Mata Fēfē a Iesu?
Ko e tali he Tohi Tapu
Nakai fai tagata ne iloa mooli na mata fēfē a Iesu, ha kua nakai fakamaama he Tohi Tapu e foliga haana. Fakakite he mena nei kua nakai ko e fofoga ha Iesu ne mua e aoga. Pete ia, fai fakamaamaaga laulahi e Tohi Tapu ki a Iesu.
Foliga: Ko Iesu ko e Iutaia ti liga mata a ia tuga e tau tagata Semite mai he matua fifine haana. (Heperu 7:14) Liga nakai kehe lahi mahaki e foliga haana. Taha magaaho ne fina atu fakagalo a ia mai i Kalilaia ki Ierusalema ti nakai kitia he faoa. (Ioane 7:10, 11) Ti nakai kehe mamao e mata haana mai he tau tutaki tata lahi haana. Na fakakite age e Iuta Isakariota a Iesu ke he matakau ne o mai mo e tau katoua ke tapaki a Iesu.—Mataio 26:47-49.
Tau lauulu: Liga nakai loloa e ulu ha Iesu, ha kua pehē e Tohi Tapu “kaeke kua leleva e lauulu he tane, ko e mena ia ke ma ai a ia.”—1 Korinito 11:14.
Hafe: Fai hafe a Iesu. Muitua a ia ke he fakatufono Iutaia, ko e tau tagata taane ke ‘ua moumou e hafe kakau.’ (Levitika 19:27; Kalatia 4:4) Talahau foki he Tohi Tapu e hafe ha Iesu he perofetaaga ke he matematekelea haana.—Isaia 50:6.
Tino: Ko e tau talahauaga oti ne fakakite kua tino malolō a Iesu. He fekafekauaga haana, ne fano hui a ia. (Mataio 9:35) Lagaua ne fakameā e ia e faituga Iutaia, fulufuluhi e tau laulau he tau tagata fakafua tupe, mo e lagataha ne vega e tau manu ki fafo aki e fahi. (Luka 19:45, 46; Ioane 2:14, 15) He McClintock and Strong Cyclopedia ne pehē: “Ko e tala katoa fakaevagelia ne fakakite [a Iesu] kua tino mitaki mo e malolō.”—Volume IV, lau 884.
Kitia he fofoga: Ko Iesu ne mafanatia mo e fakaalofa hofihofi, ti nakai noa kua kitia foki he fofoga haana. (Mataio 11:28, 29) Kumi he tau tagata kehekehe a ia ke moua e mafanatia mo e lagomatai. (Luka 5:12, 13; 7:37, 38) Mafanatia foki e tau fanau ki a Iesu.—Mataio 19:13-15; Mareko 9:35-37.
Tau tala nakai mooli ke he foliga ha Iesu
Tala nakai mooli: Falu ne talahau na tupu mai a Iesu i Aferika ha kua fakatatai he tohi a Fakakiteaga e tau lauulu haana ke he tau fulu mamoe mo e tau ve, po ke tau hui, ke tuga e “apa kula kikila.”—Fakakiteaga 1:14, 15.
Tala mooli: Ko e tohi a Fakakiteaga ne tohi e tau fakailoaaga, po ke tau fakamailoga. (Fakakiteaga 1:1) Ko e fakamaamaaga ke he tau lauulu mo e tau ve ha Iesu ne fakaaoga e vagahau fakatai ke fakamaama e tau aga ha Iesu he mole e liu tu mai, nakai ke fakamaama e foliga he tino haana he nofo he lalolagi. He talahau ko Iesu na “lauulu tuga ne fulufulu mamoe hina, tuga e kiona,” ne fakaaoga ia Fakakiteaga 1:14 e lanu ka e nakai ko e tau lauulu ke fakamaama e fakatataiaga. Fakakite aki e pulotu haana ha ko e tau he moui. (Fakakiteaga 3:14) Nakai fakatatai he kupu nei e tau lauulu ha Iesu ke he tau fulu mamoe po ke na tatai e tau lauulu haana ke he kiona po ke sinō.
Ko e tau ve ha Iesu kua “tuga ne apa kula kikila ia, tuga ne vela ke he gutuumu.” (Fakakiteaga 1:15) Haana fofoga foki kua “tuga ne la ia ka kikila mai ke he hana malolo.” (Fakakiteaga 1:16) Ha kua nakai fai magafaoa ne lanu pihia e kili, ti ko e fakakiteaga fakatai anei hagaao ki a Iesu ne liu tu mai “kua haele ke he maama nakai fakatata ki ai e taha.”—1 Timoteo 6:16.
Tala nakai mooli: Lolelole mo e nakai malolō a Iesu.
Tala mooli: Ko Iesu ne loto malolō a ia. Ma e fakatai, ne loto malolō ke fakakite a ia ke he kau ne o mai mo e tau katoua ke tapaki a ia. (Ioane 18:4-8) Nakai noa ne alaga malolō foki a ia ke gahua ta fale ne fakaaoga e tau koloa kamuta ne nakai fano he hila.—Mareko 6:3.
Ko e ha mogoia ne lata ke lagomatai a Iesu ke fua e akau fakatautau haana? Mo e ko e ha ne mate mua a Iesu he tau tagata ne fakatautau fakalataha mo ia? (Luka 23:26; Ioane 19:31-33) He teitei a Iesu ke tamate, ne fakatalofe hifo a ia. Lafi ai ne ala a ia he pō katoa he lahi e manamanatu. (Luka 22:42-44) He pō ia ne taute fakakelea he tau Iutaia a ia, mo e he pogipogi hake ne fakakikiveka he tau Roma a ia. (Mataio 26:67, 68; Ioane 19:1-3) Liga ko e tau mena ia ati mafiti e mate ha Iesu.
Tala nakai mooli: Ahumate mo e momoko tumau a Iesu.
Tala mooli: Ne mitaki katoatoa e tau puhala ne fakakite e Iesu e tau aga he Matua haana he lagi ko Iehova, fakamaama he Tohi Tapu a Iehova ko e “Atua monuina [fiafia].” (1 Timoteo 1:11; Ioane 14:9) Fakaako foki e Iesu e falu ke he puhala ke moua e fiafia. (Mataio 5:3-9; Luka 11:28) Ko e tau mena mooli nei ne fakakite e mata fiafia ha Iesu.
Liga Manako Foki a Koe
TAU FAKAAKOAGA AOGA HE TOHI TAPU
Maeke Fēfē a Tautolu ke Iloa Tonu kua Mooli e Tohi Tapu?
Ka tohia he Atua e Tohi Tapu, kua lata ke nakai tatai mo e ha tohi.
HAGAAO KI A MAUTOLU
Ole ke Ahiahi Mai
Fakatutala ke he hūhū he Tohi Tapu, po ke fakaako atu foki hagaao ke he Tau Fakamoli a Iehova.