U-YOMARA nabafowabo u-Marcelo no-Hiver bahlala endaweni encani e-Guatemala. U-Yomara wathoma ukufunda iBhayibheli naboFakazi, kwathi ngokukhamba kwesikhathi abafowabo ababili nabo bathomisa ukufunda. Kodwana bekunomraro. Bobathathu njalo bebaziimphofu begodu bebangakwazi ukufunda ibraille. Nje-ke umuntu obekabafundela bekufuze abafundele iingaba namavesi weBhayibheli.

Ukuya emihlanganweni yebandla kweza nesinye isitjhijilo. Bebangakghoni ukuzikhambela bodwa ukuya eWolweni lomBuso ebeliseduze ebelithatha imizuzu ema-40 ukufika kilo. Abafowethu bebandleni bahlela ukuthi bakghone ukuba khona kiyo yoke imihlangano yebandla. Lokha nabathoma ukubeka iinkulumo emhlanganweni webandla, abafowethu babasiza bona bakghone ukubamba ngehloko iinkulumo zabo.

NgoMeyi 2019, imihlangano yebandla yathoma ukubanjelwa endawenekhabo. Ngesikhatheso, bekunabatjhadikazi abamaphayona abafudukela endaweni leyo. Bazibekela umgomo wokufundisa abantwana abathathwaba ukufunda nokutlola i-braille, ngitjho nanyana bona abatjhadikazaba bebangakwazi ukwenza lokho. Nje-ke baya elayibhrari bayokufunda ibraille ukwezela bona bakghone ukubafundisa.

Eenyangeni ezimbalwa, abantwana bomuntu abathathwaba bésele bakghona ukufunda i-braille lula begodu lokho kwabenza bathuthuka ebuhlotjeni babo noZimu. a Nje u-Yomara, u-Marcelo no-Hiver bamaphayona wesikhathi esizeleko. U-Marcelo uyinceku esizako. Qobe veke bahlanganyela emsebenzini webandla newokutjhumayela. Ummoyabo wokukhuthala uyathelelana.

Abantwana bomuntu abathathwaba bathokoza khulu ngesekelo lethando abalifumana ebandleni. U-Yomara uthi, “kusukela nasithoma ukuhlangana naboFakazi basitjengisa ithando lobuKrestu.” U-Marcelo ungezelela uthi, “Sinabangani abahle ebandleni begodu siyingcenye yomndeni wephasi loke obumbeneko nonethando.” U-Yomara nabafowabo bayalilulukela ilanga lapho bazokubona khona iphasi litjhuguluka liba yipharadesi.—Rhu. 37:10, 11; Isa. 35:5.