Mataio 15:1-39
15 ATI o mai ai kia Iesu e tau tohikupu mo e tau farasaio mai Ierusalema, kua pehe mai,
2 Ko heigoa e mena kua holi ai he tau tutaki hau e kupu toka tuai he tau tagata i tuai? ha ko e mena kua nakai holoholo ha lautolu a tau lima ka kai mena a lautolu.
3 Ka kua tala age a ia, kua pehe age kia lautolu, Ka ko mutolu, ko e ha kua holi ai e mutolu e poaki he Atua ke he tau kupu toka tuai ha mutolu?
4 Ha kua poaki mai e Atua, kua pehe mai, Kia fakalilifu a koe ke he hau a matua tane mo e hau a matua fifine; mo e taha kupu foki, Ko e tagata kua kupu kelea ke he matua tane, po ke matua fifine, kia kelipopo ni a ia.
5 Ka e pehe a mutolu, Ko ia ka tala age ke he matua tane, po ke matua fifine, Ko e mena foaki mo poa haku a tau mena oti kua aoga kia koe;
6 Ti nakai tuai fakalilifu a ia ke he hana matua tane, po ke hana matua fifine. Kua fakahui e mutolu e poaki he Atua ke he tau kupu toka tuai ha mutolu.
7 Ko e tau tagata fakavai na e, lata ni e talahau a Isaia kia mutolu, ne pehe mai,
8 Kua fakatata mai kia au e motu nai ke he tau gutu ha lautolu, mo e fakaheke mai kia au ke he tau laugutu ha lautolu; ka ko e tau loto ha lautolu, kua fakamamao a ia ia au.
9 Kua tapuaki noa mai a lautolu kia au he fakaako e lautolu e tau poaki he tau tagata.
10 Ati ui atu ai a ia ke he lanu tagata, kua tala age kia lautolu, Fanogonogo mai a a mutolu, mo e logona;
11 Nakai ko e mena kua tuku ke he gutu ke kelea ai e tagata; ka ko e mena kua hau mai he gutu, ko e mena ia ke kelea ai e tagata.
12 Ti o mai ai hana tau tutaki kia ia, kua tala mai kia ia, Kua fioia nakai e koe, kua tupetupe e tau farasaio he logona e lautolu e kupu ia?
13 Ka e tala age a ia, kua pehe age, Ko e tau akau oti nakai to he haku Matua ha ha he lagi to huo ia.
14 Toka ai pihia a lautolu, ko e tau matapouli a lautolu ke takitaki e tau matapouli; kaeke ke takitaki he matapouli e taha matapouli, ti veveli ai a laua tokoua ke he luo.
15 Ati tala age ai a Peteru, kua pehe mai kia ia, Kia fakamatala mai e koe kia mautolu e fakatai nei.
16 Ati tala age ai a Iesu, Nakai kia la logona foki e mutolu?
17 Nakai kia la iloa foki e mutolu, ko e tau mena oti kua tuku ke he gutu, kua hoko ia ke he manava, ti tiaki ke he vao.
18 Ka ko e tau mena ke hau mai he gutu, kua hake ia mai he loto; ko e tau mena ia ke kelea ai e tagata.
19 Ha ko e mena kua hake mai he loto e tau manatu kelea, ko e keli tagata, ko e faivao, ko e feuaki, ko e kaiha, ko e talahau pikopiko, mo e kupu kelea.
20 Ko e tau mena ia ke kelea ai e tagata; ka ko e kai mena mo e tau lima nakai holoholo, nakai kelea e tagata he mena ia.
21 Kua haele kehe a Iesu he mena ia, ti hoko atu ai a ia ke he fahi ko Turo mo Saitonu.
22 Kitiala, ko e fifine Kanana, kua hau mai he fahi ia, kua ui mai kia ia, kua pehe mai, Kia fakaalofa mai a koe kia au ma Iki na e, ko e tama a Tavita; kua heketia lahi haku a tama fifine.
23 Ka e nakai tali atu a ia kia ia ha kupu. Ati o mai ai hana tau tutaki, kua ole kia ia, kua pehe mai, Kia fekau e koe a ia ke fano, ha ko e mena mui mai a ia, mo e ui mai kia tautolu.
24 Ka e tala age a ia, kua pehe, Nakai fakafano mai au ke he falu, ka ko e tau mamoe ni hokoia he faoa a Isaraela ne galo.
25 Ti hau ai a ia, kua hufeilo mai kia ia, kua pehe mai, Ko e Iki na e, kia lagomatai mai a koe kia au.
26 Ti tala age ai a ia kua pehe, Nakai lata ke uta e mena kai he fanau mo e liti ke he tau kuli.
27 Ti pehe mai a ia, Ko e Iki na e, ko e moli a koe; ka ko e mena kai he tau kuli e tau valavala mena ne mokulu hifo he kaiagamena he tau tagata ha lautolu e tau kuli.
28 Ati tala age ai a Iesu, kua pehe age kia ia, Teme na e, kua lahi hau a tua; ke tuga e manako hau, kia eke foki pihia māu. Ati malolo ai hana tama fifine ke he magaho ia ni.
29 Kua haele kehe a Iesu he mena ia ti kua fakatata age ai a ia ke he vai ko Kalilaia; kua hake a ia ke he mouga, kua nofo hifo ai.
30 Ati o mai ai kia ia e lanu tagata tokologa, ha ha ia lautolu e tau kulikuli, ko e tau matapouli, ko e tau kuhukuhu, ko e tau kunekune, mo e falu foki ne tokologa; kua tuku hifo e lautolu a lautolu ke he na ve a Iesu; ati fakamalolo ai e ia a lautolu.
31 Ti ofomate ai e lanu tagata, he kitia e lautolu e tau kuhukuhu kua vagahau mai, kua katoatoa e tau kunekune, kua o e tau kulikuli, kua ala foki e tau matapouli; ati fakaheke atu ai a lautolu ke he Atua a Isaraela.
32 Ti ui age ai a Iesu ke he hana tau tutaki, kua pehe age, Kua hofihofi haku a fakaalofa ke he lanu tagata ha ko e mena kua tolu e aho he nonofo a lautolu mo tautolu, ti nakai fai mena kai a lautolu. Nakai fia fekau e au a lautolu ke o, mo e hoge, neke mamate a lautolu he magahehala.
33 Ati tala mai ai hana tau tutaki kia ia, Ke moua mai fe e tautolu ke he tutakale e tau areto loga kia mamakona ai e lanu tagata kua tokologa pihia?
34 Ti pehe age a Iesu kia lautolu, Ne fiha kia ha mutolu a tau areto? Ti pehe a lautolu, Ne fitu, mo e tau ika gahoa to ikiiki.
35 Ti fekau atu e ia e lanu tagata, kia tatakoto a lautolu ke he kelekele;
36 Ti kua toto ai e ia e fitu e areto mo e tau ika, kua fakaaue a ia, mo e tofitofi; ati age ai e ia ke he tau tutaki hana, ti uta ai he tau tutaki ke he lanu tagata.
37 Ati kai ai a lautolu oti kana, kua mamakona; kua fafao foki e lautolu e tau mena kai ne toa, kua puke ai fitu e kato.
38 Ko lautolu foki ne kai ne fa e afe he tau tane, ka e nakai totou e tau fifine mo e tau tama ikiiki.
39 Kua fekau e ia e lanu tagata ke o, ati hake ai a ia ke he foulua, kua hoko ai ke he fahi ko Makatala.