1-2. Ubujamo bethu bufana njani nebesokana ekukhulunywa ngalo esigabeni 1?

 CABANGA ngesokana elikhuliselwe emndenini oregileko. Ngelinye ilanga ababelethi balo bayahlongakala engozini. Iindabezi ziliphatha kabuhlungu khulu. Kuthi kusese njalo, kuneendaba ezingasimnandi ezisalilindileko. Lifumana ukuthi ababelethi balo bamotjha imali enengi khulu bebalitjhiya eenkolodweni. Akhe ucabange, kunokobana lifumane ilifa elivela ebabelethini balo, lifumana iinkolodo ekufuze lizibhadele begodu abantu bafuna lizibhadele khonokho. Angekhe lakghona ukusibhadela isikolodwesi.

² Ngendlela efanako, nathi sisebujameni obufana nebesokaneli. Ababelethi bethu bokuthoma bebanganasono begodu bahlala epharadesi elihle. (Gen. 1:27; 2:​7-9) Bebanethuba lokuphila ePharadesi ngokungapheliko. Kodwana izinto zatjhuguluka. Balahlekelwa likhaya labo nethuba lokuphila ngokungapheliko. Ngiliphi ilifa ebebazolinikela abantwana ebebazokuba nabo? IBhayibheli lithi: “Isono sangena ephasini ngomuntu munye [u-Adamu] nokufa kwangena ngesono, yeke ukufa kwarhatjhekela kibo boke abantu ngombana boke bonile.” (Rom. 5:12) Ilifa esalifumana ku-Adamu sisono esibangela ukufa. Ilifeli sisono esinjengesikolodo esikhulu, okunganamuntu ongakghona ukusibhadela.—Rhu. 49:8.

 3. Kubayini izono zethu zingafaniswa nesikolodo?

 ³ EBhayibhelini isono sifaniswa nesikolodo. (Mat. 6:12; Luk. 11:4) Nasenza isono kuba ngasuthi sikoloda uJehova. Kufuze sisibhadele. Nasingasibhadeliko isikolodwesi, sizokusulwa kwaphela nasihlongakalako.—Rom. 6:​7, 23.

 4. (a) Ngaphandle kwesizo, khuyini engenzeka kizo zoke izoni? (Rhu. 49:​7-9) (b) Ibizo elithi “isono” eBhayibhelini litjho ukuthini? (Funda ibhoksi elithi “ Isono.”)

⁴ Kungakghoneka na ukufumana okwalahlwa ngu-Adamu no-Eva? Angekhe sakghona ukuzenzela khona lokho. (Funda iRhubo 49:​7-9.) Ngaphandle kwesizo bengekhe sikghone ukuphila esikhathini esizako namkha sifumane ithemba lokuvuswa kwabahlongakeleko. Kuhlekuhle, besizokufa njengeenlwana.—UMtj. 3:19; 2 Pit. 2:12.

 5. UBabethu onethando usisize njani ngesikolodo sesono esisizuze ngelifa? (Qala isithombe esingaphandle.)

⁵ Nasicabanga ngesokana esikhulume ngalo nakuthoma isihlokwesi, belizozizwa njani indoda eregileko nayithi izokubhadela zoke iinkolodo zalo? Kuliqiniso ukuthi bengeze licabange kabili ngokwamukela isipho sesihlesi. Ngendlela efanako, uBabethu onethando, uJehova, usiphe isipho esibhadela isikolodo sesono esisifumene ku-Adamu. UJesu wayihlathulula ngendlela le: “Ngombana uZimu walithanda khulu iphasi kangangobana wanikela ngeNdodanakhe ebelethwe yodwa bonyana woke umuntu otjengisa ukukholwa kiyo angabhujiswa kodwana abe nokuphila okungapheliko.” (Jwa. 3:16) Ukungezelela kilokho, isiphesi sisenza sibe nobuhlobo obuhle noJehova.

 6. Ngimaphi amabizo esizokucoca ngawo esihlokwenesi begodu kubayini?

⁶ Singazuza njani esiphenesi esenza izono zethu zilitjalelwe? Ipendulo yombuzo lo siyifumana endleleni iBhayibheli elisebenzisa ngayo amabizo anjengathi ukubuyisana, ukulitjalelwa kwezono, isihlengo, ukubhadela obolekwe khona nokubizwa ngolungileko. Esihlokwenesi, sizokuhlathulula ibizo ngalinye nokuthi litjho ukuthini. Njengombana sicabangisisa ngalokhu uJehova asenzele khona bona asilibalele, sizomthokoza khulu.

UMNQOPHO: UKUBUYISANA

 7. (a) Khuyini okhunye okwalahlekela u-Adamu no-Eva? (b) Njengombana siziinzukulwana zaka-Adamu no-Eva, khuyini esiyitlhoga khulu? (Roma 5:​10, 11)

⁷ Ngemva kobana u-Adamu no-Eva bonile, akhenge kusakghonakala ukuthi baphile ngokungapheliko, baba manaba kaJehova. Ekuthomeni, u-Adamu no-Eva  bebamalunga womndeni kaZimu. (Luk. 3:38) Ngemva kobana bone uJehova, akhenge asabavumela babe mndenakhe, lokho kwenzeka ngaphambi kobana babe nabantwana. (Gen. 3:​23, 24; 4:1) Njengombana siziinzukulwana zabo, sitlhoga ukubuyisana noJehova. (Funda kwebeRoma 5:​10, 11.) Ngamanye amezwi, kufuze sibe netjhebiswano elihle noJehova. Ngokuya ngenye incwadi, ibizo lesiGirigi elitjhugululwe ngokuthi “ukubuyisana” lingatjho “ukuba mngani nenaba.” Okuthabisako kukuthi uJehova uthethe amagadango wokuthi lokhu kwenzeke. Njani?

ILUNGISELELO: UKULITJALELWA KWEZONO

 8. Khuyini (a) ukulitjalelwa kwezono? (b) ukubuyisana?

⁸ Ukulitjalelwa kwezono lilungiselelo uJehova alibekileko bona avuselele itjhebiswano elihle phakathi kwakhe nabantu abanesono. Lihlanganisa ukutjhentjhisana ngenani lezinto ezilinganako. Ngendlela le, okuthileko okulahlekileko namkha okumotjhekileko kungafunyanwa namkha kujanyiselelwe. ImiTlolo YamaKrestu YesiGirigi isebenzisa ibizo elinehlathululo efanako elithi “ukulitjalelwa kwezono” nelithi ukubuyisana. (Rom. 3:25) Ukubuyisana sisenzo esivumela umuntu ukuthi abe nokuthula noZimu netjhebiswano elihle naye.

 9. Ngiliphi ilungiselelo lesikhatjhana uJehova alenzileko bona kulitjalelwe izono zama-Israyeli?

⁹ Bona ama-Israyeli athabele itjhebiswano elihle noJehova, wenze amalungiselelo wesikhatjhana wokuthi alitjalelwe izono. Kwa-Israyeli, iLanga lokuLitjalelwa kweZono, beliba khona kanye ngomnyaka. Ngelangelo, umphrisi ophakemeko bekanikela ngeenlwana ngebanga labantu. Iqiniso kukuthi imihlatjelo yeenlwana, beyingakaneli ukuthi abantu balitjalelwe izono ngokupheleleko ngebanga lokuthi, iinlwana zingaphasi kwabantu. UJehova bekahlala azimisele ukulibalela izono zabantu bakwa-Israyeli nabaragela phambili benza imihlatjelo. (Heb. 10:​1-4) Ukungezelela kilokho, ilungiselelweli neminye imihlatjelo beyikhumbuza ama-Israyeli ukuthi anesono esingangani nokuthi asitlhoga kangangani isisombululo esizokuhlala unomphela.

10. Ngiliphi ilungiselelo lokulibalela izono uJehova alenzileko elizokuhlala unomphela?

¹⁰ Khuyini eyenziwe nguJehova ukulibalela izono zethu. Wahlela ukuthi iNdodanakhe ethandekako ‘inikelwe kube kanye kwaphela bona ithwale izono zabanengi.’ (Heb. 9:28) UJesu wanikela ‘ngokuphila kwakhe bona kube sihlengo sabanengi.’ (Mat. 20:28) Siyini isihlengo?

UMTLOMELO: ISIHLENGO

11. (a) IBhayibheli lithi siyini isihlengo? (b) Khuyini ebeyitlhogeka nakuzakubhadelwa isihlengo?

¹¹ IBhayibheli lithi isihlengo linani elibhadelwako bona silitjalelwe izono begodu sibuyisane. a Ngokuya ngoJehova, sisisekelo sokuvuselela okwalahlekako. Ngayiphi indlela? U-Adamu no-Eva balahlekelwa kuphila kwabo okunganasono begodu bengekhe basaphila ngokungapheliko. Yeke isihlengo bekufuze sibe linani lalokho okwalahlekako. (1 Thim. 2:6) Besingabhadelwa kwaphela ngendoda (1) enganasono; (2) engaphila ephasini ngokungapheliko (3) nezimisele ukunikela namkha ukudela ukuphila kwayo, ngebanga lethu. Ukuphila komuntu loyo kuzokubhadela okulahlekileko.

12. Kubayini uJesu akghona ukubhadela isihlengo esitlhogekako?

 ¹² Cabanga ngamabanga amathathu enza uJesu wakghona ukubhadela isihlengo. (1) Bekanganasono ngombana “akhenge enze isono.” (1 Pit. 2:22) (2) Ngebanga lalokho, bekangakghona ukuphila ngokungapheliko ephasini. (3) Bekazimisele ukufa adele ukuphila kwakhe ngebanga lethu. (Heb. 10:​9, 10) Njengombana bekanganasono, uJesu bekalingana nendoda yokuthoma u-Adamu, ngaphambi kobana yone. (1 Kor. 15:45) Ngokufa kwakaJesu kwakghonakala ukuthi isono saka-Adamu silitjalelwe, okutjho ukujamiselela lokho u-Adamu akulahlako. (Rom. 5:19) Ngokwenza njalo, uJesu waba ‘ngu-Adamu wokugcina.’ Akutlhogeki bona kube nomunye umuntu onganasono ozokubhadela okwalahlwa ngu-Adamu. UJesu wahlongakala “kanye kwaphela.”—Heb. 7:27; 10:12.

13. Uyini umehluko phakathi kwelungiselelo lokulitjalelwa kwezono nesihlengo?

¹³ Uyini umehluko phakathi kwelungiselelo lokulitjalelwa kwezono nesihlengo? Ilungiselelo lokulitjalelwa kwezono ngilokho uZimu akwenzileko ukubuyisela itjhebiswano elihle phakathi kwakhe nabantu. Isihlengo linani elibhadelweko bona kulitjalelwe isono sabantu. Inaneli lijamele iingazi zakaJesu ezilugugu ezathuluka ngebanga lethu.—Efe. 1:7; Heb. 9:14.

IMIPHUMELA: UKUBHADELA OBOLEKWE KHONA NOKUBIZWA NGOKUTHI ULUNGILE

14. Sizokucoca ngani nje begodu kubayini?

¹⁴ Iyini imiphumela yelungiselelo lokulitjalelwa kwezono? IBhayibheli lisebenzisa amezwi ambadlwana ukuhlathulula imiphumela leyo. Ngitjho nanyana ihlathululo yamezwi la ingabonakala ngasuthi itjho into eyodwa kodwana ibizo ngalinye likhanyisa ingcenye ethileko yelungiselelo lokulitjalelwa kwezono, elivula indlela yokulitjalelwa nguJehova. Njengombana sihlolisisa amezwi la, sizokubona ukuthi asithinta njani thina.

15-16. (a) EBhayibhelini kutjho ukuthini ‘ukubhadela obolekwe khona’? (b) Kusithinta njani lokho?

¹⁵ IBhayibheli lithi ngebanga lokobana isihlengo sibhadelwe, sitjhatjhululiwe. Umpostoli uPitrosi wathi: “Niyazi ukuthi endlelenenu yokuphila elilize enayifumana kibokhokho benu, akhenge nitjhatjhululwe [NgesiGirigi, “nihlengwe”] ngezinto ezonakalako njengesiliva namkha igolide. Kodwana bekungeengazi eziligugu, njengezemvana enganabala nemsulwa, ekungezakaKrestu.”—1 Pit. 1:​18, 19; ftn.

¹⁶ Ngebanga lomhlatjelo wesihlengo, singatjhatjhululwa ekubusweni sisono nokufa. (Rom. 5:21) Sithokoza khulu kuJehova noJesu ukuthi ngeengazi zakaJesu eziligugu, sihlengiwe.—1 Kor. 15:22.

17-18. (a) Kutjho ukuthini ukubizwa ngolungileko? (b) Kusithinta njani lokhu?

¹⁷ Ukubizwa ngolungileko kutjho ukusulwa komlandu. Ngokwenza njalo, uJehova akaphuli iinkambiso zakhe zobulungiswa. UJehova akathi silungile ngebanga lalokho thina esikwenzako begodu akavumelani nezono esizenzako. Ngebanga lokukholwa esinakho elungiselelweni lokulitjalelwa kwezono nenanini elabhadelwako lesihlengo, uJehova unesisekelo sokusula iinkolodo zethu.—Rom. 3:24; Gal. 2:16.

¹⁸ Kutjho ukuthini lokho emuntwini ngamunye? Labo abakhethelwe ukuyokubusa  noJesu ezulwini kuthiwa sele babantwana bakaZimu abalungileko. (Tit. 3:7; 1 Jwa. 3:1) Izono zabo sele zilitjalelwe. Umlandwabo usuliwe begodu bayakufanelekela ukuba semBusweni. (Rom. 8:​1, 2, 30) Abanethemba lokuphila ephasini sele kuthiwa balungile njengabangani bakaZimu begodu izono zabo zilitjalelwe. (Jak. 2:​21-23) Isiqubuthu esikhulu esizokusinda nge-Arimagedoni sinethuba lokungafi. (Jwa. 11:26) “Abalungileko nabangakalungi” abalele ekufeni banethuba lokuvuswa. (IzE. 24:15; Jwa. 5:​28, 29) Ekugcineni, abantu bakaJehova abalalelako abazabe basephasini ‘bazabe banetjhaphuluko ephazimulako njengabantwana bakaZimu.’ (Rom. 8:21) Siqale phambili lapho sizokuba bantwana bakaBabethu uJehova abanganasono!

19. Ubujamo bethu buthuthuke njani ngebanga lalokho uJehova noJesu abasenzele khona? (Funda nebhoksi elithi, “ Kutjho Ukuthini Kithi?”)

¹⁹ Ubujamo bethu khebafana nebesokana esikhulume ngalo ekuthomeni, elalahlekelwa ngiyo yoke into, labhalelwa nokubhadela iinkolodo. Kodwana uJehova wasiza. Ubujamo bethu butjhugulukile ngebanga lelungiselelo lokulitjalelwa kwezono nokubhadelwa kwesihlengo. Ukukholelwa kwethu kuJesu kuyasitjhaphulula esonweni nekufeni. Izono zethu zingasulwa, okuqakatheke ukudlula koke nje, singaba netjhebiswano elihle noBabethu onethando wezulwini uJehova.

20. Sizokucoca ngani esihlokweni esilandelako?

²⁰ Njengombana sicabangisisa ngalokho uJehova noJesu abasenzele khona sithokoza khulu. (2 Kor. 5:15) Ngaphandle kwesizo labo besingekhe sibe nethemba! Kutjho ukuthini ukulitjalelwa nguJehova emuntwini ngamunye? Ngilokho esizokucoca ngakho esihlokweni esilandelako.