Esihlokweni esidlulileko sifunde ngezenzakalo uJesu akhuluma ngazo. Izenzakalwezi zisinikela ubufakazi bokuthi umBuso kaZimu sele uhlonyiwe ezulwini begodu iKosi yawo nguJesu Krestu.

IBhayibheli lithi uJesu nakathoma ukubusa waqotjha uSathana namadimonakhe ezulwini. Njenga nje balawula ephasini kwaphela, kungebangelo izinto zaba zimbi kangaka kusukela ngo-1914.—IsAmbulo 12:7, 9.

Nanyana izinto ziba zimbi ukuya phambili, uJesu iKosi yomBuso kaZimu wenze okuthileko bona asize abantu ephasini. Sithokoza umsebenzi wokufundisa abantu ngeBhayibheli owenziwa ephasini mazombe, sikhuluma nje abantu abanengi bafunda ngoZimu begodu batjhugulula amaphilo wabo. (Isaya 2:2-4) Abantu abanengi bafunde ukwaneliswa zizinto abanazo, abavumeli imali bona ilawule amaphilwabo. Abantwaba bafunda izinto ezizobasiza ekuphileni kwabo, babalihlobo labantu uZimu alamukelako elizokuphila ngaphasi komBuswakhe.

Nanyana uJesu sele athomile ukubusa ezulwini, imibuso yabantu isesekhona ephasina. Kodwana uZimu uyale uJesu wathi: “Busa phakathi kwezitha zakho.” (IRhubo 110:2) Msinyana uJesu uzokuqeda yoke imibuso yabantu, alethe itjhaphuluko ebantwini abalalela uZimu.

Ngesikhatheso umBuso kaZimu

• Uzokutjhabalalisa amasondo wamanga. Amasondo afundisa abantu amanga ngoZimu begodu enza ukuphila kwabantu kwaba budisi azokutjhatjalaliswa. IBhayibheli lifanisa amasondo wamanga nengwadla. Ukutjhatjalaliswa kwayo kuzokurara abantu abanengi.—IsAmbulo 17:15, 16.

• Uzokuphelisa aborhulumende babantu. UmBuso kaZimu uzokuthatha igadango lokuphelisa yoke imibuso yabantu.—IsAmbulo 19:15, 17, 18.

• Uzokutjhabalalisa abantu abambi. Kuzokwenzekani ngabantu abambi, abangafuni ukulalela uZimu? “Iinkhohlakali zizakujutjwa enarheni.”—IzAga 2:22.

• Uzokutjhabalalisa uSathana namadimoni. USathana namadimoni angekhe basakghona ‘ukudurhisa iintjhaba.’—IsAmbulo 20:3, 10.

Kutjho ukuthini koke lokhu ebantwini abalotjha uZimu?

UJesu oyiKosi yomBuso kaZimu, uzokwenza izinto ezinengi khulu ukudlula nanyana ngimuphi umbusi. Uzabe abusa nabazi-144 000 abathethwe ephasini. (IsAmbulo 5:9, 10; 14:1, 3) Uzokwenza isiqiniseko sokuthi intando kaZimu iyenziwa ephasini. UmBuso kaZimu uzobenzelani abantu abazabe bahlala ephasini?

• Uzokuphelisa ukugula nokufa. ‘Akunamhlali ozakuthi: “Ngiyagula,’” begodu “ukufa angekhe kusaba khona.”—Isaya 33:24; IsAmbulo 21:4.

• Uzokuletha ukuthula nevikeleko. “Abantwabakho bazakuba nokuthula okukhulu,” begodu “woke umuntu uzazigedla ngaphasi kwesidiribe sakhe, nanyana ngaphasi komuthakhe wamakhiwani. Yeke akunamuntu ozabethusa.”—Isaya 54:13; Mikha 4:4.

• Uzokuletha umsebenzi owanelisako. “Abakhethiweko bami bazazikholisa mndundu ngomsebenzi wezandla zabo. Abazukujulukela ilize.”—Isaya 65:22, 23.

• Uzokurarulula imiraro yebhoduluko. “Irhalawumba nenarha eyomileko kuzakuthaba, ibhudu lihlokome, liqhakaze njengamakhwa.”—Isaya 35:1.

• Uzokufundisa abantu ukuthi khuyini ekufuze bayenze bona baphile ngokungapheliko. “Lokhu kutjho ukuphila okungapheliko, bona bakwazi wena, okunguwe wedwa uZimu weqiniso naloyo omthumileko, uJesu Krestu.”—Jwanisi 17:3.

UZimu ufuna uthabele zoke iimbusiswezi. (Isaya 48:18) Isihloko esilandelako sizokuhlathulula ukuthi khuyini ekufuze uyenze bona uphile epharadesi.