tau ke he tau maga oti i Iuta ne nonofo taue ai a lautolu, ti moua ai e ia māna.
2 Ti fakafano mai he patuiki a Asuria i Lakisa a Ravesake mo e kau lahi, ki Ierusalema ke he patuiki ko Hesekia; ti tu mai a ia tata age ke he hala vai he namo i luga ke he puhala tu he fonua he tagata unu tapulu.
3 Ti o atu kia ia a Eliakimo ko e tama a Hilikia ko ia ne pule ke he magafaoa, mo Sevena ko e tohikupu, mo Ioaa ko e tama a Asafo ko e tagata fakamau kupu.
4 Ti pehe mai a Ravesake kia lautolu, Kia pehe atu a mutolu kia Hesekia, kua vagahau mai pehe he patuiki lahi, ko e patuiki a Asuria, Ko e heigoa kia e mena nai ke tua ki ai kua tua ai a koe?
5 Kua pehe a koe, (ka ko e tau kupu noa ni,) ha ha ia koe e pulotu mo e malolo ke lata mo e tau; hanai, ko hai kia kua tua ki ai a koe kua fakafualoto mai a koe kia au?
6 Kitiala, kua tua a koe ke he tokotoko na ko e kaho kua maihiihi ko Aikupito, ka tokotoko ai e tagata ti tuina ai hana lima ti ati ni; kua pihia a Farao ko e patuiki a Aikupito kia lautolu oti kua tua kia ia.
7 Kaeke foki kua pehe mai a koe kia au, Kua tua a mautolu kia Iehova ha mautolu a Atua; nakai kia ko ia ne uta kehe ai e Hesekia hana tau mena tokoluga mo e hana tau fatapoa, mo e pehe atu a ia kia Iuta mo Ierusalema, Kia hufeilo a mutolu ki mua he fatapoa nai?
8 Hanai, kia hau a koe ke pulega mo e haku iki ko e patuiki a Asuria, ti ta atu ai e au kia koe ua e afe e solofanua, kaeke kua maeke kia koe ke ta mai e tau tagata kua lata ke heke ai.
9 Ti maeke fefe kia koe ke vega taha takitaki kau ne muikau kiliiku he tau fekafekau he haku a iki? Ka kua tua a koe ki Aikupito ke moua ai e tau kariota mo e kau heke solofanua.
10 Ti kua hau noa kia au mo Iehova he hau ai au ke he motu nai ke fakaoti ai a ia? Ne pehe mai a Iehova kia au, Hake ā koe ke he motu na mo e fakaoti e koe a ia.
11 Ti pehe atu a Eliakimo, mo Sevena, mo Ioaa, kia Ravesake, Kia vagahau mai a koe ke he hau a tau fekafekau ke he vagahau Arama, ko e mena logona ai e mautolu; ka e aua neke vagahau mai a koe kia mautolu ke he vagahau Iuta ke fanogonogo ai e tau tagata ha ha i luga he kaupa.
12 Ti tali mai ai a Ravesake, Kua fakafano mai kia he iki haku au ke he iki hau katoa mo koe ke vagahau atu e au ke he tau kupu ia, ka e nakai kia fakafano mai au ke he tau tagata kua nonofo ki luga he kaupa, kia kai ai e lautolu ha lautolu a otaota, mo e inu e lautolu ha lautolu a ligi vai fakalataha mo mutolu?
13 Ti tu mai ai a Ravesake, ti ui e ia mo e leo lahi ke he vagahau Iuta, kua pehe mai, Fanogonogo mai ā mutolu ke he tau kupu he patuiki lahi, ko e patuiki a Asuria.
14 Kua vagahau mai pehe e patuiki, Aua neke fakavai e Hesekia a mutolu; ha kua nakai maeke kia ia ke laveaki a mutolu.
15 Aua neke fakatupu foki e Hesekia ha mutolu a tua kia Iehova; kua pehe atu a ia, To laveaki mai e Iehova a tautolu; nakai tuku atu e maga nai ke he lima he patuiki a Asuria.
16 Aua neke fanogonogo a mutolu kia Hesekia; ha kua vagahau mai pehe e patuiki a Asuria, Kia eke e tautolu ke mafola a tautolu mo au, ti o mai ā mutolu kia au, ti takitaha a mutolu mo e kai ke he hana ni a vine, mo e takitaha ke he hana ni a mati, mo e takitaha a mutolu mo e inu magavai ai ke he hana ni a vaikeli;
17 Ato fina atu ai au mo e uta a mutolu ke he motu tuga ne motu ha mutolu, ko e motu ne toka ai e saito mo e uaina, ko e motu ne toka ai e areto mo e tau uluvine.
18 A mutolu neke fakavai e Hesekia a mutolu, kua pehe atu, To laveaki mai e Iehova a tautolu. Kua takitaha kia e tau atua he tau motu mo e laveaki hana motu mai he lima he patuiki a Asuria?
19 Ko fe kia e tau atua a Hamato mo Arepata? Ko fe kia e tau atua a Sefavaima? Po ke laveaki nakai e lautolu a Samaria mai he lima haku?
20 Ko hai kia he tau atua oti he tau motu ia kua laveaki ha lautolu a tau motu mai he lima haku, kia laveaki ai e Iehova a Ierusalema mai he lima haku?
21 Ti fakamamate a lautolu, nakai tali atu a lautolu ha kupu kia ia; ha kua pehe mai e poaki he patuiki, Aua neke tali atu a mutolu kia ia.
22 Ti o mai ai a Eliakimo ko e tama a Hilikia ko e tagata ne pule ke he magafaoa, mo Sevena ko e tohikupu, mo Ioaa ko e tama a Asafo ko e tagata fakamau kupu, ne o mai a lautolu kia Hesekia, mo e ha lautolu a tau tapulu kua mahēhē, ti tala mai a lautolu kia ia e tau kupu a Ravesake.