Iyokufika Nini Ipi ye-Amagedoni?

“Ngemva kwalokho ngaqala ngabona isiqubuthu esikhulu sabantu ebengekhe babalwa ngobunengi babo, bavela kizo zoke iintjhaba, nemindeni, namakoro neenlimi, . . . abavela ekutlhageni okukhulu.”—ISAMBULO 7:9, 14.

KWANJE ikundla ilungele ipi ye-Amagedoni. Njani?

Kwakade sekunehlangano yephasi mazombe yabantu abakhonza uJehova begodu abaphila ngeenkambisolawulo zeBhayibhili zokuziphatha eziphakemeko. Ngokusekelwa nguZimu, iingidi ezivela kizo zoke iintjhaba, amakoro neenlimi zihlangene ndawonye ngobunye bethando lobuzalwana bephasi mazombe. Ubuzalwanobo bufumaneka hlangana naboFakazi BakaJehova.—Jwanisi 13:35.

Msinyana uSathana uzokuhlanganisa amabuthwakhe athome ukusahlela kwakhe okukhulu ebantwini abanokuthula nababonakala banganasivikelo. (Ezekiyeli 38:8-12; ISambulo 16:13, 14, 16) Ungaqiniseka njani ngalokho? IBhayibhili ihlathulula izenzakalo ezithileko ezisisiza ukwazi ukubona ipi ye-Amagedoni bona izokufika nini. Ezinye izenzakalo ezinengi ekhuluma ngazo sezizalisekile.

Izenzakalo Ozibona Zizaliseka

Abafundi bakaJesu bambuza ukuthi abantu bazokwazi njani bona ‘isikhathi sesiphelo’ sesifikile. (Matewu 24:3) UJesu wabatjela ngesikhathi salokho njengombana athi, “amakhosi azakulwa wodwa, imibuso izavukelana. Kuzakuba khona indlala nokuzamazama kwephasi kiyo yoke indawo.” Bese wathi: “Zoke iintwezi zifana nesihlabi sokuthoma sokubeletha umntwana.” (Matewu 24:7, 8) Umpostoli uPowula wahlathulula isikhathi esifanako ‘njengemihla yokuphela,’ wathi imihla leyo ‘izokuba budisi kwamambala.’ (2 KuThimothi 3:1) Kuwe kubonakala kwanga iimporofidwezi zihlathulula izenzakalo ezenzeka namhlanjesi?

Kubayini isikhathesi sibudisi kangaka? Umpostoli uJwanisi usinikela ibanga. Wabikezela  bona kuzokuba ‘nesikhathi esifitjhani khulu’ lapho izenzo zakaSathana namadimonakhe zizokuncipha ephasini. USathana uhlathululwe ngokobana ukwate “uyadlhabhaza” esikhathinesi. (ISambulo 12:7-12) Uyawubona na umoya wokusilingeka nenturhu ebantwini namhlanje, ingasi endaweni eyodwa kwaphela kodwana ephasini loke?

UJesu godu wathi hlangana nesikhathi sobudisi obukhulobu, kuzokufezwa umsebenzi omkhulu khulu. Wathi, “Iindaba ezimnandi ngombuso kaZimu zizatjhunyayelwa ephasini loke, kube bufakazi eentjhabeni zoke” khona ukuphela kuzakufika. (Matewu 24:14) Namhlanjesi, eenarheni ezi-235, aboFakazi BakaJehova batjhumayela iindaba ezihle zoMbuso ngeenlimi ezingaphezu kwama-500. Abomagazini abasekelwe eBhayibhilini ababagadangisako, ISithalasokulinda ne-Phaphama!, babadlula kude abomagazini abarhatjhwa khulu ephasini. AboFakazi BakaJehova godu batjhugulule iimBhayibhili ngeenlimi ezingaba yi-100. Umsebenzabo wenziwa ziinsebenzi zokuzithandela begodu usekelwa ngeminikelo yokuzithandela. Ijima lokutjhumayela elirarakweli lingaba kuzaliseka kwesiporofido sakaJesu na?

IBhayibhili godu ihlathulula izenzakalo ezizokudosela ngokunqophileko epini ephakathi kwakaJehova nalabo abaphikisana naye. Cabangela iimporofido eentathu ozozibona zizaliseka.

Izenzakalo Ozozibona Zizaliseka Msinyana

Isiporofido 1. IBhayibhili ithi iintjhaba zizokwenza isimemezelo esiqakathekileko ‘sokuthula nehlalakuhle.’ Zizokucabanga bona zisebujamweni bokurarulula iimraro eemkhulu. Nokho, izinto ezizokulandela isimemezelwesi zizabe zingatjengisi ukuthula.—1 KwebeTesalonika 5:1-3.

Isiporofido 2. Ngokulandelako, aborhulumende abahlukahlukeneko bazokufuna ukulwa neenhlangano zeenkolo. EBhayibhilini, aborhulumendaba bajanyelwe sibanda; begodu iinkolo zephasi zamala zijanyelwe mfazi okhwele isibanda. (ISambulo 17:3, 15-18) Isibanda esingokomfanekiso ngokungazi sizokwenza lokho okufunwa nguZimu ngokutjhabalalisa iinkolo ezithi zijamele uZimu.

Ngokomfanekiso, umpostoli uJwanisi uhlathulula idrama ngendlela le: “Iimpondo ezilitjhumi ozibonileko, zona zikanye nesibanda zona ziyayihloya ingwadla, ziyoyihlubulisa isale ibhunubhunu; ziyokudla inyama yayo ziyirhayile ngomlilo. Ngombana uZimu ukubekile eenhliziyweni zazo bona zenze ihloso yakhe.”—ISambulo 17:16, 17.

Isiporofido 3. Okulandela ukusahlela kwekolo yamanga okuphumelelakokhu, uSathana uzokubuthelela iintjhaba bona zisahlele labo abakhonza uZimu.—ISambulo 7:14; Matewu 24:21.

Wena Uzokuthinteka Njani?

Nengabe awukabi nethuba lokufundisisa iBhayibhili, uzokuthola kubudisi ukukholelwa bona izinto okukhulunywe ngazo ngehla zizokwenzeka. Kodwana kunebanga elihle lokuthemba bona yoke imininingwana leyo izokuzaliseka nokobana izenzakalwezi zizokuzaliseka esikhathini esizako esingaphelisi ihliziyo. Umlando weemporofido zeBhayibhili ezinengi esele zizalisekile zisinikela isiqinisekisweso. *

Kubayini ungabekekeli isikhathi eqadi sokufumana bona kubayini aboFakazi BakaJehova baqiniseka bonyana “ipi eyodwa mhlana wesuku elikhulu lakaZimu uMninimandla woke” itjhidele khulu nokobana kubayini kungakafuzi uyisabe? Babawe bacoce nawe ngalokho iBhayibhili ethi kufuze ukwenze bona ube hlangana nalabo uJehova uZimu abavikelako. (ISambulo 16:14) Lokho okufundako kungatjhentjha umbonwakho ngekusasa.

[Umtlolo waphasi]

[Umkhangiso osekhasini 8]

Umsebenzi waboFakazi BakaJehova ungaba kuzaliseka kwesiporofido seBhayibhili?