•  Ko e ha ne lata au ke faofao?

•  Ko e heigoa ne tau taofi au?

•  Moua fēfē e au e faofao ne lata mo au?

•  Kia lau tatai

•  Ko e heigoa ne talahau he tau kapitiga haau

He falu motu, ko e tau fuata ne nakai lahi e magaaho ke faofao, mo e kua lauia e malolō tino ha lautolu. Ko e kakano mitaki ne talahau mai he Tohi Tapu “kua aoga fakatote e fakamahani ke he tau mena he tino.” (1 Timoteo 4:8) Manamanatu ke he tau mena nei:

• Maeke he faofao ke fakafiafia a koe. Fakatotoka he faofao e tau tegatega he uho ulu ke fakaokioki mo e fakafiafia a koe. Fakahigoa he falu e faofao ko e vai tului.

  “Ka poi au he mogo pogipogi, ti makaukau au mo e fiafia. Fiafia lahi e logonaaga haaku ka poi.”​—Regina.

• Lagomatai he faofao a koe ke fulufuluola. Ka faofao lagotatai ti lagomatai a koe ke malolō mo e fakakite e mauokafua.

  “Mogonei kua maeke au ke taute laga hogofulu e chin-ups​—ne nakai maeke au ke taute he tau kua mole! Mua atu, iloa e au kua leveki e tino haaku.”​—Olivia.

• Moui loa a koe ka faofao. Ka faofao ti lagomatai e gahuahua he atefua mo e hala fafagu. Ko e faofao ke he leo kofe ka lagomatai ke puipui e gagao he tau vakavaka toto​—ko e gagao ne mua atu he tokologa e tagata kua mamate.

  “Ka faofao tumau a tautolu, ko e fakakite a ia ke he Tufuga e loto fakaaue ha tautolu ke he tino ne foaki mai e ia.”​—Jessica.

Ko e Aogaaga: Lahi e aoga he faofao ma e vahā i mua mo e monuina he mogonei. “To nakai pehē a koe, ‘Kua tokihala au he fano hui he mouga mo e poi,’” ne talahau he tama fuata ko Tonya. “Nakai tokihala au he tiaki e tau lagatau ke faofao au.”

Hanei e falu kakano:

• Nakai fai omoomoiaga. “Manamanatu e tau tagata to fuata tumau a lautolu mo e nakai fai tupetupe. Mo e uka ke manamanatu to gagao a koe he taha magaaho. Manamanatu ni a koe ko e tau tagata momotua ka moua e tau lekua malolō tino.”​—Sophia.

• Nakai fai magaaho. “Lavelave lahi au, ti taute e au ke fai magaaho ke moua e kai mitaki mo e mohe, ka e uka ke kumi e magaaho ke faofao tumau.”​—Clarissa.

• Nakai totogi e fale faofao tino. “Tau uka ke fakatumau e fulufuluola he tino​—ti totogi ka fano ke he fale faofao tino!”​—Gina.

Manamanatu ki ai:

Ko e heigoa ne fakalavelave lahi a koe ke nakai faofao? Ko e gahua lahi ke utakehe e fakalavelave, ka e loga e fua mitaki ka moua.

Ko e falu puhala:

• Igatia mo e leveki e malolō tino haau.​—Kalatia 6:5.

• Tiaki e taute lagatau. (Fakamatalaaga 11:4) Ma e fakatai, nakai lata ke fano ke he fale faofao ke kamata e polokalama haau ke faofao. Kumi e taha mena ke taute ne fiafia mo e fakatumau a koe ki ai.

• Ke moua e tau lagomatai, hūhū ke he falu ko e heigoa ha lautolu ne taute ke faofao.​—Tau Fakatai 20:18.

• Taute e setulu. Taute e tau foliaga mo e tohi hifo e holo ki mua haau ke fakaohooho aki a koe.​—Tau Fakatai 21:5.

• Kumi e taha tagata ke faofao mo koe. Ka moua e koe e “kapitiga ke faofao tokoua” to atihake mo e lagomatai e ia a koe ke muitua ke he setulu.​—Fakamatalaaga 4:9, 10.

• Ka fehagai a koe mo e tau lekua, ua tiaki e faofao.​—Tau Fakatai 24:10.

Talahau e Tohi Tapu ke he tau tagata oti ke mahani “fakalatalata.” (Tito 2:2) Kua lata ke lau tatai he faofao. Tau tagata ne lahi mahaki e faofao kua mahani fakatokoluga. “Ka mua atu e manatu he tagata ke he tau fua leke haana ka e nakai lotomatala ti nakai manako au ki ai,” ne talahau he fifine fuata ko Julia.

Fakaeneene ke he tau fakatino faofao ne ‘fakaohooho mo e omoi’ a koe “Ke taute e mena ne nakai hagahaga mitaki ma e malolō tino haau.” Ko e tau talahauaga pihia ka fakamamahi a koe mo e nakai hagaaki ke “mailoga e mutolu e tau mena ne mua atu e aoga” he moui.​—Filipi 1:10, NW.

He lafi ki ai, ko e tau mena ke fakamalolō a koe ke faofao ka fakalolelole foki a koe. Ko e tama fifine fuata ko Vera ne talahau: “Tokologa e tau tama fifine ne fakaputu e tau fakatino he tau tagata ne manako a lautolu ke tino pihia, ti onoono a lautolu ki ai ka teva a lautolu. Ka e lali a lautolu ke fifitaki ke he tau fakatino nei ne nakai fai lagomatai ki a lautolu. Mitaki ke taute e foliaga ke mua atu e holo ki mua e malolō tino haau ka e nakai ke fulufuluola noa ni.”