Okulungileko Nokungakalungi: Isiqunto Ekufuze Uzithathele Sona
Iinkambiso zokuziphatha esikhetha ukuphila ngazo zizokuba nomthelela endleleni ukuphila kwethu okuzokuba ngayo. UJehova uZimu uyakwazi lokho. Kungebangelo afuna siphile ngeenkambiso zakhe.
UJehova ufuna sithabele ipilo enokuthula nethabisako.
“NginguJehova, uZimakho, loyo okufundisa bona uzuze, loyo okunqophisa endleleni ekufuze ukhambe kiyo. Kwaphela nawungalalela imiyalwami! Ukuthula kwakho kuzokuba njengemilambo nokulunga kwakho njengamagagasi welwandle.”—Isaya 48:17, 18.
NjengoMdalethu, uZimu wazi indlela engcono khulu ekufuze siphile ngayo. Ufuna silandele isinqophiso sakhe ngombana sizosizuzisa. Nasilalela imiyalo kaZimu angeze satshwenyeka ngokuthi indlela esikhetha ngayo izokuba nemiphumela emihle namkha awa. Sizokuhlala senza iinqunto ezihle ezizosilethela ukuthula nethabo.
UJehova akasibawi bona senze okungaphezu kwamandlethu.
“Umyalo enginiyala ngawo namhlanjesi awusibudisi kini begodu awusikude nani.”—Duteronomi 30:11.
Ukuphila ngemithetho kaZimu yokuziphatha kutlhoga bona senze amatjhuguluko endleleni esicabanga nesiziphatha ngayo. Nanyana kunjalo, uJehova akasibawi bona senze okungaphezu kwamandlethu. Ngebanga lokuthi uMdalethu, uyakwazi esingakghona ukukwenza. Njengombana sizomazi uJehova, sizokubona ukuthi “imiyalwakhe ayisibudisi.”—1 Jwanisi 5:3.
UJehova uthembisa ukubasiza labo abaphila ngeenkambiso zakhe.
“Mina Jehova uZimakho, ngibambe isandla sakho sangesidleni, ngithi kuwe, ‘Ungasabi. Ngizokusiza.’”—Isaya 41:13.
Singakghona ukuphila ngendlela uZimu afuna siphile ngayo ngombana uzosisiza. Angasisiza ngeliZwi lakhe iBhayibheli elisinikela isikhuthazo nethemba.
Iingidi zabantu ephasini loke zifumene ukuthi ukuphila ngeenkambiso zeBhayibheli kuthuthukise amaphilwazo. Kubayini ungafundi ngeseluleko esihle esifumaneka eBhayibhelini? Ungathoma ukufunda incwajana ethi, Thabela Ukuphila Ngokungapheliko! efumaneka simahla ku-jw.org. Ineenhloko ezilandelako:
-
IBhayibheli Lingakusiza Njani?
-
IBhayibheli Lisinikela Ithemba
-
Kghani Ungalithemba IBhayibheli?
Njengombana ufunda iliZwi lakaZimu iBhayibheli, uzokubona ukuthi aliphelelwa sikhathi; ‘lihlala lithembekile, nje nangokungapheliko.’ (IRhubo 111:8) Ukulandela iinqophiso zokuziphatha ezifumaneka eBhayibhelini yindlela engcono yokuphila. Nanyana kunjalo, uZimu angekhe asikatelele bona sizilandele. (Duteronomi 30:19, 20; Jotjhuwa 24:15) Lesi siqunto ngamunye wethu ekufuze azithathele sona.
