Okubuzwa Bafundi Bakamagazini Lo . . .

UZimu Unaso Isithomo?

▪ IBhayibhili liphendula ngokobana uZimu akhenge abe nesithomo. UZimu bekasolo akhona. Ngitjho nanyana kubudisi ukuzwisisa bona uZimu akanasithomo begodu akanasiphetho, angeze sawala umbono loyo ngombana singawuzwisisi ngokuzeleko.

Kufuze singalindeli ukuzwisisa zoke iindlela zakaZimu. Umpostoli uPowula wathi: “Maye ukuhlakanipha nelwazi lakaZimu elingeze lalinganiswa! Ngubani ongachaza iinqumo zakhe? Ngubani ongathungatha iindlela zakhe na?” (KwebeRoma 11:33) Iingqondo zethu ngeze zakuzwisisa ngokuzeleko ukutjhinga kokuhlakanipha nelwazi lakaZimu njengombana nesana lingeze lakuzwisisa koke okwenziwa babelethi balo. Amezwi kaPowula aphefumulelweko la, ngitjho nanyana ngokuyihloko aqalisele ekuhlakanipheni nemuseni kaZimu onganakumadaniswa, atjengisa bona kuneemfanelo zakaJehova uZimu nemisebenzi yakhe erara khulu bona siyizwisise. Ukungabi kwakaZimu nesithomo kungokhunye kwakho. Nokho, kufuze sikuthembe ngokuzeleko lokho okufundiswa yiBhayibhili ngoZimu. Akhuluma ngemitlolo ecwengileko uJesu Krestu wathi: “Ilizwi lakho liliqiniso.”—Jwanisi 17:17.

Athandaza kuJehova uMosisi wathi: ‘UnguZimu onganasithomo nesiphetho.’ (AmaRhalani 90:2) La uMosisi uhlathulula ukuba khona kwakaZimu ngeendlela eembili. Kokuthoma kumalungana nengomuso. UJehova “Ngiloyo ophila bekube nini nanini.” (ISambulo 4:10, NW.) Ngalokho, uZimu uzokuhlala akhona ingomuso elingapheliko. Okhunye ngokwesikhathi esidlulileko. Ngamanye amezwi, uZimu azange abunjwe begodu zange abe nesithomo. Kunalokho, ubukhona bakaZimu bubuyela emva isikhathi esingapheliko.

Ngalokho, kuyafaneleka bona nguZimu kwaphela onesiqu esimhlukanisako “iKosi ebusa ngokungapheliko.” (1 KuThimothi 1:17) Cabanga: UJesu Krestu, iingidigidi zeengelozi ezulwini, nabantu ephasini, boke banesithomo ngombana babunjwa. (KwebeKholose 1:15, 16) Akusinjalo ngoZimu. Ukukatelela bona uZimu wabunjwa kuveza iphuzu elinganapente nepikiswano ezombako yokobana ngubani owabumba uMbumbi. NguJehova kwaphela “onganasithomo nesiphetho.” (AmaRhalani 90:2) Ngamanye amezwi, uJehova besoloko akhona “ngokungapheliko.”—KaJuda 25.

Nokho, khumbula bona umbono wokuba khona kwakaZimu ngokungapheliko awusiliqiniso elingazuzisiko. Ukutjheja umthandazo kaMosisi kwembula bona ukungabi nesithomo nesiphetho kwakaZimu kusiqinisekisa ngesithembiso sethando sokuphila okungapheliko. Ngokungafani nokuphila kwethu kwagadesi okufitjhani, uZimu uhlathululwa ‘njengolikhaya lethu lokuphephela eenzukulwaneni ngeenzukulwana.’ NjengoBaba onethando, uJehova bekakhona, ukhona nje, begodu uzokusolo anabantu bakhe. Kwanga ungaduduzwa liqiniso elikarisakweli!—AmaRhalani 90:1.