Tapiki mau a mautolu ke he Tohi Tapu he fakamanatu e Kaiaga Afiafi he Iki ne iloa foki ko e Kaiaga he Iki, Kaiaga Fakahiku, mo e ko e Fakamanatuaga he mate ha Iesu. (1 Korinito 11:20) Kehe ai, loga e taofiaga mo e falu lotu ne nakai taute e fakamanatuaga nei ne fakavē ke he Tohi Tapu.

 Ko e kakano he Kaiaga Afiafi he Iki ko e manatu a Iesu he fakakite e fakaaue ha tautolu ke he poa ne foaki e ia ma tautolu. (Mataio 20:28; 1 Korinito 11:24) Ko e fakamanatuaga ne nakai ko e matagahua, po ke tau puhala fakalotu ne foaki ha ko e tuaga tokoluga tuga e fakatapu po ke fakamagalo e tau agahala. a Fakaako he Tohi Tapu na maeke e tau agahala ha tautolu ke fakamagalo puhala he tua ki a Iesu, ka e nakai ke he faiagahau fakalotu.​​—Roma 3:25; 1 Ioane 2:1, 2.

 Poaki e Iesu ke he tau tutaki haana ke fakamanatu e Kaiaga Afiafi he Iki, ka e nakai talahau fakatonu e ia ko e lagafiha. (Luka 22:19) Falu ne manatu hifo liga lata ke fakamanatu he tau mahina takitaha, ka e fakamanatu he falu lagataha he faahi tapu, he tau aho takitaha, lagaloga he aho, po ke taute tumau ka logona hifo he tagata kua latatonu ai. b Ka e hanei falu mena kua lata a tautolu ke manamanatu ki ai.

 Fakatū e Iesu e Kaiaga Afiafi he Iki he aho he Paseka Iutaia, ti mate a ia he aho ia ni. (Mataio 26:1, 2) Nakai felauaki noa e mena nei. Fakatatai he tau Tohiaga Tapu e poa ha Iesu ke he punua mamoe he Paseka. (1 Korinito 5:7, 8) Taute e Paseka lagataha he tau tau takitaha. (Esoto 12:1-6; Levitika 23:5) Pihia foki ko e Fakamanatuaga he mate ha Iesu ne fakamanatu lagataha he tau tau takitaha he tau Kerisiano c fakamua atu, ti muitua he Tau Fakamoli a Iehova e fakafifitakiaga ia ne fakavē ke he Tohi Tapu.

 Ko e puhala ne fakatū e Iesu ne nakai ni fakakite e lagafiha mo e aho mo e magaaho he Fakamanatuaga. Taute e ia e fakamanatuaga he mole e toaga laā ia Nisana 14, 33 V.N., fakatatau mo e kalena faka-Iutaia. (Mataio 26:18-20, 26) Matutaki a tautolu ke muitua e Fakamanatuaga he aho ia he tau tau takitaha he muitua ke he puhala ne taute he tau Kerisiano fakamua atu. d

 Pete ko e Nisana 14, 33 V.N ko e Aho Faraile, ko e fakamanatuaga he aho ia kua liga hoko he taha aho kehe he faahi tapu he tau tau takitaha. Fifili e mautolu e aho Nisana 14 he tau tau takitaha he fakaaoga e puhala he magahala ha Iesu, ka e nakai fakaaoga e puhala he kalena Iutaia he vaha foou nei. e

 Ma e fakamanatuaga foou, fakaaoga e Iesu e falaoa nakai fakaea mo e uaina kula ne toe mai he kaiaga he Paseka. (Mataio 26:26-28) He muitua ke he fakafifitakiaga ha Iesu, fakaaoga e mautolu e falaoa nakai fakaea ne nakai lafi ki ai falu mena mo e uaina kula, nakai ko e puke uaina humelie po ke fio aki falu mena.

 Falu lotu ne fakaaoga e falaoa ne fakaea po ke lafi ki ai e isi, ka ko e fakaea ne fa hagaao e Tohi Tapu ki ai ko e fakamailoga he agahala mo e matahavala. (Luka 12:1; 1 Korinito 5:6-8; Kalatia 5:7-9) Ti ko e falaoa ne nakai fakaea mo e nakai lafi ki ai falu mena ka latatonu ke eke mo fakamailoga he tino nakai agahala he Keriso. (1 Peteru 2:22) Taha tauteaga foki ne nakai lalago he Tohi Tapu ko e hukui aki e inu kulepi e uaina. Falu lotu ne taute ai ha ko e taofiaga ha lautolu ne nakai mai he Tohi Tapu ke nakai fakaaoga e kava.​—1 Timoteo 5:23.

 Ko e falaoa nakai fakaea mo e uaina kula he Fakamanatuaga ko e tau mena fakatai, po ke fakamailoga he tino mo e toto he Keriso. Nakai ke hiki po ke fio ke he tino mooli mo e toto tuga he logona hifo he falu. Manamanatu ke he tau kupu Tohi Tapu ke moua e maamaaga.

•   Ka poaki a Iesu ke he tau tutaki haana ke inu e toto haana, to tala age a ia ki a lautolu ke moumou e fakatufono he Atua ke ua fakaaoga e toto. (Kenese 9:4; Gahua 15:28, 29) Ka e ai pihia ha kua nakai poaki a Iesu ke he falu ke moumou e fakatufono he Atua ke he tapuina he toto.​—Ioane 8:28, 29.

•   Ane mai inu mooli he tau aposetolo e toto ha Iesu, to nakai pehē a ia ko e toto haana ‘to fakamaligi’ he fakakite kua nakaila taute e mena ia.​​—Mataio 26:28.

•   Taute e Iesu e poa ‘lagataha he eke e ia.’ (Heperu 9:25, 26) Kaeke ke hiki e falaoa mo e uaina ke he tino mo e toto haana he Kaiaga Afiafi he Iki ti kua lata a lautolu ne kai mo e inu ai ke liu taute foki e poa ia.

•   Pehē a Iesu: “Kia eke e mutolu e mena nai mo fakamanatuaga kia au,” ka e nakai ko e “poa ia au.”​​—1 Korinito 11:24.

 Ko lautolu ne talitonu ke he faliu e falaoa mo e uaina ke he tino mo e toto ha Iesu ne fakavē e fakaakoaga nei ke he falu kupu tohi he Tohi Tapu. Ma e fakatai, loga e tau fakaliliuaga he Tohi Tapu ne tohi hifo he pehē a Iesu hagaao ke he uaina: “Ko e toto haaku anei.” (Mataio 26:28) Ka e maeke foki e tau kupu ha Iesu ke fakaliliu pehē: “Ha ko e haku a toto a enei,” “Hukui he mena nei e toto haaku,” po ke “Fakakite he mena nei e toto haaku.” f Tuga he fa taute e Iesu, ne fakaako a ia he fakaaoga e vagahau fakatai ne tuga kua tatai.​​—Mataio 13:34, 35.

 Ka fakamanatu he Tau Fakamoli a Iehova e Kaiaga Afiafi he Iki, ko e numera tote ni kua kai e falaoa mo e inu e uaina. Ko e ha ne pihia ai?

 Ko e toto ha Iesu ne fakamaligi ne fakatū e “maveheaga fou” ne hukui e maveheaga ha Iehova ko e Atua mo e motu ha Isaraela i tuai. (Heperu 8:10-13) Ko lautolu he maveheaga foou ne kai mo e inu e tau mena fakatai he Fakamanatuaga. Nakai putoia e tau Kerisiano oti ka ko lautolu ni kua uiina he puhala pauaki mai he Atua. (Heperu 9:15; Luka 22:20) Ko lautolu nei ka pule fakalataha mo Keriso ke he lagi ti talahau he Tohi Tapu ko e 144,000 e tagata kua moua e kotofaaga ia.​​—Luka 22:28-30; Fakakiteaga 5:9, 10; 14:1, 3.

 Kehe mai he “fuifui mamoe gahoa” ko lautolu ne uiina ke pule fakalataha mo Keriso, ko e tau tagata tokologa ia tautolu kua amaamanaki ke fai vala he “moto tagata tokologa” ka moua e moui tukulagi he lalolagi. (Luka 12:32; Fakakiteaga 7:9, 10) Nakai kai mo e inu a tautolu ne moua e amaamanakiaga ke he lalolagi he tau mena fakatai he Fakamanatuaga, ka e fakalataha a tautolu he fakakite e loto fakaaue ke he poa ne taute e Iesu ke lata mo tautolu.​​—1 Ioane 2:2.